Banklar informasiya və maliyyə təhlükəsizliyi sahəsində olan çoxsaylı çatışmazlıqları gizlətsələr də, internet üzərindən vətəndaşların bank kartlarındakı pullarının oğurlanması hər şeyi deyir. Azərbaycan bankları informasiya və maliyyə təhlükəsizliyi sahəsində olan çoxsaylı çatışmazlıqlarını nə qədər gizlətsələr də, vətəndaşların internet üzərindən bank kartlarındakı pullarının oğurlanması barədə şikayətləri bu problemin mövcudluğuna dəlalət edir.
Bu günlərdə "Unibank" Açıq Səhmdar Cəmiyyətinin debet kartlarının balansından pul silinməsi haqqında məlumat yayıldı. Bankın yaydığı açıqlamada yaranan problemin texniki yenilənmə ilə bağlı olduğu bildirilib. Bank bu problemin bayram günlərində aparılan profilaktik işlərlə əlaqədar olduğunu élan edib. Artıq problem həllini tapıb, kartların balansı bərpa olunub.
Qeyd edək ki, bu hadisə banklarla bağlı baş verən ilk belə hadisə deyil. Maraqlıdır, bu cür problemlərin yaranmasının səbəbi nə ilə bağlıdır? Banklar hesablardakı vəsaitlərin təhlükəsizliyini necə qoruyurlar?
Ekspertlər bildirirlər ki, bankın informasiya texnologiyaları sistemində, idarəetmə proqramında yanlışlığa yol verilərsə, bütün hesablardan müəyyən məbləğ silinə bilər. Onların fikrincə, vaxtaşırı bank müştərilərinin hesabından cüzi məbləğdə pul oğurlayırlar.
“Vəsaitlərin bank müştərilərinin xəbəri olmadan hesablarından silinməsi…"
İnformasiya və kommunikasiya məsələləri üzrə ekspert Osman Gündüz bildirdi ki, belə bir olayın baş verməsi heç də xoşagələn hal deyil: “Bunun üçün gərək ki, bank öncədən sınaq həyata keçirərdi. Ehtimal ki, bu baş verənlər innovativ həllin işə salınması, yeniləmə işlərinin başlaması ilə əlaqədar olub. Lakin bu həll özünü doğrultmayıb, qüsurlar ortaya çıxıb. Bank sistemində yenilənmənin edilməsi doğrudur. Lakin gərək ki, bu iş də peşəkarcasına həyata keçirilsin. Bunun üçün sınaq mərhələsinə əlavə resurslar, vəsaitlər ayrılmalıdır. Aidiyyəti qurumlar da bu nüanslara diqqətli yanaşmalıdırlar. Vəsaitlərin bank müştərilərinin xəbəri olmadan hesablarından silinməsi çox ciddi problemdir".
Həmsöhbətimiz hesab edir ki, bu cür halın digər banklar tərəfindən yaşanmaması üçün müəyyən işlər görülməlidir. Banklar bu vəziyyətdən nəticə çıxarıb önləyici tədbirlər görməlidirlər: “Avropada bütün banklar özlərinin APİ xidmətlərini müştərilərə təqdim edirlər. Hansısa şirkət bankın təqdim etdiyi APİ-lərdən istifadə etməklə əlavə dəyər yaratmış olur. Bizdə isə bunlar yoxdur, bankların 99 faizi APİ-ləri bağlayıblar. Belə olanda isə bankların təhlükəsizliyi daha da yüksək olmalı idi".
Günel CƏLİLOVA
