24/02/2020 13:17
728 x 90

Regionların da avtobus təsərrüfatının yeniləşdirilməsi Prezidentin gündəliyinə düşdü - Gəncə...

img

Ölkəmizdə ictimai nəqliyyat infrastrukturunun, təsərrüfatının yenidən qurulması, bu istiqamətdə mövcud olan problemlərin tam olaraq aradan qaldırılması üçün dövlət tərəfindən tədbirlər həyata keçirilir. Amma indiyə qədər bu sahədə görülən işlər problemin tamamilə aradan qaldırılması üçün yetərli olmayıb.

Ölkənin, xüsusən də regionların nəqliyyat təsərrüfatının yenidən qurulması zərurəti aktuallaşıb. 

Prezident İlham Əliyev Nəqliyyat, Rabitə və Yüksək Texnologiyalar naziri Ramin Quluzadəni qəbul edərkən ictimai nəqliyyat təsərrüfatında mövcud olan problemdən danışıb və onların həlli üçün nazirə göstəriş verib. “...Hələ də Bakı şəhərində keyfiyyəti yüksək olmayan və istismar müddəti bitmiş avtobuslar fəaliyyət göstərir. Mənə verilən məlumata görə, Gəncə şəhərində avtobus təsərrüfatı köhnəlib. Digər şəhərlərdə nə qədər avtobus fəaliyyətdədir, nə qədər avtobus alınmalıdır? Əlbəttə ki, ilk növbədə, paytaxt Bakının bu məsələsi həll olunmalıdır. Amma digər şəhərlər də diqqətdən kənarda qalmamalıdır” - deyə ölkə başçısı qeyd edib.

  • Azər Allahverənov: “Gəncədə və digər şəhərlərdə avtobus təsərrüfatının inkişafına nail olmaq üçün Bakı modelinin tətbiq edilməsi...”

Nəqliyyat sahəsi üzrə ekspert Azər Allahverənov “Bakı-Xəbər”ə bildirdi ki, ölkənin ictimai nəqliyyat təsərrüfatının daha da inkişaf etdirilməsi vacibdir. “Nəqliyyat sahəsində vacib seqment ictimai nəqliyyat sektorunun və onun komponentlərinin təkmilləşdirilməsi məsələsidir. Məlumdur ki, bu gün paytaxt Bakıda ictimai nəqliyyat sektoru təkmilləşir. Bunun da başlıca səbəbi paytaxtda avtobus parkının yenilənməsi prosesinin həyata keçirilməsidir. Təbii ki, bu istiqamətdə işlər hələ də davam etdirilməkdədir. Ölkə başçısı İlham Əliyev  Nəqliyyat, Rabitə və Yüksək Texnologiyalar naziri Ramin Quluzadəni qəbul edərkən bu məsələyə toxundu. Bu il ərzində müasir tələblərə cavab verən 300 avtobusun ölkəyə gətirilməsu məsələsi də qeyd edildi. Bu avtobusların ölkəyə gətirilməsində başlıca məqsəd ictimai nəqliyyat sektorunda sərnişindaşımanın xidmət keyfiyyətinin artırılması məsələsidir. Bunun üçün də müasir tipli avtobuslar ölkə ərazisinə gətirilir, avtobus parkı yenilənir, avtobus təsərrüfatını idarə edən kadr potensialı gücləndirilir. Bakı Nəqliyyat Agentliyinin nəzdində bu istiqamətdə təlim-tədris mərkəzi fəaliyyət göstərir. Müntəzəm olaraq avtobus sürücüləri təlim kurslarına cəlb olunurlar. Yəni Bakı şəhərində bu istiqamətdə həyata keçirilən siyasət müəyyən mənada mövcud bir strategiyanın olmasından xəbər verir. Konkret olaraq Bakıda ictimai nəqliyyat sektorunun inkişaf etdirilməsi modeli mövcuddur. Düşünürəm ki, bölgələrdə də ictimai nəqliyyat sektorunun inkişaf etdirilməsi modeli olmalıdır. Bölgələrin, xüsusən də Gəncə şəhərinin köhnələn avtobus təsərrüfatının yenidən qurulması üçün bir sıra işlərin görülməsi vacibdir. Hesab edirəm ki, Bakı şəhərində görülən işlərin, bütövlükdə, təkmilləşdirmə modelinin həm də Gəncədə, eyni zamanda, digər şəhərlərdə həyata keçirilməsinə, tətbiqinə ehtiyac var”.

Amma bu məsələdə bir xüsusi nüans olduğunu qeyd edən A.Allahverənovun sözlərinə görə, bölgələrdən fərqli olaraq, Bakıda bir sıra daşıyıcı şirkətlər var ki, onlar bu missiyanı yerinə yetirirlər. O hesab edir ki, avtobus təsərrüfatının, parkının yenilənməsi həmin o daşıyıcı şirkətlərin bu sahəyə sərmayələr yatırtması və daxil etməsi nəticəsində baş verir. “Düzdür, bu, hələ istənilən səviyyədə deyil. Prezident öz çıxışında da qeyd etdi ki, hələ də Bakı şəhərində sərnişindaşıma tələblərinə uyğun gəlməyən, istismar müddəti başa çatan avtobuslar var. Amma onların hamısını birdən-birə marşrutlardan kənarlaşdırmaq çətindir. Çünki Bakı şəhərinin əhalisinin məskunlaşması kifayət qədər genişdir, bu səbəbdən də hansısa bir avtobusun xətdən kənarlaşdırılması ayrı-ayrı ərazilərdə  sərnişindaşımada gərginliyin yaranmasına gətirib çıxar bilər. Bu da arzuolunan hal deyil. Bu baxımdan, Gəncədə də eynilə bu modelin tətbiq olunması vacibdir. Bu, Gəncə Şəhər İcra Hakimiyyəti tərəfindən idarə olunan bir prosesdir. Çünki Gəncədə ictimai nəqliyyat sektorunun idarə olunması məsələsinə Gəncə Şəhər İcra Hakimiyyəti cavabdehdir. Düşünürəm ki, Gəncədə və digər şəhərlərdə avtobus təsərrüfatının inkişafına nail olmaq üçün Bakı modelinin tətbiq edilməsi, sərnişindaşıma sahəsində xidmət göstərəcək daşıyıcı şirkətlərin potensial imkanlarının artırılması, onlara əlavə subsidiyaların verilməsi, ümumiyyətlə, bu sahəyə müəyyən güzəştlərlə kreditlərin ayrılması vacibdir. Bu amil Gəncədə də, digər regionlarda da ictimai nəqliyyat sektorunda xidmət göstərən daşıyıcıların çoxalmasına səbəb olmaqla yanaşı, eyni zamanda, rəqabətlilik mühitinin sərnişinlərin tələblərinə cavab verəcək şəkildə qurulmasına gətirib çıxara bilər” - deyə A.Allahverənov vurğuladı.

İradə SARIYEVA 

Son xəbərlər