Artıq tikintiyə icazəni rayon icra hakimiyyətləri deyil, Dövlət Şəhərsalma və Arxitektura Komitəsi verəcək. Prezident bu qərarı artıq təsdiqləyib.
Prezident İlham Əliyev Anar Quliyevi Dövlət Şəhərsalma və Arxitektura Komitəsinin sədri vəzifəsinə təyin olunması ilə əlaqədar qəbul edərkən deyib ki, son vaxtlar xüsusilə Şəhərsalma və Arxitektura Komitəsinin rəhbərliyinin dəyişilməsi nəticəsində artıq bu qaydalara riayət edilməyə başlanıb: “Komitəyə yeni funksiyalar verilib və komitənin razılığı olmadan heç bir bina tikilə bilməz. Rayon icra hakimiyyəti orqanları komitədən razılıq almadan heç bir binanın tikilməsinə icazə verə bilməzlər. Siz bu funksiyalardan çox səmərəli şəkildə istifadə etməlisiniz. Sizin nəinki Bakıda və böyük şəhərlərdə, bütün ölkə üzrə monitorinq qruplarınız olmalıdır. Çünki bəzi hallarda torpaqlar zəbt olunur və tələm-tələsik binalar tikilir. Sonra da bu binalar, evlər hansısa qanunsuz yollarla sənədləşdirilir və biz artıq fakt qarşısında qalırıq. Ona görə monitorinq qrupları olmalıdır. Bütün yerli icra orqanlarına bir daha tapşırıq verirəm ki, Dövlət Şəhərsalma və Arxitektura Komitəsinin rəyi olmadan qətiyyən bir dənə də bina tikilə bilməz. Biz buna son qoymalıyıq”.
Tikintiyə icazəni rayon icra hakimiyyətləri deyil, Dövlət Şəhərsalma və Arxitektura Komitəsinin verməsi tikinti sahəsində nə kimi dəyişikliklərə səbəb olacaq?
“…ölkədə tikinti mədəniyyətinin formalaşmasına səbəb olacaq”
Daşınmaz əmlak məsələləri üzrə ekspert Nüsrət İbrahimli “Bakı-Xəbər”ə açıqlamasında qeyd etdi ki, tikintiyə icazəni rayon icra hakimiyyətləri deyil, Dövlət Şəhərsalma və Arxitektura Komitəsinin verməsi ölkədə tikinti mədəniyyətinin formalaşmasına səbəb olacaq: “Məlumdur ki, icra hakimiyyətləri müəyyən vəsait qarşılığında tikintiyə uyğun olmayan ərazilərdə tikintiyə icazə verirdilər. Həmin tikililər də şəhərin görkəmini pis hala salırdı. Həmçinin, rayon icra hakimiyyətlərinə həvalə edilmiş pilot layihələri ya yarımçıq icra edirdilər, ya da özlərinə sərf edən formada”.
Həmsöhbətimiz hesab edir ki, tikintiyə icazənin komitə tərəfindən verilməsi tikinti sektorunda müsbət dəyişikliklərə səbəb olacaq. Xüsusilə də Bakı şəhərində yaşanan tikinti xaosuna son qoyulacaq: “Məlumdur ki, Dövlət Şəhərsalma və Arxitektura Komitəsi son iki ildə tikinti şirkətləri qarşısında bəzi şərtlər qoymuşdu. Tikinti normasına cavab verməyən şirkətlər tenderə buraxılmırdı. Hesab edirəm ki, bu qərar tikinti mədəniyyətinin və standartının formalaşmasına səbəb olacaq”.
İqtisadçı onu da vurğuladı ki, əvvəlki dövrlərdə şəhərsalma qaydaları bəzi hallarda kobudcasına pozulurdu: “Bakının müxtəlif yerlərində tarixi keçmişimizə zidd olan, heç bir memarlıq standartına uyğun olmayan yöndəmsiz və eybəcər binalar tikilirdi. O binalar elə tikilirdi ki, həm ümumi mənzərəyə ziyan vururdu, həm də orada heç bir şəhərsalma əmsalı nəzərdə tutulmurdu”.
Günel CƏLİLOVA
