25/02/2020 03:45
728 x 90

Ölkədə MTK-ların bir mənzili çox müştəriyə satmaq cinayətlərinin kökü hələ kəsilməyibmiş...

Nüsrət İbrahimov: “Belə cinayətlərin qarşısını almaq üçün əmlak alqı-satqısı ilə bağlı işlək mexanizm yaradılmalıdır”

img

Xəbər verildiyi kimi, Baş prokuror yanında Korrupsiyaya qarşı Mübarizə Baş İdarəsi və Korrupsiyaya qarşı mübarizə üzrə Komissiya tərəfindən ölkəmizdə korrupsiyaya qarşı mübarizə sahəsində 2019-cu il ərzində görülmüş işlər və qarşıda duran vəzifələrlə bağlı kütləvi informasiya vasitələri və qeyri-hökumət təşkilatları nümayəndələrinin iştirakı ilə mətbuat konfransı keçirilib.

Konfransda bir sıra məsələlərə toxunulub. Baş prokurorun müavini - Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev bildirib ki, 2019-ci il ərzində Baş İdarədə 497 şəxs barəsində 310 cinayət işinin istintaqı tamamlanaraq baxılması üçün aidiyyəti məhkəmələrə göndərilib.

Bununla yanaşı, tədbirdə o da məlum olub ki, mənzil-tikinti kooperativlərinin vəzifəli şəxsləri və onlarla cinayət əlaqəsinə girmiş digər şəxslər tərəfindən ayrı-ayrı vətəndaşlara satılmış mənzilləri təkrar satmaqla dələduzluq yolu ilə özgələrinə məxsus külli miqdarda pul vəsaitlərinin ələ keçirilməsi faktları üzrə vurulmuş maddi ziyanın ödənilməsinin təmin edilməsi üçün aidiyyəti dövlət qurumları ilə birgə tədbirlər görülüb.

Belə görünür ki, mənzil tikintisi ilə məşğul olan MTK-lar hələ də bu cür dələduz əməllərlə məşğul olurlar. Yəni bir mənzil bir neçə nəfərə satılır və nəticədə vətəndaşlar aldadılır. Onu da qeyd edək ki, bir neçə il əvvəl belə cinayət hallarının sayı daha çox idi. Xeyli sayda mənzil alan belə dələduzluqlarla üzləşib. Bütün bunların başında da MTK-lara rəhbərlik edən şəxslər dayanır. Görülən tədbirlər nəticəsində, əvvəlki illərə baxanda bu cür halların sayı azalıb. Ancaq bəlli olur ki, hələ də bəzi MTK-larda belə cinayətlərə rast gəlinir. Baxmayaraq ki, mənzil tikintisi və alqı-satqısı ilə bağlı boşluqlar aradan qaldırılıb, əvvəlki kimi bu sahədə xaotik vəziyyət yoxdur. Bütün hallarda, bir mənzilin bir neçə nəfərə satılması kimi cinayətlərin kökünü necə kəsmək olar?

  • “Yalnız o zaman bəzi MTK rəhbərləri cinayət yolu ilə bir mənzili bir neçə nəfərə sata bilməz”

Məsələyə münasibət bildirən əmlak məsələləri üzrə ekspert Nüsrət İbrahimovun sözlərinə görə, belə cinayətlərin qarşısını almaq üçün əmlak alqı-satqısı ilə bağlı işlək mexanizm yaradılmalıdır: “Bununla bağlı müvafiq qanunlarda dəyişiklik edilməli və bunun işlək mexanizmi yaradılmalıdır. Bir ara parlamentdə Mülki Məcəlləyə dəyişikliklə bağlı məsələyə baxıldı, amma, nədənsə, onun işlək mexanizmi yenidən formalaşdırılmadı. Bir növ, sözügedən məsələ yarımçıq qaldı. Deməyim odur ki, bütün bunlar tam həll edilməlidir ki, əmlak satışındakı boşluqlardan “iş adamları” istifadə edə bilməsinlər. Belə olsa, o zaman bəzi MTK rəhbərləri cinayət yolu ilə bir mənzili bir neçə nəfərə sata bilməz. Hesab edirəm ki, bunun yeganə həlli budur. Ancaq nəzərə almaq lazımdır ki, son üç ildə belə dələduzluqların sayı azala-azala gedir. Lakin buna baxmayaraq, yenə də az da olsa, bazarda belə hallara rast gəlinir. Bununla belə, yeni tikililərin hamısı reyestrə düşməlidir. Həm Şəhərsalma və Arxitektura Komitəsinin reyestrinə, həm də Əmlak Məsələləri üzrə Komitənin reyestrinə. Bundan sonra binanın ilkin qeydiyyat sənədi alınır. Ondan sonra mənzillər satılarkən hər bir kəslə ayrıca notarial qaydada alqı-satqı edilməlidir. Yoxsa, bunun başqa variantı olsa, o zaman hər cür əyinti, neqativ hal baş verə bilər. O üzdən, bütün tikinti şirkətləri buna əməl etməlidirlər”.

Vidadi ORDAHALLI

Son xəbərlər