Bakının Səbail rayonu, Bayıl qəsəbəsində baş vermiş bədbəxt hadisə zamanı ölən əcnəbi tələbələrin şəxsiyyəti məlum olub. Bunlar 1997-ci il təvəllüdlü Tarukki Amaya, 1995-ci il təvəllüdlü Tausi Jayavodi və 1999-cu il təvəllüdlü Malişi Tayukidir.
Şri-Lanka vətəndaşları olan qızların Bakıda fəaliyyət göstərən Qərbi Xəzər Universitetinin tələbələri olduğu bildirilir. Tələbə qızlar iki ay imiş ki, həmin mənzildə məskunlaşıblar. Onların meyitləri müayinə olunması üçün məhkəmə tibb ekspertizasına təqdim edilib.
Qeyd edək ki, yanğını ilk olaraq qonşulardan biri görüb və həmin şəxs tələbə qızların qaldığı mənzilin pəncərəsini sındıraraq onlara kömək etmək istəyib. Ancaq artıq gec olub, qızlar yatmış vəziyyətdə zəhərlənərək ölüblər. Bədbəxt hadisə Xanlar küçəsi 60, mənzil 9 ünvanında baş verib.
Fövqəladə Hallar Nazirliyindən verilən məlumata görə, Bakı şəhərinin Səbail rayonunda ikimərtəbəli yaşayış binasının birinci mərtəbəsində ümumi sahəsi 36 kv.m. olan 1 otaqlı mənzildə 1 ədəd elektrik ötürücüsü və yataq dəsti qismən yanıb. Yanğının kəşfiyyatı zamanı tüstüdən boğulmuş 3 nəfərin meyiti yanğınsöndürənlər tərəfindən aşkar edilib. Mənzil yanğından mühafizə olunub. Yanğın yanğından mühafizə bölmələri tərəfindən söndürülüb.
Hadisə ilə əlaqədar müvafiq qurumlar tərəfindən təhqiqat aparılır.
Hadisə yerindən təqdim olunan fotolordan görünür ki, tələbə qızlar çox acınacaqlı şəraiti olan bir evdə yaşayıblar. Yəqin ki, bu da həmin evin kirayə haqqının ucuz olması ilə bağlı olub. Belə hadisələrin baş verməsi ölkəmizin imicinə də ziyan edir. Göründüyü kimi, həmin qızlar özəl üniversitetlərdən birinin tələbələri olub və əminliklə demək olar ki, onlar təhsilləri üçün üniversitetə pul da ödəyiblər. Hər halda, əcnəbi tələbə qəbul edən universitetlər həmin şəxsləri yataqxana ilə təmin etsələr, belə xoşagəlməz hadisələr yaşanmaz. Ümumiyyətlə, ölkəmizdə əcnəbi tələbə qəbul edən təhsil müəssisələrinin tələbələrinin harada yaşaması ilə bağlı öhdəliyinin olması zəruridirmi?
“Əcnəbilər üçün isə bu, prioritet təşkil etməlidir”
Professor Məhərrəm Zülfüqarlı “Bakı-Xəbər”ə açıqlamasında bildirdi ki, baş verən hadisə çox üzücüdür: “Biz bu məsələdə, ən azından, qardaş Türkiyənin praktikasından istifadə edə bilərik. Orada bütün tələbələr üçün ucuz qiymətə “tələbə yurdları” deyilən yaşayış yerləri təşkil olunur. Hətta bəzilərində tələbələr yeməklə də təmin olunurlar. Bunu universitetlərin çoxu öz daxili hesablarına edir. Tələbə cüzi bir məbləği ödəməklə yaxşı şəraitdə olan yataqxanada qalır. Buna Azərbaycanda böyük ehtiyac var. Yalnız əcnəbilərə deyil, rayondan gələn tələbələrimizə də bu şəraiti yaratmalıyıq. Əcnəbilər üçün isə bu, prioritet təşkil etməlidir. Bunun təhsilin keyfiyyətinə və hətta dövlətimizin büdcəsinə də xeyri olacaq. Çünki yaxşı şəraiti görəndə ölkəmizə daha çox tələbə təhsil almağa gələcək. Təəssüflər olsun ki, bizim universitet rektorları buna ciddi yanaşmırlar. Özü də indiki ali məktəblərin belə şəraiti yaratmağa imkanları da yetərincədir. Bilirik ki, ali məktəblərin çoxunda ödənişli təhsil var. Sovet dövründə Bakıda əcnəbi tələbələr təhsil alırdılar. Onlar üçün ayrıca yataqxanalar fəaliyyət göstərirdi. Bunu mütləq nəzərə almalıyıq. Tələbələr ucuz olsun deyə, məcbur olub şəraiti olmayan evlərdə yaşayırlar. Nəticədə belə hallar ortaya çıxır və bunun da ölkəmizin imicinə böyük zərəri var”.
Məhəmmədəli QƏRİBLİ
