28/09/2020 12:43
728 x 90

Azərbaycan Polisinin yeni geyim formasının əvvəlkindən üstünlükləri...

Şəmsəddin Əliyev: “...təhlükənin qarşısını ala bilmək istiqamətində əvvəlcədən xəbərdaredici bir geyim forması xüsusiyyətinə malikdir”

img

Bayır xidmətində olan polisləri, eləcə də Yol Patrul Xidməti əməkdaşlarını illərlə gözümüz öyrəşdiyi ənənəvi uniformada deyil, artıq dizayn, rəng və vizual baxımdan fərqli bir formada görürük. Bu, bayır xidmətində olan Yol Polisinin geyim tərzində baş verən yenilənmə ilə əlaqədardır. Artıq Yol Polisi və digər bayır xidməti ilə məşğul olan polislər yeni uniformada xidmətlərini davam etdirməyə başlayıblar. 

Daxili İşlər Nazirliyinin Mətbuat Xidmətinin rəisi, polis polkovniki Ehsan Zahidov mətbuata açıqlamasında bildirib ki, yeni formanın tətbiqi Azərbaycan Prezidenti İlham Əliyevin daxili işlər orqanlarına göstərdiyi diqqət və qayğının daha bir təzahürüdür: “Bu yenilik dövlət başçısının Daxili İşlər Nazirliyinin rəhbərliyinə verdiyi göstərişin icrası ilə əlaqədar oldu. Belə ki, göstərişdə bayır xidmətində olan polis əməkdaşlarının daha müasir və rahat, həmçinin, daha keyfiyyətli materialdan olan yeni geyim forması ilə təmin olunması tələb olunurdu. Bununla əlaqədar DİN tərəfindən müvafiq tədbirlər görüldü və artıq bildiyiniz kimi, ötən gündən başlayaraq Yol Patrul Xidməti əməkdaşları bu müasir xüsusi geyim formasından istifadə edirlər. Yaxın vaxtlarda bayır xidmətində olan digər polis əməkdaşları da bu forma ilə təmin ediləcəklər. Yeni formaları müasirliyindən və yüksək keyfiyyətindən əlavə, həm də bayır xidmətində olan əməkdaşlarımızın təhlükəsizliyi baxımdan da önəmlidir. Belə ki, gecə vaxtı bu formalar həm də işıq əksetdirmə qabiliyyətinə malikdir”.

Onu da vurğulayaq ki, hələ 2019-cu ildən Respublika Dövlət Yol Polisi İdarəsi yol patrul xidməti əməkdaşlarına yeni uniformaların verilməsinə başlanıb. Lakin həmin dövrdə paytaxtda bütün Yol Polisi əməkdaşları yeni formalarda fəaliyyət göstərmirdi, amma bu gün onlar vahid uniformadan istifadə edirlər.

Yol Polisinin yeni geyim formasının əvvəlkilərdən üstünlükləri nədir?

  • “Əvvəlki formadan fərqli olaraq, yeni geyim həm Bakının, bütövlükdə isə respublikamızın iqlim şəraitinə uyğunlaşdırılıb”

 “Polisə Dəstək” İctimai Birliyinin rəhbəri Şəmsəddin Əliyev hesab edir ki, bayır xidmətində olan polis əməkdaşlarına verilən yeni geyimin üstün cəhətləri çoxdur. O hesab edir ki, bu geyim tərzi həm Azərbaycanın qoşulduğu beynəlxalq sənədlərə, həm də ölkəmizin iqlim şəraitinə uyğundur. “Azərbaycan həm Konstitusiya üzrə, həm də müasir tələbə uyğun dünyəvi bir dövlətdir. Biz bütün sahələrdə dünyanın müsbət dəyərlərinə inteqrasiya edirik. Bayır xidmətində olan Yol Polisinin, eləcə də Yol Patrul Xidməti əməkdaşlarının geyiminin dəyişdirilərək müasirləşdirilməsi çox müsbət bir haldır. Buna zərurət vardı. Müasir Yol Polisinin geyimi günün tələblərinə cavab verməlidir. Azərbaycanda polislərin geyiminin dəyişdirilməsi, onların yeni geyimdən istifadə etməsi, həmçinin, Avropa polisinin geyim formasına uyğun olmasının təzahürüdür. Burada düşünürəm ki, Yol Patrul Xidməti əməkdaşlarının yeni geyimi sürücülər üçün də xoşdur. Onların əvvəlki geyimi tünd rənglərdən seçilmişdi və bu, sürcülərə qarşıda polisin olduğunu hiss etdirmirdi. Yeni geyim formaları isə işıqlı rənglərdən seçilib, qaranlıqda işıq verir və sürücü qarşıda polisin olduğunu bilir. Bayır xidmətində olan polisin yeni geyiminin əvvəlki geyimdən üstünlüyünün bir göstəricisi də odur ki, bu geyimlər hərəkətin təhlükəsizliyinə bir işarə verməsidir. Yəni artıq sürücü qarşıda polisin olduğunu bilir və idarəetməni tənzimləyə, qəlibə sala bilər. Bu baxımdan da bu geyimin üstünlükləri çoxdur. Bu, vaxtında, zamanında atılan addımdır”.

Ş.Əliyev onu da vurğuladı ki, polisin geyiminin dəyişməsi, həmçinin, bu sahədə həyata keçirilən islahatların davamıdır. “Polisin yeni uniforması baş verə biləcək təhlükənin qarşısını ala bilmək istiqamətində əvvəlcədən xəbərdaredici bir geyim forması xüsusiyyətinə malikdir. Əvvəlki uniformadan fərqli olaraq, yeni forma həm Bakının, bütövlükdə isə respublikamızın iqlim şəraitinə uyğunlaşdırılıb. Bilirsiniz ki, Bakı çox küləkli şəhərdir və bayır xidmətində olan polislər də daim bayırda xidmət göstərdikləri üçün, onların uniforması da iqlim şəraitinə uyğun olmalıdır. Artıq yeni formada iqlim şəraiti də ciddi şəkildə nəzərə alınıb. Polis sahəsində bayır xidməti ən mürəkkəb xidmət sahəsidir. Onlar saatlarla günəşin, küləyin, yağışın altında qalırlar. Bu baxımdan həm də yeni geyimlər polisin sağlamlığını qoruyan bir formadadır. Düşünülmüş şəkildə tətbiq edilən bu geyim formasının yalnız müsbət tərəfləri var” - deyə Ş.Əliyev qeyd etdi.

İradə SARIYEVA

Son xəbərlər