Balaca Nərminin qətli, televiziya proqramına ittihamlar və DİN-in haqlılığı - qanuni axtarış orqanlarına mane olan hər şeyin qarşısı alınmalıdır…
Elgün Səfərov: “İtmiş uşağın meyitinin dəhşətli formada ortaya çıxmasında məlum televerilişin rolu var”
Tovuzun Dondar Quşçu kəndində vəhşicəsinə öldürülən 10 yaşlı Nərmin Quliyeva bütün Azərbaycan cəmiyyətində narahatlıq yaradıb.
İnsanlar cinayətin tez bir zamanda açılmasını və bu işdə iştirak edən şəxslərin cəzalandırılmasını tələb edir. Hətta çoxları ölüm hökmünün ləğvinə görə təəssüflənir.
İnsanların sosial şəbəkələrdə və hər yerdə göstərdikləri ağrılı reaksiyanı başa düşmək olar. Çünki hamının uşağı var. Buna görə də yetkinlik yaşına çatmayanlara qarşı yönəlmiş cinayət əməlləri hər kəsin ürəyində kəskin ağrılarla qarşılanır. Hamımız çalışırıq ki, uşaqlar əziyyət çəkməsin. Ancaq təəssüf ki, ideallıqdan uzaq olan cəmiyyətimizdə baş verən faciəli hadisələrdə günahsız uşaqlar əziyyət çəkir.
Məlumat üçün bildirək ki, uşaq 2019-cu il noyabrın 21-i yoxa çıxıb. Nərminin itkin düşməsi haqqında xəbər yayılan kimi, “Səni axtarıram” verilişində də məlum uşağın itməsi haqqında sujetlər yayımlanıb. Həmin verilişlərdən birində itkin qızın anası “Heç olmasa, övladımın ölüsünü verin” müraciətini edib. Daha sonra 10 yaşlı qızın yandırılmış meyiti aşkarlanıb.
Artıq cinayəti törətmiş Süleymanov İlkin İbrahim oğlu tutularaq istintaqa cəlb edilib. O ifadəsində bildirib ki, qızı qaçırıb saxladığı müddət ərzində “Səni axtarıram” verilişinə baxıb və Nərminin qohumlarının onun yoxa çıxmasında bir-birini necə ittiham etməsini görüb. Bu yolla istintaqın gedişini izləyib və əmin olub ki, cinayətdə onun iştirakından heç kim şübhələnmir. Qatilin nəyə görə qızın cəsədindən valideynlərinin evi yaxınlığında yaxa qurtarması bununla izah olunur. O, istintaqı çaşdırmaq və şübhələri qurbanın qohumlarının üzərinə çəkmək istəyib. Öldürdükdən sonra qatil Nərminin cəsədini tikinti arabasına qoyub, tapıldığı yerə gətirib və yandırıb. Arabanı gizlətdikdən sonra polisə zəng vurub və uşağın cəsədini alovlar içində gördüyünü bildirib.
Rəsmi qurumlar da, ictimai xadimlər də bildirir ki, “Səni axtarıram” verilişi Nərminin axtarışına mane olub. Bu səbəbdən də bu tip verilişlərin bağlanması təklif olunur.
Ailə, Qadın və Uşaq Problemləri üzrə Dövlət Komitəsinin şöbə müdiri Elgün Səfərov bildirdi ki, bu il yanvarın 1-dən “Uşaqların zərərli informasiyadan qorunması haqqında” qanun qüvvəyə minib. Həmin qanunun mexanizmləri hazırlanıb: “Qanunda normalar qeyd olunsa da, tənzimlənmə yox idi. Nazirlər Kabinetinin qərarı və təsdiqini gözləyirik. Bir neçə qurumla yanaşı biz də öz sənədlərimizi təqdim etmişik. Fevral ayından biz öz təlimlərimizə start veririk, rəsmi təlimatları əldə etdikdən sonra isə konkret işlərə başlayacağıq. Bəli, telekanallardakı verilişlərə qanundan çıxış edərək tələblər qoya bilərik, hətta onların birdəfəlik yığışdırılması məsələsi də gündəmə gəlməlidir”.
E.Səfərov onu da vurğuladı ki, itmiş uşağın meyitinin dəhşətli formada ortaya çıxmasında məlum televerilişin rolu var. Bu veriliş əməliyyat-axtarış prosesinə mane olub, məhz o verilişdən sonra meyitin tapılması hər kəsdə təəssüf doğurdu: “Hətta burada inzibati qaydada məsuliyyət də yarana bilər. Vurğulayım ki, tezliklə uşaq hüquqlarını pozan, zorakılıqla bağlı olan televerilişlərin, hər hansı informasiya xarakterli məhsullarla bağlı prosesə başlanacaq, səbəbkarların məsuliyyətə cəlb olunması üçün ciddi tədbirlər görəcəyik”.
Günel CƏLİLOVA
