Bakının Nəsimi rayonu, Dilarə Əliyeva küçəsi, 717-ci məhəllənin sakinləri sabiq deputat, general Əliağa Hüseynovun onlara məxsus 12 mənzilə göz dikdiyini iddia edirlər. Sosial şəbəkələrdə ictimailəşən bu mövzu ilə bağlı bildirilir ki, söhbət sözügedən ünvanda “İdeal -V” MMC tərəfindən inşa edilən çoxmərtəbəli binadan gedir. Hələ bina inşa edilən zaman şirkətin təsisçisi İsa Məmmədov və direktoru Çingiz Məmmədov eyni mənzili bir neçə nəfərə satıblar.
İyirmiyə yaxın mənzil sahibinin Baş Prokuror yanında Korrupsiyaya Qarşı Mübarizə Baş İdarəsinə şikayətlərindən sonra onların hər ikisi həbs olunub. İsa və Çingiz Məmmədovların eyni mənzilləri ayrı-ayrı şəxslərə sataraq 3 milyon 206 min manat məbləği ələ keçirmələri müəyyən edilib. Törətdikləri cinayət əməlinə görə İ.Məmmədov 11 il, Ç.Məmmədov isə 10 il müddətinə azadlıqdan məhrum ediliblər. Şirkətin təsisçisi və direktoru həbs olunduqdan sonra bina sakinləri tərəfindən “Nəsimi 19” mənzil mülkiyyətçilərinin müştərək cəmiyyəti yaradılıb. Sakinlər özləri şəxsi vəsaitləri hesabına binaya su, qaz, elektrik xətti çəkiblər, yarımçıq binanın təmirini başa çatdırıblar.
Sakinlər bildirirlər ki, təzəcə hər şey qaydasına düşübmüş, amma bu dəfə də iki yeni sakin “ortaya çıxıb” və həmin binadan birdən-birə 12 mənzilə sahib olduqlarını iddia edib. Yeni sakinlər mülkiyyət hüquqlarının tanınması ilə bağlı Nəsimi Rayon Məhkəməsinə müraciət ediblər.
Sakinlərin dediyinə görə, onların mənzillərinə iddialı olanlar keçmiş baş hərbi komissar, ehtiyatda olan general-leytenant, Milli Məclisin 4-cü və 5-ci çağırış deputatı Əliağa Hüseynovun həyat yoldaşı Elmira Hüseynova və qızı Esmira Əliyevadır. E.Hüseynova və E.Əliyeva bu binada üç ayrı mərtəbədə yerləşən 12 mənzilin sahibi kimi binanın texniki-tikinti ekspertizası bəhanəsi ilə Nəsimi Rayon Məhkəməsində mülki iddia qaldırıblar. Halbuki, Bakı Ağır Cinayətlər Məhkəməsinin hökmünə əsasən, həmin mənzillərdə məhkəmənin hökmü ilə təsdiq olunmuş sakinlər yaşayır.
Ötən il sentyabrın 17-də Nəsimi Rayon Məhkəməsində hakim Ramin Xəlilovun sədrliyi ilə hər iki şəxsin mülkiyyət hüququnun tanınması ilə bağlı iddiaya baxılıb. Məhkəmə iddianı rədd edib və 12 nəfər sakinin xeyrinə qətnamə qəbul olunub: “12 nəfərin evinə göz dikən millət vəkili, general Əliağa Hüseynov haqqında mətbuatda narazılıqlarımızı bildirmişdik. General bu məsələ ilə bağlı açıqlama verib dedi ki, mənzilləri “halal pulla” alıblar və hər şey məhkəmədə həll olunacaq. Necə olur ki, Korrupsiyaya Qarşı Mübarizə Baş İdarəsi istintaq işi açır, bu istintaq işində bütün saxta sənədlər yoxlanılır, “İdeal –V” və “Alyans-Z” arasında üzləşmələr olur. Amma binanın həqiqi sakinləri və zərərçəkənlər istintaq, ekspertiza və məhkəmə əsasında aşkar olunduğu halda, 12 ildən sonra bu deputat hardansa saxta sənədlərlə üzə çıxır və sadə xalqı yaşadıgı evdən köçürmək istəyir? Yəni bu generalın Korrupsiyaya Qarşı Mübarizə Baş İdarəsinin apardığı istintaq işinin nəticələrinə şübhəsi var? Niyə Korrupsiyaya Qarşı Mübarizə Baş İdarəsinin apardığı istintaq zamanı onun müqavilələri həqiqi çıxmayıb, əgər bu müqavilələr düzgündürsə, niyə ona istintaq və məhkəmə tərəfindən həqiqi sakin kimi təsdiqləyici sənəd verilməyib? Niyə ikili mənzilinin həlli üçün yenidən istintaq işinin aparılmasını tələb etmir, binanın texniki-tikinti ekspertizası bəhanəsi ilə Nəsimi Rayon Məhkəməsinə mülki məsələ ilə bağlı müraciət edir? Guya binanın suyu, işığı barəsində məlumatlar əldə edir?” - sakinlər sual ediblər.
Bina sakinləri deyiblər ki, istintaq və məhkəmə araşdırmaları zamanı zərərçəkən və həqiqi sakinlər müəyyən edilib. Bu qadınlar onlara məxsus müqavilə ilə üzə çıxmayıb, sakinlərin heç biri onları tanımayıb: “Bu 12 ildə harada olublar? İndi iddia edirlər ki, guya 2007-ci ildən bu binadan mənzil alıblar. Görəsən deputat bu 12 ildə 12 mənzilini niyə “unudubmuş?” Bəs Korrupsiyaya Qarşı Mübarizə Baş İdarəsində istintaq aparılan zaman harada idilər? Deməli, bu mənzillərlə bağlı yetərincə sübutu olmadığından, mülki məsələni qaldıra bilməyiblər. Bəlkə general Əliağa Hüseynov tutduğu vəzifəyə arxalanıb məhkəməyə təzyiq etmək istəyir? Axı hansı pullarla, hansı maaşla deputat bir gündə 12 mənzili alıb?”.
Sakinlərin şikayətində maraqlı olan detal ondan ibarətdir ki, Əliağa Hüseynovun mənzilləri alması ilə bağlı iddia onun Milli Məclisin deputatı olduğu zamanı əhatə edir. Millət vəkilinin bir gündə, şəhərin mərkəzində 12 mənzil alması və sonra mübahisəli olan mənzillərə açıq iddia etməsi doğrudan da təəccüblüdür. Hər halda, bu cür halların ortaya çıxması və ictimai müzakirəyə buraxılması millət vəkili adına hörmət gətirmir. Xatırladaq ki, buraxılan parlamentin üzvü olan millət vəkillərindən biri buna bənzər olan mülki mübahisədə öz mandatını pul götürdüyü adamların yanında girov saxlamışdı. Bu cür neqativ hallar millət vəkili kimi müqəddəs bir missiyanın adına hansı formada xələl gətirir?
Rauf Zeyni: “Ümid edirəm ki, yeni formalaşacaq parlamentdə biz bu kimi insanlara rast gəlməyəcəyik”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, belə halların baş verməsi cəmiyyətdə millət vəkili adına heç də xoş olmayan bir münasibət yaradır: “Ölkə Prezidenti dəfələrlə öz çıxışlarında məmurları şəffaflığa dəvət edib. Bundan millət vəkillərinə də pay düşür. Onlar cəmiyyətin ən həssas zümrəsi sayılır. Onların bütün davranışları cəmiyyət üçün örnək sayılmalıdır. Çünki xalq tərəfindən seçilirlər. İctimai nəzarətin belə məsələləri aşkar etməsi çox təqdirəlayiqdir. Prezident də dəfələrlə bunun vacibliyini vurğulayıb. Belə olan təqdirdə istənilən adamda sual yaranır: millət vəkili 12 evi necə ala bilib. Lap bir gündə yox, bir ildə alıb. Axı heç bir məllət vəkilinin aylıq məvacibi buna imkan vermir. Belə hallar, ümumilikdə, deputat adına qarşı bir ikrah hissi yaradır. Görün vəziyyət nə həddə çatıb ki, həmin kateqoriyaya aid insanlar bununla bağlı məhkəmə iddiası belə açırlar. Bizdə elə potensial məmurlar və ya millət vəkilləri var ki, buraxsan bir gündə gedib böyük şəhəri alarlar. Təbii ki, əllərində olan pul leqal deyil. Ona görə bir qədər çəkinirlər. Bunun üçün də, mütləq mənada, şəffaflıq, ictimai nəzarət təmin olunmalıdır. Jurnalistlər belə faktları ictimailəşdirdikcə, həmin adamların bir qədər ictimai rəydən çəkinəcəyi olacaq. Belə halların olmasını qınayıram. Ümid edirəm ki, yeni formalaşacaq parlamentdə biz bu kimi insanlara rast gəlməyəcəyik”.
Məhəmmədəli QƏRİBLİ
