Bakı məktəblərində istilik məsələsi - paytaxtın icra hakimiyyətinin reaksiyası...
Orta ümumtəhsil məktəblərinin istiliklə təchiz olunması üçün dövlət tərəfindən davamlı addımlar atılır. Nəinki Bakıda, hətta bölgələrdə də orta ümumtəhsil məktəblərində müasir tələblərə cavab verən istilik sisteminin qurulmasına nail olunsa da, bəzi məktəblərdə hələ də istiliklə bağlı problem yaşanır.
Valideynlərin şikayətlərinə əsaslansaq, bəzi məktəblərdə istilik ya kökündən yoxdur, ya da istilik sistemi çox zəif işləyir, onun gücü sinif otaqlarını, dəhlizi qızdırmağa çatmır. Hətta özümüz şahidi olmuşuq ki, bəzi məktəblərə valideynlər qızdırıcılar da aparırlar. Əlbəttə, bu hal kütləvi deyil, amma Bakıda lap bir məktəbdə də olsa istilik siteminin işləməməsi çox mənfi haldır və dövlətin bu yöndə apardığı siyasətə ziddir. Nəzərə alsaq ki, məktəblərin çoxunda seçki məntəqəsi quraşdırılıb, bu səbəbdən də istiliyə daha çox tələbat var.
Binəqədi rayonunun Biləcəri qəsəbəsində yerləşən 297 saylı orta ümumtəhsil məktəbində istilik sisteminin işləməməsi həm şagirdlərin, həm də valideynlərin ciddi narazılığına səbəb olub. İstilik sisteminin işləməməsi üzündən uşaqlar soyuq otaqlarda otururlar.
Valideynlər mətbuata bildiriblər ki, yeni il tətili bitdikdən sonra bu məktəbdə istilik sistemi işləmir. “Dəfələrlə bu barədə iradlarımızı bildirmişik. Amma məktəb rəhbərliyi müxtəlif bəhanələrlə vəziyyətdən çıxmağa çalışıb. Vəziyyət isə dözülməzdir” - deyə valideynlərdən biri deyib.
- 297 saylı məktəbin direktoru Nailə Cəfərova: “Qazanxanamızda problem yaranıb və hazırda orada iş gedir”
Məsələ ilə bağlı əvvəlcə Biləcəri qəsəbəsindəki 297 saylı orta ümumtəhsil məktəbi ilə əlaqə saxladıq. Faktı məktəbdən təsdiqlədilər və bildirdilər ki, bir neçə həftədir istilik üzünə həsrət qalıblar. Hadisə ilə bağlı Binəqədi Rayon İcra Hakimiyyətinə, Bakı İstilik İdarəsinə, Bakı Şəhər üzrə Təhsil İdarəsinə və digər aidiyyəti dövlət qurumlarına yazılı və şifahi müraciət edilsə də, hələ də problem öz həllini tapmayıb.
297 saylı məktəbin direktoru Nailə Cəfərova “Bakı-Xəbər”ə bildirdi ki, məktəbin istilik aldığı qazanxanada ciddi problem yarandığı üçün məktəbin istiliklə təchiz edilməsində fasilə yaranıb: “Qazanxanamızda problem yaranıb və hazırda orada iş gedir, istiliyin verilişini bərpa etməyə çalışırlar. Məktəbimizin istilik sistemində yaranan problemi artıq əlaqədar qurumlar nəzarətə götürüb. Fikrimcə, yaxın vaxtlarda məktəbimizə istilik verilişi bərpa ediləcək”.
- BŞTİ: “Problemə səbəb qış dövrünə keçidlə bağlı 297 saylı tam orta məktəbin qazanxanasında təmir işlərinin aparılmasıdır”
Bakı Şəhəri üzrə Təhsil İdarəsindən isə bildirilib ki, 297 saylı orta məktəbdə istilik sistemlərinin işləməməsi məktəbin qazanxanasında aparılan təmir işləri ilə bağlıdır. “Problemə səbəb qış dövrünə keçidlə bağlı 297 saylı tam orta məktəbin qazanxanasında təmir işlərinin aparılmasıdır. Yanvarın 15-dən məktəbin qazanxanasında elektrik şitində yaranmış problemlə əlaqədar müvafiq qaydada müraciət olunub.
Problemin aradan qaldırılması üçün hazırda zəruri tədbirlər görülür. Qısa müddətdə məktəbin istilik təchizatında yaranmış problem aradan qaldırılacaq və tədris ocağı istiliklə təmin olunacaq” - deyə qurumdan bildirilib.
- Binəqədi Rayon İH: “Məktəblər Təhsil İdarəsinin nəzdində olduğu üçün, məktəblərin istiliklə təmin olunması, eləcə də digər məsələlərə bu qurum baxır”
Binəqədi Rayon İcra Hakimiyyətinin ictimaiyyətlə əlaqələr şöbəsindən “Bakı-Xəbər”in sorğusuna cavab olaraq bildirdilər ki, məktəblər Bakı Şəhər üzrə Təhsil İdarəsinin nəzdindədir: “Məktəblər Təhsil İdarəsinin nəzdində olduğu üçün, məktəblərin istiliklə təmin olunması, eləcə də digər məsələlərə bu qurum baxır. Bizim də bu probemlə bağlı məlumatımız var, Bakı Şəhər üzrə Təhsil İdarəsi də olaydan xəbərdardır. Problemin hansı şəkildə həll olunması ilə bağlı qərarı Təhsil İdarəsi verir” - deyə bildirdilər.
Şöbədən, həmçinin, qeyd etdilər ki, problemin yaxın zamanda həllinə ümid edirlər.
Qeyd edək ki, bir qrup valideyn Nəsimi rayonu 266 saylı orta ümumtəhsil məktəbində də istilik sisteminin qənaətbəxş olmadığını, hətta bəzi sinifləri qızdırıcı ilə qızdırdığını bildirir.
- 266 saylı məktəb: “Problem tam olaraq öz həllini tapıb”
266 saylı orta məktəblə də əlaqə saxladıq. Məktəbdən bildirdilər ki, məktəbdə istilik sistemində yaranan problem həll olunub və artıq bu sahədə heç bir çətinlik yoxdur: “Məktəbimizin istilik sistemində probelm yaranmışdı. İstilik var idi, amma çox zəif idi, ona görə də sinifləri qızdırmaq çətin idi. İndi isə problem tam olaraq öz həllini tapıb” - deyə məktəbdən bildirdilər.
İradə SARIYEVA
