24/02/2020 11:49
728 x 90

Dövlət Komitəsinin təqdim etdiyi “Liderliyin inkişafı proqramı”nda kimlər iştirak edə bilər...

img

2019-cu ilin sonlarından həyata keçirilməyə başlayan Diasporla İş üzrə Dövlət Komitəsinin “Liderliyin inkişafı proqramı” çərçivəsində Azərbaycanın təbliği əsas hədəf olaraq seçilib və proqrama cəlb edilən iştirakçılar ölkəmizlə bağlı təbliğat işlərinin həyata keçirilməsində maraqlı olan şəxslərdir. Ötən ilin sonlarında Diasporla İş üzrə Dövlət Komitəsinin sədri Fuad Muradov diaspor nümayəndələri ilə görüşüb və proqramın mahiyyəti, hədəfləri barədə geniş müzakirələr aparmışdı.

Bundan əlavə, komitə sədri F.Muradov “Liderliyin inkişafı proqramı” ilə bağlı “Real” TV-yə müsahibəsində bildirmişdi ki, komitə proqram iştirakçılarının cəsarətlə Azərbaycanı təbliğ etmələrini istəyir. O, layihənin məqsəd və məramını izah edərkən vurğulayıb ki, “Liderliyin inkişafı proqramı”nda iştirak edən şəxslər əksər qurumlarla görüşlər keçiriblər və bu görüşlər nəticəsində onlar Azərbaycanla bağlı ideoloji, siyasi, innovativ baxımdan maraqlı məlumatlar əldə ediblər və bu məlumatlar əsasında da onların ölkəmizi cəsarətlə təbliğ etməsi əsas məqsəddir.

Komitənin mətbuat xidmətinin rəhbəri Vəsilə Vahidqızı “Bakı-Xəbər”ə bildirdi ki, Diasporla İş üzrə Dövlət Komitəsində müxtəlif ölkələrdən Azərbaycana gəlmiş diaspor nümayəndələri Dövlət Komitəsi tərəfindən həyata keçirilən “Liderliyin inkişafı proqramı”nın iştirakçıları olaraq proqramın əhəmiyyətini qeyd ediblər. Dövlət Komitəsi tərəfindən həyata keçirilən “Liderliyin inkişafı proqramı”nın iştirakçıları - Fransada və beynəlxalq miqyasda hüquq və vergi məsələləri üzrə xidmətlər təklif edən “LEXLOR” beynəlxalq hüquq şirkətinin rəhbəri və təsisçi partnyoru Edmond Verdier, Türkiyədə fəaliyyət göstərən “Edison” hüquq bürosunun sədri Ruslan Edison, Almaniyada miqrasiya və qaçqın məsələləri üzrə ictimai fəaliyyətlə məşğul olan Nurlan Məmmədov, Ukraynadakı “Riç-İnter Qrup” Açıq Səhmdar Cəmiyyətinin baş direktoru Murad Cəfərov, Gürcüstan Azərbaycanlılarının İnteqrasiya Mərkəzinin İdarə Heyətinin sədri Murad Muradov təmsil olunublar.

Komitə sədri Fuad Muradov ölkəmizin uğurlu diaspor siyasəti barədə məlumat verib, diaspor nümayəndələri ilə dövlət qurumları arasında əlaqələrin qurulması və əməkdaşlığın əhəmiyyətindən danışıb.

Liderlik proqramı sahəsində beynəlxalq təcrübənin öyrənilməsi, icma işinin təşkili, xaricdəki potensialın müəyyən olunması, icma lideri olmağın əhəmiyyəti, gənc liderlərin daha da fəallaşdırılması və s. kimi məsələlər ətrafında fikir mübadiləsi aparılıb.

Diaspor nümayəndələri öz fəaliyyətləri barədə məlumat verib, “Liderliyin İnkişafı Proqramı”nı və ümumiyyətlə, komitənin fəaliyyət prinsiplərini müəyyən edən Strateji Yol Xəritəsini yüksək qiymətləndirdiklərini qeyd ediblər.

Gürcüstan Azərbaycanlılarının İnteqrasiya Mərkəzinin İdarə Heyətinin sədri Murad Muradov “Liderliyin İkişafı Proqramı” haqqında bunları deyib: “Liderliyin İkişafı Proqramı”nın ən müsbət tərəfi və bizə qazandırdığı şey Azərbaycan Respublikasının dövlət qurumları ilə bizim tanışlığımız, onlarla birbaşa əlaqələrin qurulması perspektivi, öz təklif və fikirlərimizi birbaşa nazirlərə, rəhbər şəxslərə ünvanlama imkanları idi. Bununla yanaşı, Azərbaycanda həyata keçirilən islahatları öz gözlərimizlə görmək idi. Gənc, savadlı, novator, perspektivli gəncləri yüksək vəzifələrdə görmək, onların insanlarla rəftarı, əlçatmaz məmur stereotiplərinin qırılması, işlərinə məsuliyyətli yanaşmaları, yenilikçi ideyaları, Azərbaycanın inkişafı üçün əllərindən gələn hər şeyi etmələrini görmək bizləri sevindirir və qürurlandırır”.

Türkiyədə fəaliyyət göstərən “Edison” hüquq bürosunun sədri Ruslan Edison və Almaniyada miqrasiya və qaçqın məsələləri üzrə ictimai fəaliyyətlə məşğul olan Nurlan Məmmədovun  “Liderliyin İkişafı Proqramı” haqqında fikirləri isə belədir: “Layihədən hər birimiz, həm iştirakçılar, həm də dövlət strukturları faydalandı. Hər bir tanışlıq yeni bir addım sayıla bilər və hər bir addım Azərbaycan dövləti üçün, sadəcə, qazanc ola bilər. İştirakçılar diaspor adına dövlət və xalq üçün çalışmaq istəyənlərdir... Yüksək vəzifəli şəxslərlə görüşlər Avropa standartlarına uyğun keçirildi. Ölkədə islahatların aparıldığı və inkişaf hiss olunur. “ASAN xidmət” məni çox təəccübləndirdi. Bu xidmət bir çox Avropa ölkəsinə örnək ola biləcək xidmətdir. Yumşaq atmosferli, yüksək kadrlarla təmsil olunan Prezident Aparatı, Milli Məclis, Miqarasiya Xidməti ilə tanış olduq. Prezident Aparatında aparılan səmimi söhbətlər xaricdə yaşayan azərbaycanlılara ciddi münasibət

olduğunu göstərdi. Burada gələcək planlar və qarşılıqlı əməkdaşlıqda dəstək olacaqlarını bildirmələri bizim üçün çox maraqlı oldu. Layihə çox mühüm oldu.

Bir çox layihə üzərində işləyirik və onların reallaşacağına ümid edirik. Arzu edərdim ki, proqramda gələcəkdə seminarlar nəzərdə tutulsun. İlk liderlərlə irəlidə davamlı əməkdaşlıq və birlikdə görüşlərin keçirilməsini arzu edərdim. Yeni proqramlarda Azərbaycan tarixinə yer ayrılması yaxşı olardı. Qarabağ mövzusunda məlumatlandırma olsun.

Yaxşı olardı ki, Səhiyyə Nazirliyində görüşlər də təşkil olunsun. Layihə üçün komitəyə təşəkkür edirik” - deyə hər iki iştirakçı bildirib.

İradə SARIYEVA

Son xəbərlər