24/02/2020 13:03
728 x 90

Qaz smart-kartlarında yeni maxinasiyalar – “Azəriqaz” abonentdən xəbərsiz karta pul qoyur, deyəcəksiniz bunun nəyi pisdir, ancaq...

Ceyhun Səfərov: “Proqram təminatında problem olduğu üçün kartlarda yalançı məbləğlər görünür”

img

Son günlər bəzi “Azəriqaz” abonentləri balansı artırmaq üçün kartlarına pul yükləmək istəyərkən problemlə üzləşirlər. Məsələ ondadır ki, abonent karta pul yükləmədiyi halda, smart-kartda müəyyən məbləğin görünməsi balansı artırmağa imkan vermir. Çünki kart boş olduqda ona vəsait yükləmək olur. Vətəndaş təzədən kartı sayğaca qoşanda məlum olur ki, kartda vəsait yoxdur. Beləcə, kartda yalançı məbləğlər göründüyü üçün, vətəndaşlar ödəniş apara bilmirlər.

Smart-kartda yalançı məbləğ göründüyü üçün vətəndaş ya sayğacla ödəmə terminalı arasında bir neçə əməliyyatı icra etdikdən sonra karta pul yükləyə bilər, ya da "ASAN Kommunal" mərkəzlərinə gedərək kartı sıfırlada bilər. Bu isə, təbii ki, abonentlər tərəfindən haqlı olaraq narazılıqla qarşılanır. Çünki bunu heç də hamı bilmir. Başqa bir tərəfdən, belə problemlər vətəndaşların vaxt itkisinə səbəb olur. Problem həm də ondadır ki, belə halların sayı artıb.

Digər tərəfdən, ötən ilin son həftələrində bir sıra vətəndaşlar bu problem üzündən əvvəlki qaz limitlərini belə karta yükləyə bilməyiblər. Bununla bağlı çoxsaylı fakt var. Qeyd edək ki, əhali qrupu üzrə istehlak olunan təbii qazın illik həcminin 2 200 kubmetr olan hissəsinin dəyəri 10 qəpiklə, 2 200 kubmetrdən artıq istifadə olunan hər kubmetr qazın dəyəri isə 20 qəpiklə hesablanır. Hər il yanvarın 1-dən limit yenilənir.

Maraqlıdır, smart-kartlarda yalançı məbləğlər necə yaranır?

  • “Bununla bağlı biz Fransa şirkəti ilə müzakirələr aparacağıq”

Məsələ ilə bağlı “Azəriqaz” İstehsalat Birliyinin Mətbuat xidmətinin rəhbəri Ceyhun Səfərovla əlaqə saxladıq. O, “Bakı-Xəbər”ə açıqlamasında sözügedən problemin proqram təminatı ilə bağlı olduğunu bildirdi: “Belə bir problemin olması bizə də məlumdur. Problem ondadır ki, kartlarda yalançı məbləğlər görünür. Bunun yaranma səbəbi proqram təminatı ilə bağlıdır. Proqram təminatında problem olduğu üçün, kartlarda yalançı məbləğlər görünür. Bu səbəbdən kartlarda belə problemlər yaranır. “Smart-kart” tipli sayğaclar Fransanın “İtron” şirkətinin istehsalıdır. Sözügedən şirkətin təmsilçilərini ölkəyə dəvət etmişik ki, yaranan bu texniki problemi aradan qaldırsınlar. Bununla bağlı biz Fransa şirkəti ilə müzakirələr aparacağıq. Proqram təminatında olan bu problemlər aradan qaldırıldıqdan sonra məsələ həllini tapacaq. Hazırkı vəziyyətdə smart kartlarda görünən bu yalançı məbləğlərin silinməsi üçün abonent "ASAN Kommunal" mərkəzlərinə müraciət edə bilər. Həmin mərkəzlərdə yalançı məbləğlər dərhal kartın yaddaşından silinir. Ondan sonra əvvəlki qaydada kartdan istifadə etmək mümkün olur”.

Vidadi ORDAHALLI

Son xəbərlər