26/01/2020 12:09
728 x 90

Avropadan könüllü qayıdan azərbaycanlılar dalğası – prosesin kökləri...

Vüqar Bayramov: “Ölkə inkişaf etdikcə, soydaşlarımız geri qayıtmağa meyl edirlər”

img

Ötən il 831 nəfər könüllü olaraq Avropadan Azərbaycana qayıdıb. Beynəlxalq Miqrasiya Təşkilatının (BMqT) yaydığı məlumata görə, BMqT-nin Könüllü Qayıdışa Yardım və Reinteqrasiya layihələri çərçivəsində 2019-cu il ərzində Azərbaycan vətəndaşı olan 831 nəfərin mənşə ölkəsinə könüllü qayıdışı təmin olunub.

Könüllü geri qayıdanların 460 nəfəri Almaniyanın, 264 nəfəri Niderlandın, 27 nəfəri Latviyanın, 16 nəfəri Türkiyənin, 13 nəfəri Avstriyanın, 10 nəfəri Gürcüstanın, 9 nəfəri Belçikanın, 8 nəfəri Litvanın, 7 nəfəri Polşanın, 6 nəfəri İsveçrənin, 4 nəfəri Macarıstanın, 3 nəfəri Finlandiyanın, 2 nəfəri İrlandiyanın, 1 nəfəri Çexiyanın və 1 nəfəri Bosniya və Herseqovinanın payına düşüb.

Diqqətçəkən məqamlardan biri də odur ki, əsasən Qərbi Avropa ölkələrindən Azərbaycana qayıdanlar üstünlük təşkil edirlər. Hansı ki, bir vaxtlar həmin ölkələrə Azərbaycandan getmək istəyənlər çox idi. İndi isə gedənlərin könüllü olaraq geri qayıtmaları prosesi müşahidə edilir. Təkcə bir ildə 831 nəfərin geri qayıtması kiçik rəqəm deyil.

Maraqlıdır, bunun mahiyyəti nədir və sözügedən prosesin kökündə nə dayanır?

  • “Avropada miqrantlara münasibət əvvəlki kimi deyil”

Məsələyə münasibət bildirən iqtisadçı-ekspert Vüqar Bayramovun sözlərinə görə, azərbaycanlıların könüllü şəkildə Avropadan geri qayıtmaları bir sıra amillərlə bağlıdır: “Əvvəla insanların könüllü şəkildə vətənə qayıtması yaxşı haldır. Çünki, nəticə etibarilə, apardığımız monitorinqlər göstərir ki, qayıdanların bir qismi heç də Avropada sığınacaq ala bilmədikləri üçün geri qayıtmır. Sadəcə, müəyyən müddət həmin ölkələrdə miqrant kimi və yaxud da digər formada yaşadıqdan sonra yenidən Azərbaycana qayıtmaq barədə qərar verirlər. Təbii ki, bunun fərqli səbəbləri də var. İqtisadi və digər amillərin bunda rolu müxtəlif formadadır. Bəziləri Azərbaycanda öz işlərini qura biliblər. Nəzərə almaq lazımdır ki, Azərbaycandan gedən soydaşlarımızın bir qismi, yumşaq desək, vətən üçün darıxırlar. Ona görə də müəyyən müddətdən sonra geri qayıtmaq barədə düşünürlər. Ona görə də azərbaycanlıların bir qisminin könüllü şəkildə geri qayıtması müşahidə edilir. Ölkə inkişaf etdikcə, soydaşlarımız geri qayıtmağa meyl edirlər. İqtisadiyyatın inkişafı yeni iş yerləri deməkdir. Xüsusən də ölkədə qeyri-neft sektoru inkişaf etdikcə, yeni iş yerlərinin yaranması imkanları artır. Ona görə də kənarda yaşayan azərbaycanlılar geri qayıtmağa üstünlük verirlər. Başqa bir tərəfdən, Avropada miqrantlara münasibət əvvəlki kimi deyil. Qanunlar sərtləşdirilib, əvvəlki kimi miqrantlar üçün geniş imkanlar yoxdur. Hesab edirəm ki, bu kimi amillərin də prosesə təsiri var”.

Vidadi ORDAHALLI

Son xəbərlər