“Holiday Inn” otelində ötən il görülən işlərə yekun vurulması, onların təhlili və qarşıda duran vəzifələrin həyata keçirilməsi yolları ilə bağlı Nəsimi rayon İcra Hakimiyyəti 1 saylı sahə inzibati ərazi dairəsi üzrə nümayəndəliyinin rəhbərliyi, rayonun təsərrüfat xidmətləri rəhbərləri, rayon ictimaiyyətinin iştirakı ilə toplantı keçirilib.
Toplantıda 2019-cu ilin yekunları müzakirə olunaraq, növbəti il üçün konkret tədbirlər müəyyənləşdirilib. Hesabat məruzəsi ilə çıxış edən Nəsimi rayon İcra Hakimiyyəti Başçısının 1 saylı sahə inzibati ərazi dairəsi üzrə nümayəndəsi Bəybala Quliyev bildirib ki, ötən il Nəsimi rayonunda aparılan genişmiqyaslı quruculuq işləri çərçivəsində 1 nömrəli Sahə inzibati ərazi dairəsi üzrə nümayəndəliyin ərazisində də bir sıra abadlıq işləri aparılıb, çoxsaylı yüksək mərtəbəli binaların fasadları əsaslı təmir olunub, «Abad həyət» və "Bizim Həyət" layihələri çərçivəsində geniş işlər görülüb, yeni yaşıllıq zolaqları salınıb. Əhalinin asudə vaxtlarının səmərəli keçirilməsi və istirahəti üçün mövcud parklarda və binaların həyətlərində yeni skamyalar, yeni söhbətgahlar qoyulub, uşaqlar üçün əyləncəli idman qurğuları quraşdırılıb. Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən təmirsiz həyətlərin abadlaşdırılmasına yönəlmiş "Bizim həyət" layihəsi çərçivəsində Nəsimi rayonu Rəşid Məmmədov küçəsi 23, 25 və 27 nömrəli binaların , Hüseyn Seyidzadə 20, 22, 24, 26, 28 nömrəli binaların, Asif Məhərrəmov küçəsi 34, 38,42 və 46 nömrəli binaların, Moskva prospekti 46, 48, Cavadxan küçəsi 1 ünvanlardakı həyətləri abadlaşdırılaraq yenidən qurulub. Bu ünvanlardakı binaların fasadları təmir olunub, pilləkən qəfəslərinin pəncərələri dəyişdirilib yenisi ilə əvəz olunub, giriş qapıları yeni dəmir qapılarla əvəz olunub. Burada müxtəlif oyun elementləri quraşdırılıb, idman meydançaları salınıb, söhbətgahlar quraşdırılıb. Abadlaşdırılan həyətlərdə yaşıllaşdırma işləri aparılaraq həyətlərə həmişəyaşıl ağaclar və gül kolları əkilib. Ümummilli lider Heydər Əliyevin anadan olmasının 96 illiyi ərəfəsində rayonun müxtəlif ərazilərində, mövcud parklarda və yaşıllıq zolaqlarında ağac və gül əkmə kampaniyası keçirilib. Nəsimi rayon İcra Hakimiyyəti Başçısı Aparatının kollektivi, idarə və müəssisələrin nümayəndələri tərəfindən rayonun küçələrində, mikrorayonlar ərazisində, 4-cü mikrorayon ərazisində yerləşən Mir Cəlal parkında, Asif Məhərrəmov küçəsindəki parkda və digər mövcud park və bağlarda, yaşıllıq zolaqlarında ağaclar və gül kolları əkilib.
Yığıncaqda çıxış edən Nəsimi rayon İcra Hakimiyyətinin Başçısı Asif Əsgərov bildirib ki, Prezident İlham Əliyevin həyata keçirdiyi yeni inkişaf konsepsiyasında ölkə paytaxtının və regionların sosial-iqtisadi inkişafı, şəhər və rayonların abadlaşdırılması, yeni infrastruktur layihələrinin davamlı olaraq icra edilməsi əsas istiqamətlər kimi qarşıya qoyulur. Bakı şəhərində müasir infrastrukturun yaradılması sahəsində aparılan çoxşaxəli işlər, hərtərəfli bərpa və yenidənqurma, yeni, müasir tikililər, gözoxşayan parklar və xiyabanlar, şəhərimizin arxitektura simasının günü-gündən gözəlləşməsi və müasirləşməsi burada yaşayan əhalinin mədəni-mənəvi həyat səviyyəsinin yüksəldilməsinə göstərilən diqqət və qayğının bariz nümunəsidir. Məhz bu nəhəng quruculuq işlərinin nəticəsidir ki, müasir Bakı bu gün dünyanın ən gözəl şəhərlərindən birinə çevirilib. 2019-cu ildə Nəsimi rayonunda görülən işlər və həyata keçirilmiş sosialyönümlü layihələr barədə geniş məlumat verən icra başçısı qeyd edib ki, ölkə başçısının tapşırıqlarına əsasən rayon ərazisində aparılan abadlıq quruculuq işləri davam edəcək. Natiq çıxışına davam edərək bildirib ki, Ölkə başçısının müvafiq tapşırığına uyğun olaraq, 2019-cu il fevral ayında, respublikamızın bütün bölgələrində olduğu kimi, Nəsimi rayon İcra Hakimiyyəti Başçısının 1 nömrəli Sahə İnzibati Ərazi Dairəsi üzrə nümayəndəliyi ərazisində yerləşən 20 saylı poliklinikada da əhalinin tibbi müayinədən keçirilməsi həyata keçirilib. Uşaqların yay tətilinin səmərəli keçirilməsi məqsədilə Nəsimi rayon İcra Hakimiyyəti tərəfindən rayon ərazisində yerləşən orta ümumtəhsil məktəblərindən 200-dən çox şagirdin respublikamızın gözəl guşələrindən olan Qusar rayonunda istirahəti təşkil olunub. Eləcə də "Ölkəmizi tanıyaq" layihəsi çərçivəsində Nəsimi rayon məktəbliləri respublikamızın bir sıra rayonlarına səfər edibər. Məktəblilərin yay tətili gunlərində onların asudə vaxtlarının daha maraqlı və yaddaqalan olması üçün Nəsimi rayon İcra Hakimiyyəti tərəfindən onlar üçün müxtəlif ekskursiyalar və tədbirlər təşkil edilib.
Hesabat yığıncağında təqaüdçü Mahmudov İbrahim, 20 yanvar əlili Rayi Rza, 20 nömrəli şəhər poliklinikasının müalicə işləri üzrə baş həkim müavini Həsənova Nəzakət və başqaları çıxış edərək respublikada, o cümlədən Nəsimi rayonunda aparılan quruculuq işlərinin, həyata keçirilən böyük sosial və infrastruktur layihələrin, aparılan islahatların xalqın rifahının yüksəldilməsinə yönəldiyini bildirib, görülən işlərə görə Prezidentİlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
Hesabat yığıncağında sakinləri maraqlandıran suallar cavablandırılıb, ərazinin təmizliyi ilə məşğul olan Nəsimi rayon MKTB-nin bir qrup əməkdaşı mükafatlandırılıb.
Baki-xeber.com
