Xəbər verildiyi kimi, Daxili İşlər naziri, general-polkovnik Vilayət Eyvazovun iştirakı ilə Baş Dövlət Yol Polisi İdarəsində 2019-cu ildə yol hərəkəti təhlükəsizliyinin təmini sahəsində görülən işlər və qarşıda duran vəzifələrin müzakirəsinə həsr olunmuş əməliyyat müşavirəsi keçirilib.
Müşavirədə Daxili İşlər naziri Vilayət Eyvazov bir sıra məsələlərə toxunub. Nazir Dövlət Yol Polisi Xidmətinin ötənilki fəaliyyətinin nəticələrini ümumən müsbət qiymətləndirib, qarşıda çox mühüm vəzifələrin durduğunu bildirib, onların həlli üçün konkret tapşırıq və tövsiyələrini verib. O, hər bir əməkdaşın vəzifə borcunu layiqincə yerinə yetirməsi, fəaliyyətin bütün sahələrində işlərin uğurlu getməsi üçün peşəkarlığın ən vacib amil olduğunu xatırladıb, eyni zamanda, əldə edilmiş müsbət nəticələrdən arxayınlaşmamağı, daha məsuliyyətlə xidmət aparılmasını tövsiyə edib.
Bununla belə, general-polkovnik V.Eyvazov başlıca vəzifənin hərəkət iştirakçılarını cəzalandırmaq deyil, yol hərəkətinin təhlükəsizliyini və tənzimlənməsini təmin etmək, insanların həyat və sağlamlığının avtomobil qəzalarından qorunması kimi vacib və şərəfli vəzifələrin icrasını həyata keçirmək, yol hərəkəti qaydalarının kobudcasına pozulması hallarının qarşısını almaq olduğunu bildirib.
Nazirin sözügedən məsələyə yanaşması maraqlı fikirdir. O mənada ki, təkcə sürücüləri cəzalandırmaqla yol hərəkətinin təhlükəsizliyini təmin etmək mümkün deyil. Onsuz da bununla bağlı qanuna uyğun olaraq cəzalar verilir. O baxımdan təkcə bu yetərli deyil. Elə etmək lazımdır ki, yol hərəkətinin təhlükəsizliyi ilə bağlı nizam-intizama, qayda-qanuna bütün tərəflər - istər sürücülər, istərsə də piyadalar əməl etsin. Belə olarsa, o zaman həm qəzaların sayı, həm də bu hadisələr zamanı ölən və xəsarat alanların sayı azalacaq.
“Başlıca olaraq hərəkətin təşkili və təhlükəsizliyi yüksək səviyyədə təmin edilməlidir”
Sözügedən məsələ ilə bağlı fikirlərini “Bakı-Xəbər”lə bölüşən yol hərəkəti üzrə ekspert Elməddin Muradlının sözlərinə görə, nazirin məsələyə yanaşması tamamilə reallığı özündə əks etdirir: “Həqiqətən də təkcə sürücülərin cərimələnməsi vəziyyətdən çıxış yolu deyil. Ona görə də başlıca olaraq hərəkətin təşkili və təhlükəsizliyi yüksək səviyyədə təmin edilməlidir. Ondan sonra buna qarşı çıxanları cəzalandırmaq lazımdır. Yəni, ilk növbədə, normal şərait yaratmaq, təhlükəsiz mühit formalaşdırmaq lazımdır. Bununla belə, savadlı sürücü formalaşdırmaq lazımdır. Bütün bunlardan sonra sürücülərdən qaydaları tələb etmək olar. Bu gün təəssüflər olsun ki, bizdə yol infrastrukturu tamam başqa vəziyyətdədir. Avtomobil parkımız normal vəziyyətdə deyil. Sürücü kontingenti çox da savadlı deyil. Əksər sürücü yol hərəkəti qaydalarını qismən bilir. Bəzi qaydaları, sadəcə, əzbərləyiblər, mahiyyətini elə də dərk etmirlər. Sürücülərin peşəkarlıq səviyyəsi ilə bağlı müəyyən addımlar atılmalı, işlər görülməlidir. Doğrudan da, cənab nazirin qeyd etdiyi kimi, yanaşma dəyişməlidir. Yəni təkcə cərimə tətbiq etməklə problem həll edilməməlidir. Problem kökündən aradan qaldırılmalıdır. Təhlükəsiz mühitin yaradılması deyilərkən söhbət bundan gedir. Əsas məqsəd və məram bundan ibarət olmalıdır. Problem varsa, onu aradan qaldırmaq lazımdır. Yoxsa, problemdən istifadə edib cərimə tətbiq etmək çıxış yolu deyil. O üzdən, bununla bağlı normal şərait olmalıdır. Eyni zamanda, bu məsələ piyada və sərnişinlərə də aiddir. Ümumilikdə, hərəkət təşkilatçılığı yaxşı və yüksək olmalıdır. Son illər DİN bu istiqamətdə bir sıra addımlar atır. DYP əməkdaşları əsasən hərəkəti tənzimləməklə məşğuldurlar. Ümid edirəm ki, bu istiqamətdə işlər yoluna düşəcək”.
Vidadi ORDAHALLI
