Yayılan məlumatlara görə, Azərbaycanda qan xərçəngindən əziyyət çəkən yüzlərlə leykemiyalı uşaq dövlət tərəfindən verilən dərmanları ala bilmir. Səbəb kimi B.Ə.Eyvazov adına Elmi-Tədqiqat Hematologiya və Transfuziologiya İnstitutunda (Qanköçürmə İnstitutu) müalicə alan xəstələrə verilən “Vincristine” tərkibli “Vinkristin” adlı və “Merkaptopturin” tərkibli “Merpurin” dərmanlarının depoda olmaması qeyd olunur.
Ancaq maraqlı məqam ondan ibarətdir ki, adıçəkilən dərmanların bəzisi aptekdə satılır. Lakin həmin dərmanların satış qiyməti olduqca bahadır.
Mehriban Bağırova: “Uşaqların dərmanla təminatında vəziyyət olduqca acınacaqlıdır”
Leykemiya ilə mübarizə İctimai Birliyinin direktoru Mehriban Bağırova bildirdi ki, uşaqların dərmanla təminatında vəziyyət olduqca acınacaqlıdır: “Merpurin” adlı dərmanı leykemiyalı uşaq hər gün qəbul etməlidir, amma yoxdur. 1-2 aydır vəziyyət belədir. Dərmanları Səhiyyə Nazirliyinin İnnovasiya Mərkəzi alır, Hemotologiya İnstitutuna verirdi. İndi bir çox tibbi müəssisənin TƏBİB-ə verilməsi ilə əlaqədar struktur dəyişikliyi getdiyindən, ya icbari tibbi sığortaya keçidlə bağlıdır, ya bu dərmanları ölkəyə gətirən şirkət daha gətirmir, dəqiq bir səbəb deyilmədən, tapılmadan dərmanlar yoxa çıxıb.
Valideynlər çox çarəsiz qalıblar. Biz xeyriyyə aksiyaları ilə çağırış edib, gücümüz çatandan pul yığıb, dərman almağa, tapmağa çalışırıq.
Məlumat üçün bildirim ki, vinkristin dərmanı aptekdə 265 manatdır. Bunu kasıb, imkansız, övladı xəstə ana necə alsın? Qan xərçəngi elə ağır xəstəlikdir ki, bir gün müalicə dayansa, uşaqların vəziyyəti pisləşər, remissiyada olan uşaqlara yenidən xəstəlik qayıda bilər. Bu da həm uşaqların, həm həkim və valideynlərin bu günə kimi çəkdiyi əziyyəti heçə endirər”.
Rəvanə Əliyeva: “İlin əvvəlidir və lazımi dərmanlar sifariş edilib”
Tibbi Ərazi Bölmələrini İdarəetmə Birliyinin (TƏBİB) mətbuat katibi Rəvanə Əliyeva isə qeyd etdi ki, o, bundan xəbərdardır: “Məlum olduğu kimi, Prezident İlham Əliyev Milli Hematologiya və Transfuziologiya Mərkəzinin yaradılması haqqında Fərman imzalayıb. Fərmana əsasən, Azərbaycan Respublikası Səhiyyə Nazirliyinin tabeliyində olan Talassemiya Mərkəzi publik hüquqi şəxsin və B.Ə.Eyvazov adına Elmi-Tədqiqat Hematologiya və Transfuziologiya İnstitutunun birləşmə formasında yenidən təşkili yolu ilə TƏBİB-in tabeliyində publik hüquqi şəxs statuslu Milli Hematologiya və Transfuziologiya Mərkəzi yaradılıb. Bununla əlaqədar hazırda qurumda təhvil-təslim prosesi gedir. Dərmanlarla bağlı problemin həlli üçün isə maksimum çalışılır. İlin əvvəlidir və lazımi dərmanlar sifariş edilib. Qısa müddət ərzində müalicə alan xəstələr dərmanlarla təchiz olunacaqlar. Onu da bildirim ki, mərkəzdə təchizat bu il yüksək səviyyədə təşkil olunacaq”.
Günel CƏLİLOVA
