19/02/2020 15:27
728 x 90

Qaz sayğaclarının oğurlanması ilə xüsusi məşğul olanlar var – məlumatı “Azəriqaz” rəsmisi də təsdiqləyir

Ceyhun Səfərov: “Sayğac oğruları arasında “Azəriqaz”ın sabiq əməkdaşları da ola bilər”

img

Bakıda və bölgələrdə sayğac oğrularının olduğu və naməlum şəxslər tərəfindən vətəndaşların mənzillərinə oğurluq sayğaclar quraşdırıldığı haqda cəmiyyətdə söz-söhbətlər dolaşırdı. Bəziləri bunu şayiə saysa da, son dövrlər bu səpkidə baş verən bir neçə hadisə baş verənlərin həqiqət olduğunu təsdiqləyir.

Belə ki, bəzi vətəndaşların mənzillərinə quraşdırılan sayğaclar oğurluq olub və həmin sayğaclar “Azəriqaz”a aidiyyəti olmayan şəxslər tərəfindən quraşdırılıb. Qeyd edək ki, bu tip hadisələr daha çox şəhər mərkəzindən uzaq kənd və qəsəbələrdə baş verdiyi üçün, elə də diqqəti cəlb etmir.  

Bakıda oğurluq qaz sayğacları quraşdırılması faktını təsdiqləyən “Azəriqaz” vətəndaşlara rəsmi xəbərdarlıq edir ki, bu halla rastlaşan abonentlər bununla bağlı adıçəkilən quruma müraciət etsinlər. 

“Azəriqaz” İstehsalat Birliyinin İctimaiyyətlə əlaqələr şöbəsinin yaydığı məlumatda qeyd olunur ki, bəzi işbazlar smart tipli sayğacları oğurlayıb, əhalinin az yaşadığı ərazilərdə satırlar: “Bir müddət əvvəl İB-nin Bakı Regional Qazın Satışı Departamentinin əməkdaşları tərəfindən NZS qəsəbəsində smart tipli qaz sayğaclarının olmaması aşkarlandı. Araşdırma aparıldı və məlum oldu ki, o sayğaclar orada hansısa işbazlar tərəfindən quraşdırılıb.

Onlar başqa ərazidən sayğacları oğurlayıb, burada quraşdırıblar. İşbazlar sayğaclara müdaxilə edib, insanlar qazdan istifadə ediblər. Hər ay gəlib, vətəndaşdan razılaşdığı məbləği alıblar. İnsanları hər dəfə bir bəhanə ilə aldadıblar ki, yaxın vaxtda kartınızı verəcəyik. Nəticədə vətəndaşa kart verilməyib.

Çünki hər bir sayğaca görə abonentə bir kart kodlaşdırılır. Belə hal aşkarlanandan sonra əraziyə müdaxilə etdik. Araşdırma aparılarkən müəyyən faktlar üzə çıxdı. Sayğacın hər birinin mərkəzi bazada öz kodu, nömrəsi var. Bu sayğacların bir qismi vaxtilə ayrı-ayrı ünvanlardan oğurlanan smart tipli qaz sayğacıdır. Onları aldatmağa çalışan işbazlar olarsa, o zaman hüquq-mühafizə orqanlarına məlumat versinlər. Bu yaxınlarda bu tip qaz sayğacı oğruları cinayət məsuliyyətinə cəlb edildilər. Qaz sayğacını oğurlayan Suraxanı və Nəsimi rayon sakinləri üç il müddətinə azadlıqdan məhrum olundular.

Bu insanlar 2018-2019-cu illərdə üç qəsəbədə - Qala, Şüvəlan,Türkanda yerləşən evlərdən 93 qaz sayğacı oğurlayıblar. Hesab edirik ki, belə halların ifşa olunması bu işlə məşğul olanların fikrində dönüş yaradacaq”.

Maraqlıdır, bir abonentin adına qeydiyyatda olan, nömrəsi olan bir qaz sayğacının başqa bir vətəndaşa aid ünvanda yerləşdirilməsi necə baş verə bilir? Vətəndaşların sayğacını oğurlayanlar kimlərdir? Qaz sayğacına aid smart kart olmadan sayğaca qazı necə yükləmək olar?

  • “...həmin sayğaca qaz gəlməsi üçün hansısa bir yolla müdaxilə edə bilirlər”

Suallarımıza cavab tapmaq məqsədilə “Azəriqaz” İstehsalat Birliyinin İctimaiyyətlə əlaqələr şöbəsinin rəisi Ceyhun Səfərovla əlaqə saxladıq. O, “Bakı-Xəbər”ə bildirdi ki, son iki ildə baş verən qaz sayğacı oğurluğu faktları artıq “Azəriqaz”ı bu istiqamətdə tədbir görməyə vadar edib: “Məsələ burasındadır ki, sayğac oğrusu olan işbazlar həmin sayğacı başqa abonentin mənzilində qoyarkən həmin sayğaca qaz gəlməsi üçün hansısa bir yolla müdaxilə edə bilirlər. Onlar kimlərdirsə bu sayğaclara müdaxilə etməyi bacarırlar. İşbazlar sayğaca müdaxilə edərək müvəqqəti olaraq onun kartsız istifadəsini təmin edirlər. Qaz gəlmədikdə isə vətəndaş onlardan bir neçə dəfə kart tələb edir, alınmadıqda burada hər hansı bir müəmmalı məsələ olduğunu anlayır və “Azəriqaz”ın 104 xidmətinə müraciət edir. Bu müraciətlərin əsasında hadisədən xəbərimiz olur. Gedib ünvana baxırıq ki, sayğac başqasına aiddir və onu oğurlayaraq quraşdırıblar, nəticədə də vətəndaş aldadılıb”.

Dövlət büdcəsinə və vətəndaşlara maddi zərər vuran sayğac oğrularının, işbazlarının əməlləri ilə bağlı “Azəriqaz”ın hər hansı bir tədbir görəcəyinə gəlincə, C.Səfərov qeyd etdi ki, qurum artıq bununla bağlı materialları toplayır: “Biz hazırda sayğac oğurluğu ilə bağlı materialları toplayırıq və həmin materialları hüquq-mühafizə orqanlarına təqdim edəcəyik. Çünki bizim özümüzün birbaşa inzibati tədbir görmək, cərimə tətbiq etmək səlahiyyətimiz yoxdur, biz ancaq məhkəmə qarşısında itirilmiş qazın bərpası üçün iddia qaldıra bilirik. İlk dəfədir ki, belə hal olub və biz artıq bu məsələni qabardırıq. Son iki ildə baş verən faktları bir yerə toplayırıq və mətbuata da açıqlamalar veririk. Keçən ilin sonunda sayğac oğurluğuna görə iki nəfər həbs edilib. Sayğac oğurluğuna görə həbs edilən 2 nəfər iki il müddətində 93 sayğac oğurlamışdı. Sayğac oğurluğuna görə şübhələndiyimiz şəxslər də var. Ehtimal edirik ki, sayğac oğruları arasında “Azəriqaz”ın sabiq əməkdaşları da ola bilər. Bizim bununla bağlı ehtimallarımız var və bütün faktları hüquq-mühafizə orqanlarına təqdim edəcəyik”.

Günel CƏLİLOVA

Son xəbərlər