Azərbaycan Respublikasının Prezidenti İlham Əliyev Anar Quliyevi Dövlət Şəhərsalma və Arxitektura Komitəsinin sədri vəzifəsinə təyin olunması ilə əlaqədar qəbul edib.
Görüşdə çıxış edən Prezident İlham Əliyev deyib: "Mən sizi Dövlət Şəhərsalma və Arxitektura Komitəsinin sədri vəzifəsinə təyin edirəm. Siz hazırda sədrin birinci müavini vəzifəsində çalışırsınız. Bu, sizə göstərilən böyük etimad və sizin üçün böyük məsuliyyətdir. Çünki mənim tapşırığımla Dövlət Şəhərsalma və Arxitektura Komitəsinin funksiyaları genişləndirilib. Hazırda bu komitənin şəhərsalma və memarlıq prinsiplərini müasir əsaslarla təşkil etmək üçün xüsusi rolu və əhəmiyyəti vardır”.
Ölkə başçısı şəhərin arxitektur görünüşünün korlanmaması üçün yeni təyin olunan məmura icra başçılarının tikinti işlərinə müdaxilələrinin qarşısını almağı tapşırıb: “…Bakı şəhəri bundan sonra ancaq Baş Plan əsasında inkişaf etməlidir. Baş Plana uyğun olmayan heç bir bina Bakıda tikilməməlidir. Komitəyə yeni funksiyalar verilib və komitənin razılığı olmadan heç bir bina tikilə bilməz. Rayon icra hakimiyyəti orqanları komitədən razılıq almadan heç bir binanın tikilməsinə icazə verə bilməzlər. Siz bu funksiyalardan çox səmərəli şəkildə istifadə etməlisiniz. Sizin nəinki Bakıda və böyük şəhərlərdə, bütün ölkə üzrə monitorinq qruplarınız olmalıdır. Çünki bəzi hallarda torpaqlar zəbt olunur və tələm-tələsik binalar tikilir. Sonra da bu binalar, evlər hansısa qanunsuz yollarla sənədləşdirilir və biz artıq fakt qarşısında qalırıq. Ona görə monitorinq qrupları olmalıdır. Bütün yerli icra orqanlarına bir daha tapşırıq verirəm ki, Dövlət Şəhərsalma və Arxitektura Komitəsinin rəyi olmadan qətiyyən bir dənə də bina tikilə bilməz. Biz buna son qoymalıyıq”.
Bununla Prezident, faktiki olaraq, icra hakimiyyətlərinin rayonlarda və xüsusilə də Bakı şəhərində tikinti proseslərinə kobud müdaxilə etdiklərini diqqətə çatdırmış olub. Bu xəbərdarlıq icra başçılarının məsuliyyətini nə dərəcədə artırmalıdır və onların tikinti sahəsində indiyə qədər yol verdikləri qanunsuzluqlara hansı formada qiymət verilməlidir?
“Cinayət cəzasız qalmamalıdır”
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, bu məsələdə icra başçılarının böyük məsuliyyəti var: “Xüsusilə də Bakı şəhərində bu sahədə vəziyyət daha acınacaqlı olub. Çünki Bakıda yer çox bahadır. Bakının rayonlarının icra başçıları birbaşa sərəncamlar verirdilər. Tikinti üçün verilən həmin sərəncamlarda Şəhərsalma və Arxitektura Komitəsinin rəyi qətiyyən nəzərə alınmırdı. Sanki həmin qurumun varlığı formal xarakter daşıyırdı. Çünki yerli icra qurumları, faktiki olaraq, həmin qurumun da səlahiyyətlərini mənimsəmişdilər. Əslində isə şəhərin simasını qorumaq səlahiyyəti olan qurum Şəhərsalma və Arxitektura Komitəsidir. Təəssüf ki, onun səlahiyyətlərinə girən icra qurumları şəhərin ansamblını pozan binaların tikintisinə icazələr veriblər. Ümumi götürəndə, həmin quruma yeni nəfəs verildi. Çünki Prezident qəti tapşırdı ki, bu qurumun icazəsi olmadan icra hakimiyyətləri tikinti ilə bağlı hər hansı sərəncam verməsinlər. Hesab edirəm ki, indiyə qədər olan fəaliyyət yoxlanmalıdır. İcra hakimiyyətlərində memarlar var, onların hazırladıqları eskiz layihələrin hamısı nəzərdən keçirilməlidir. Düzdür, burada bəzi detallar da nəzərə alınmalıdır. Hansısa sahibkarın obyektini sökmək də doğru olmaz. Çünki bu, əlavə problemlərə səbəb ola bilər. Ancaq şəhərin ümumi simasını pozan sərəncamları verən şəxslərin əməlinə mütləq hüquqi qiymət verilməlidir. Hesab edirəm ki, ölkə başçısının çıxışı buna tam əsas verir. Çünki, faktiki olaraq, ən yuxarı səviyyədə elan edildi ki, icra hakimiyyətləri şəhərin simasını korlamaqda ön yerdə durublar. Bunun da adı cinayətdir. Cinayət cəzasız qalmamalıdır”.
Məhəmmədəli QƏRİBLİ
