Artıq bir neçə gündür böyük əksəriyyəti gənc ailələr olmaqla bir çoxunun səbrsizliklə gözlədiyi kirayə evlərlə bağlı qaranlıq qalan bəzi suallara aydınlıq gətirilib. Yanvarın 22-dən etibarən bu mənzillərin satışa çıxarılacağı açıqlandı, lakin qiymətlərlə bağlı əsas gözləntilər özünü doğrultmadı.
Məlumat üçün bildirək ki, Azərbaycan Respublikasının İpoteka və Kredit Zəmanət Fondu kirayə evlərin siyahısını açıqlayıb. Fondun yaydığı məlumatda qeyd olunur ki, bu mənzillərin 208-i Bakı şəhərinin Nizami rayonu M.Abbasov küçəsində ("Neftçilər" və "Qara Qarayev" metrostansiyaları ətrafında), 40-ı Bakı şəhəri Xətai rayonu, Gəncə prospektində, 58-i Abşeron rayonu, Xırdalan şəhəri 21-ci məhəllədə, 25-i isə Sumqayıt şəhəri Sülh küçəsində yerləşir.
Onu da qeyd edək ki, kirayə mənzillərin qiyməti də açıqlanıb. Maraqlı məqam ondan ibarətdir ki, Bakının müxtəlif ərazilərində, Xırdalan və Sumqayıt şəhərində də qiymət eynidir. Məlumat üçün bildirək ki, kirayə evlər layihəsi üçün satışa çıxarılan mənzillərin bir kvadratmetrinin qiyməti 1 850 manat ətrafında dəyişir. Yəni Xətai rayonunun Gəncə prospektində sahəsi 96.7 kvadratmetr olan mənzilin satış qiyməti 178.1 min manatdır. Bu isə o deməkdir ki, mənzilin bir kvadratmetrinin qiyməti 1 841 manata başa gələcək. Belə mənzili 25 illik, yəni 300 aylıq müqavilə ilə kirayə götürmək üçün aylıq ödəniş haqqı 594 manat, ilkin ödəniş isə 7 122 manat təşkil edəcək.
Ərazidən asılı olmayaraq, kirayə mənzillərin satış qiymətinin məbləği əhali arasında narazılıq yaradıb.
Ramil Osmanlı: “Müxtəlif ərazilərdə yerləşən mənzillərin hamısının kvadratmetrinin qiymətinin eyni olması absurddur”
Əmlak məsələləri üzrə ekspert Ramil Osmanlı bildirdi ki, Fond qiymətləndirici təşkilatlardan mənzillərin dəyəri ilə bağlı rəqəmlər alıb: “Həmin rəqəmlər ümumiləşdirilərək qiymətlər açıqlanacaq. Kirayə mənzillər Fondun istiqrazları hesabına alınacaq. Fond illik üç faiz dərəcəsini də qiymətlərə daxil edib. Kirayə mənzillərin kvadratmetrinin hər yerdə eyni məbləğdə olması ilə bağlı yayılan məlumatlar sual doğurur. Hər yerdə qiymətlər, məsələn, mənzilin kvadratmetri 1800 manat ola bilməz. Ona görə ki, burada müxtəlif ərazilərdə yerləşən mənzillərdən söhbət gedir. Müxtəlif ərazilərdə yerləşən mənzillərin hamısının kvadratmetrinin qiymətinin eyni olması absurddur. Bilirəm ki, Fondda daşınmaz əmlakla bağlı kifayət qədər peşəkar şəxs var. Ola bilər ki, bəzi ərazilərdə mənzil baha olsun, bu da normaldır”.
Natiq Cəfərli: “Kirayə evlər layihəsi ilə mənzil sahibi olmaq istəyənlər yetərincədir, lakin bu gözləntilər özünü doğrultmadı”
İqtisadçı-ekspert Natiq Cəfərli bildirdi ki, kirayə evlərlə bağlı bu layihəyə tələbat yüksək olsa da, təklif, yəni mənzillərin sayının az olması heç də müsbət olmayan bir tendensiyadır: "Kirayə evlər layihəsi ilə mənzil sahibi olmaq istəyənlər yetərincədir. Lakin bu gözləntilər özünü doğrultmadı. Çünki bu layihəni sosial layihə kimi dəyərləndirmək olmaz. Qiymətlərin yüksək olması da mənfi tendensiyalardan biridir".
Həmsöhbətimiz onu da əlavə etdi ki, şəhərin mərkəzi və nisbətən kənar yerlərdə, məsələn, Xırdalanda mənzillərin qiymətinin eyni olması xoş olmayan bir haldır. Əslində, bu mənzillərin faizsiz olduğu söylənilirdi. Lakin qiymətlərin yüksək olması bu fikirləri də alt-üst edib. Görünən budur ki, standart qiymətlər müəyyənləşdirilsə də, faiz öncədən bu qiymətlərin üzərinə hesablanıb. Sadəcə olaraq faizsiz kirayə evlər deyərək bunu bir söz oyununa çeviriblər.
Günel CƏLİLOVA
