Yanvarın 6-sı axşam saatlarından etibarən "Unibank" ASC-nin debet kartlarından vəsaitlərin silinməsinə başlanıb. Müştərilər kütləvi şəkildə bankın sosial şəbəkələrdə olan hesablarında banka məxsus kartlarından müxtəlif məbləğlərin silindiyini yazıblar.
Müşahidələrimiz göstərir ki, bankın plastik kart istifadəçilərinin hesabından silinən vəsaitlərin məbləği müştəridən asılı olaraq dəyişir. Bu səbəbdən də yanvarın 6-sı gün ərzində bankın müştəriləri arasında əsl ajiotaj yaşanıb.
Bankın dərhal yaydığı qısa açıqlamada yaranan problemin texniki yenilənmə ilə bağlı olduğu bildirilib: "Bayram günlərində aparılan profilaktik işlərlə bağlı bəzi kartların balansında dəyişikliklər olub. Hazırda sistemdə texniki yenilənmələr gedir. Bank əməkdaşları məsələnin həlli ilə məşğuldurlar. Narahatlığa heç bir əsas yoxdur. Ən qısa müddət ərzində kartların balansı bərpa ediləcək. Xahiş edirik narahat olmayasınız”.
Bu qısa açıqlama bank müştərilərini tam qane etmədiyi üçün, sosial şəbəkələrdə bankın ünvanına müxtəlif ittihamlar səslənib. Həmin ittihamlar sırasında: bankın təhlükəsizliyinin tam etibardan düşməsi, bu halın texniki deyil, insan faktoru ilə bağlı olması kimi fikirlər yer alıb. Qeyd edək ki, sözügedən bankın adı daha çox qalmaqallarda hallanır. Xüsusilə də əhaliyə dollar kreditləri ilə bağlı müəyyən edilən kompensasiyaların ödənilməsində bankdan çoxlu sayda şikayət edilib. Belə halın digər banklarla bağlı yox, məhz “Unibank”la bağlı yaşanması da şübhələri bir qədər artırır. Baş vermiş hadisə ilə bağlı bank hansı öhdəlikləri daşıyır, müştərilər bununla bağlı nə edə bilərlər və onların hansı hüquqları tanınmalıdır?
Yaranmış vəziyyətə bağlı “Unibank”ın mətbuat xidmətilə əlaqə saxladıq. Oradan bizə dedilər ki, kartların balansında yaranan dəyişikliklər artıq həllini tapıb. Ətraflı açıqlama ilə bankın “Facebook” səhifəsindən tanış ola bilərik. Bankın yaydığı məlum açıqlamada deyilir: “Bir qədər əvvəl bəzi “Unibank” kartlarının balansında yaranan dəyişikliklər artıq həllini tapıb. Kartların balansı bərpa olunub. Məsələyə operativ münasibət bildirən bütün müştərilərimizə təşəkkür edirik! Belə həssas məqamda məsələyə daha soyuqqanlı yanaşan və son anadək hər kəsin bankına güvənən, etibar edən və sosial şəbəkələrdə ədalətli mövqe nümayiş etdirən müştərilərimizə isə xüsusi minnətdarlıq bildiririk!"
Günel Fərhadqızı: “Adətən belə hallarda cinayət tərkibli əməllərin olması da ciddi nəzərdən keçirilir”
Bank məsələləri üzrə ekspert Günel Fərhadqızı “Bakı-Xəbər”ə açıqlamasında bildirdi ki, bank bu halda müştərilər qarşısında məsuliyyət daşıyır: “İstər kredit, istər cari hesabdan vəsaitin silinməsinə görə bank ciddi məsuliyyət daşıyır və buna görə müştərilərə kompensasiya ödəməlidir. Yaranmış vəziyyətlə bağlı müştərilər ilkin olaraq bankın özünə yaxınlaşmalıdırlar. Ora yazılı şəkildə müraciət etməlidirlər. Həmin müraciətin bir nüsxəsini özlərində saxlamalıdırlar. İstehalkçıların şikayətinə qaneedici cavab verilməsə, paralel olaraq, Mərkəzi Bankın nəzdində fəaliyyət göstərən İstehlakçıların hüquqlarının qorunması şöbəsinə müraciət etməlidirlər. Onların şikayətinə “İstehlakçıların hüquqlarının qorunması haqqında” Qanunun tələblərinə uyğun şəkildə baxmalıdırlar. Bu qanunun tələblərinə görə, istehlakçılar bankdan təzminat da tələb edə bilərlər. Çünki onların xəbəri olmadan hesablarında maliyyə əməliyyatları aparılıb və bunun da müqabilində müştərilərə maddi, psixoloji ziyan dəyib. Əllərində olan müqavilənin şərtlərinin bank tərəfindən birtərəfli pozulduğuna görə müştərilər “Unibank” qarşısında tam əsaslandırılmış iddia qaldıra bilərlər. Bunun da nəticəsində həm silinmiş pulların geri qaytarılmasını, həm də dəymiş mənəvi zərərə görə təzminat tələb edə bilərlər. Baş vermiş hadisə bir neçə səbəblə izah oluna bilər. Texniki səbəb varsa, maksimum 5 iş günü ərzində problem aradan qaldırılmalıdır. Bu olmursa, artıq problemin səbəbi insan faktoru ilə izah oluna bilər. Bu da bankın təhlükəsizliyi və onun müştəriləri üçün ciddi risq anlamına gəlir. Burada bankın öz işçilərinin və ya kənardan müdaxilələrin olduğu güman oluna bilər. Kibercinayətkarlıq faktoru da nəzərdən keçirilməlidir. Adətən belə hallarda cinayət tərkibli əməllərin olması da ciddi nəzərdən keçirilir. Bütün hallarda, bank müştərilərə dolğun informasiya verməlidir”.
Məhəmmədəli QƏRİBLİ
