“Bayram günlərində “Araz” Supermarketlər şəbəkəsində qeyri-nağd ödənişlərlə bağlı hər hansı bir şikayət, problem qeydə alınmayıb”
Bank, kommunal xidmət haqlarının ödənilməsi üçün əvvəlki dövrlərdən fərqli olaraq müştərilər, abunəçilər daha həmin xidmətləri göstərən idarələrin ofislərinə getmirlər. Son illər vətəndaşlar bu kimi xidmət haqlarını metro stansiyalarında, dayanacaqlarda, eləcə də iri supermarketlərdə quraşdırılan terminallar vasitəsilə ödəyirlər.
Bu da onların əlavə vaxt itkisinin qarşısını alır. Lakin çox təəssüflər olsun ki, bəzən ödəniş terminalları lazımi xidmət göstərə bilmir. “MilliÖn”, “Eksperess” və digər terminallarda müəyyən problemlər müşahidə olunur. Xüsusən də bayram günlərində. 31 dekabr Dünya Azərbaycanlılarının Həmrəyliyi Günü və Yeni İl bayramı ilə əlaqədar bir neçə gün ölkəmizdə rəsmən qeyri-iş günü olduğu məlumdur. Qeyri–iş günlərində bir neçə iri supermarketdə, o cümlədən də Səbail rayonu 20-ci sahədəki “Araz” supermarketdə ödəmə terminallarında ciddi problemlər yaranıb. Müştərilər terminallar vasitəsilə qaz, işıq, su, internet, eləcə də bank ödənişlərini həyata keçirməkdə çətinlik çəkirdilər, məcburiyyət qarşısında qalıb paytaxtın başqa istiqamətlərinə üz tuturdular. Biz özümüz də analoji hadisənin şahidi olduq. Bu barədə supermarket əməkdaşlarından soruşduqda “bizim xəbərimiz yoxdur” cavabı verirdilər.
Dövlətin bu cür xidmətləri optimallaşdırdığı bir vaxtda, əlaqədar qurumların ödənişlərin terminallar vasitəsilə tam olaraq təmin edilməsinə çalışdığı bir dönəmdə iri supermarketlərdə ödəmə terminallarının nasazlığı insanlara əlavə problemlər, cərimələr yaradır. “Araz” marketdə olarkən müştərilər terminallardakı nasazlıq uzbatından banklara ödəniş edə bilmədiklərini, buna görə də cərimələndiklərini qeyd edirdilər. Bəzi müştərilər isə supermarketlərdə post terminalların işləməməsindən gileylənirlər.
Ümumiyyətlə, “Araz” supermarketində, eləcə də digər iri supermarketlərdə ödəmə terminallarının işləməməsinin səbəbi nə ola bilər?
Qeyd edək ki, bəzi ekspertlərin sözlərinə görə, paytaxtda quraşdırılan ödəmə terminallarının bir çoxunda donma, işləməmə, pul qəbul etməmə kimi problemlər mövcuddur. Onların fikrincə, hətta bəzi hallarda ödəniş edilsə də, onun ünvanına çatmasında problem olur, ödənişin yerinə oturdulması üçün isə gərək həmin xidmət göstərən idarənin özünə gedəsən.
“Araz” Supermarketlər Şəbəkəsinin mətbuat xidmətinin rəhbəri Billurə Əmirova bizimlə söhbətində bildirdi ki, bizim müraciətimizdən sonra “Araz” supermarketlər şəbəkəsinə aid olan bütün supermarketlərlə əlaqə saxlayaraq məsələni araşdırıblar. “Biz məsələni araşdırdıq. Bayram günlərində “Araz” Supermarketlər şəbəkəsində qeyri-nağd ödənişlərlə bağlı hər hansı bir şikayət, problem qeydə alınmayıb”.
Supermarketlərdə qoyulan ödəniş terminallarının işləməməsinə gəlincə, B.Əmirovanın sözlərinə görə, həmin terminalların işləməməsinə görə “Araz” Supermarketlər Şəbəkəsi məsuliyyət daşımır. “Bu ödəniş terminallarının hansı səbəbdən işləmədiyini deyə bilmərik. Çünki bu terminalları gətirib supermarketlərə yerləşdiriblər. Buna cavabdeh biz deyilik” - deyə B.Əmirova bildirdi.
İradə SARIYEVA
