26/01/2020 13:21
728 x 90

Maştağadakı ruhi-əsəb xəstəxanasına qarşı qeyri-etik xuliqanlıq ...

Səhiyyə Nazirliyi: “Sosial şəbəkələrdə yayılan video görüntü, 2019-cu ildə Maştağa qəsəbəsində yerləşən 1 saylı Ruhi-Əsəb Dispanserində naməlum şəxs tərəfindən çəkilib”

img

“Xəstəxana rəhbərliyi artıq hüquq-mühafizə orqanlarına müraciət edib”

 

Bir sıra saytlarda və sosial şəbəkələrdə bir qrup gəncin ruhi-əsəb dispanserlərindən birinə daxil olaraq orada ruhi xəstələrlə əyləndiklərini əks etdirən videogörüntülər yayılıb. Məlumatlara görə, hadisə Səhiyyə Nazirliyinin Maştağa qəsəbəsində yerləşən 1 saylı ruhi-əsəb dispanserində qeydə alınıb. Bir qrup gənc naməlum şəraitdə dispanserə daxil olub və xəstələri məsxərəyə qoyub, onlarla əylənib.

Üzə çıxan videogörüntü həm sosial şəbəkə istifadəçilərinin ciddi narazılığına səbəb olub, həm də pasiyentlərin yaxınlarının. Ümumiyyətlə, bu gənclərin xüsusi mühafizə olunan bir müəssisəyə necə daxil olması təəccüb doğurur. Qapalı müəssisə olan ruhi-əsəb dispanserində mühafizənin bu şəkildə zəif təşkil edilməsi də diqqəti çəkir. Müşahidəçilər qeyd edir ki, görünür, bu müəssisədə təhlükəsizlik tədbirləri tam qorunmadığı üçün bu hadisə baş verib. Ekspertlərin bildirdiyinə görə, bütün bu yönümlü müəssisələr kimi Maştağada yerləşən 1 saylı ruhi-əsəb dispanseri də qapalı müəssisədir, bura heç xəstələrin yaxınları maneəsiz keçə bilmir. O zaman sual yaranır, nəməlum şəxslər sözügedən müəssisəyə necə və hansı şəraitdə daxil olub?

Videonun çəkildiyi deyilən Maştağada yerləşən 1 saylı ruhi-əsəb dispanserindən baki-xeber.com-a bildirdilər ki, sözügedən videonun hansı şəraitdə çəkildiyindən xəbərsizdirlər. Dispanserin bizimlə danışan əməkdaşı qeyd etdi ki, ruhi-əsəb dispanseri güclü şəkildə mühafizə edilir, kənar şəxslərin bura daxil olmasına imkan verilmir.

Səhiyyə Nazirliyinin mətbuat xidmətindən isə baki-xeber.com-a bildirdilər ki, yayılan video həqiqətən də Maştağada yerləşən 1 saylı ruhi-əsəb dispanserində çəkilib, amma onun kimlər tərəfindən çəkildiyi məlum deyil, hazırda bu istiqamətdə araşdırma aparılır:

“Sosial şəbəkələrdə yayılan video görüntü, 2019-cu ildə Maştağa qəsəbəsində yerləşən 1 saylı Ruhi-Əsəb Dispanserində naməlum şəxs tərəfindən çəkilib. Videogörüntünü xəstəxanaya yoxlanışa, yaxud  xəstə ziyarətinə gələn şəxslərdən biri qeydə alıb. Xəstəxana rəhbərliyi artıq hüquq-mühafizə orqanlarına müraciət edib. Hazırda istintaq videogörüntünü çəkən və yayan adamın müəyyənləşdirilməsi istiqamətində araşdırmalar aparır” - deyə Səhiyyə Nazirliyinin mətbuat xidmətindən bildirdilər.

İradə SARIYEVA

Son xəbərlər