“Mən o kəndlərdə olarkən görürəm ki, hələ də taxta dirəklər qalmaqdadır”. Bunu Prezident İlham Əliyev Vüqar Əhmədovu “Azərişıq” ASC-nin sədri vəzifəsinə təyin olunması ilə əlaqədar qəbul edərkən bildirib.
Ölkə başçısının fikrincə, gələcəkdə xüsusilə ucqar dağ kəndlərində enerji təsərrüfatına da böyük diqqət göstərilməlidir: “Çünki biz, demək olar ki, bütün şəhərlərdə artıq yeni yarımstansiyaların, transformatorların quraşdırılması nəticəsində problemi həll etmişik, ancaq bəzi kəndlərdə dirəklər köhnədən qalıb. Mən o kəndlərdə olarkən görürəm ki, hələ də taxta dirəklər qalmaqdadır. Onları müasir dirəklərə dəyişdirmək üçün əlavə tədbirlər görülməlidir. Paylayıcı xətlər indi tamamilə yenilənib. Ona görə enerji təminatını indiki səviyyədə saxlamaq üçün əlbəttə ki, biz daim fəal olmalıyıq və o cümlədən, “Azərişıq” daim bu işlərə diqqət yetirməlidir. Çünki bizim tələbatımız artır. Baxın, 2019-cu ildə qeyri-neft sənayemiz 14 faiz artıbdır. Deməli, əlavə enerji gücü lazımdır”.
Prezidentin sözügedən məsələni qabartmasından sonra məlum oldu ki, dağ rayonlarındakı icra başçılarının və enerji təsərrüfatlarına rəhbərlik edən şəxslərin məsuliyyətsizliyi üzündən illərdir bu problem həll edilməyib. Bununla belə, sözügedən icra başçıları belə problemin olduğunu iclaslarda deməyiblər. Çox güman ki, ölkə başçısı bu məsələni qaldırmasaydı, dağ rayonlarının taxta elektrik dirəklərinin dəyişdirilməsi ilə bağlı təşəbbüs olmayacaqdı.
Onu da qeyd edək ki, taxta dirəklər üzərində çəkilən elektrik xətləri əsasən qış mövsümündə ciddi problemlərə səbəb olur. Xüsusən küləkli havalarda xətlərdə tez-tez açılmalar baş verir və nəticədə dağ kəndləri günlərlə, bəzən həftələrlə işıqsız qalır. Bütün bunları nəzərə alsaq, dağ rayonlarındakı sözügedən taxta elektrik dirəklərinin indiyədək qalmasında rayon icra başçıları və enerji təsərrüfatlarının rəhbərləri nə dərəcədə məsuliyyət daşıyırlar?
“Hər il Prezidentin ehtiyat fondundan müxtəlif rayonların sosial infrastrukturunun yaxşılaşdırılması ilə bağlı vəsaitlər ayrılır”
Məsələyə münasibət bildirən ekspert İlqar Hüseynlinin sözlərinə görə, buna görə dağ rayonlarının icra başçılarının məsuliyyəti daha böyükdür: “Çünki icra başçılarının işinə məsuliyyətsiz yanaşması üzündən indiyədək sözügedən problem həll edilməyib. Ona görə həll edilməyib ki, onlar bunun həllində maraqlı olmayıblar. Nəticədə ucqar kəndlərdə yaşayan insanlar əziyyət çəkirlər. Bu səbəbdən cavanlar görürsən kənddə yaşamaq, işləmək istəmirlər. Əlbəttə ki, infrastruktur olmadan kəndlərdə normal yaşayışı təmin etmək çətindir. Bunun üçün də ən vacib faktorlardan biri dayanıqlı enerji təminatını qurmaqdır. Digər tərəfdən, hər il Prezidentin ehtiyat fondundan müxtəlif rayonların sosial infrastrukturunun yaxşılaşdırılması ilə bağlı vəsaitlər ayrılır. O cümlədən, “Azərişıq” ASC-nin özünün də gəlirləri var. Bu vəsaitlər hara gedir? Deməyim odur ki, icra başçıları ilə yanaşı, “Azərişıq” ASC-nin də burada məsuliyyət yükü var. Ona görə də məsələyə kompleks yanaşılmalıdır. Ancaq məsələyə hansı tərəfdən yanaşsaq görərik ki, icra başçılarının məsuliyyət payı daha çoxdur. Ümid edirəm ki, “Azərişıq” ASC-nin yeni rəhbərliyi bu problemi həll etməyə çalışacaq”.
Vidadi ORDAHALLI
