“Azərbaycanda 2000-ci ilin ortalarından başqalayaraq hər il bir sahəyə həsr olunmağa başlayıb”.
Azərbaycanda könüllülük hərəkatının nəinki ölkə miqyasında, eləcə də beynəlxalq aləmdə özünü doğrultması artıq bir gerçəklikdi.
Azərbaycanda könüllülük hərəkatının tarixi çox-çox uzaqlara gedib çıxır, rəsmən isə bu institut son 9-10 ildə formalaşıb. Belə ki, Prezident İlham Əliyevin 9 iyun 2009-cu il tarixində imzaladığı “Könüllü fəaliyyət haqqında” Qanun Azərbaycanda könüllülər hərəkatının daha da genişlənməsinə münbit zəmin yaradıb. Bu qanun qəbul edildikdən sonra Azərbaycan könüllüləri ölkəmizdə keçirilən kütləvi idman, siyasi, mədəni tədbirlərin idarə edilməsi proseslərinə könüllü qismində cəlb edildilər.
Məlum olduğu kimi, Prezident İlham Əliyevin 30 dekabr 2019-cu il tarixli Sərəncamı ilə 2020-ci il ölkəmizdə “Könüllülər ili” elan edilib. Sərəncamda qeyd edilir ki, Azərbaycan xalqı əsrlər boyu xeyirxahlıq, fədakarlıq, könüllü və təmənnasız kömək ənənələrini yaşadıb.
“Könüllülük insanları vahid niyyət ətrafında birləşdirən, vətəndaş, cəmiyyət və dövlətin birgə fəaliyyətinin ən uğurlu formatıdır. Könüllülük həm də vətənpərvərlik məktəbi, öz xalqına, dövlətinə, milli-mənəvi dəyərlərə bağlılıq və xidmət örnəyidir.
Bu fəaliyyətin təşviqi məqsədilə dövlətimiz tərəfindən zəruri addımlar atılmış, normativ hüquqi baza təkmilləşdirilmiş, dövlət dəstəyi mexanizmləri formalaşdırılmışdır. Könüllülük bir çox fəaliyyət sahələrinə nüfuz edərək ümummilli hərəkata çevrilmiş, ölkəmizin hər bir bölgəsinə, ictimai həyatın müxtəlif sahələrinə yayılaraq, cəmiyyətimizin bütün təbəqələrini əhatə etmiş, gənclərimizin həyat tərzinə çevrilmişdir. ASAN, “Regional İnkişaf” İctimai Birliyi, “Bir” Tələbə könüllülüləri və digər könüllü hərəkatları yaranmış, mərkəzi və yerli icra hakimiyyəti orqanlarında on minlərlə gənci birləşdirən könüllü qrupları formalaşmışdır. Könüllülərimiz öz kreativliyi, təşəbbüskarlığı, innovativ düşüncə tərzi və müasir dünyagörüşləri ilə qoşulduqları fəaliyyətə yeni nəfəs vermiş, ölkəmizdə Avroviziya Mahnı Müsabiqəsi, I Avropa Oyunları, “Formula 1” yarışları, IV İslam Həmrəyliyi Oyunları kimi irimiqyaslı beynəlxalq tədbirlərin həyata keçirilməsində əvəzsiz rol oynamışlar”.
Sənəddə vurğulanır ki, 2019-cu il 5 dekabr tarixində Beynəlxalq Könüllü Günü ərəfəsində Azərbaycanda ilk dəfə keçirilmiş və bütün könüllüləri əhatə etmiş Könüllülük Həftəsi ölkəmizdə könüllülüyün yeni mərhələyə qədəm qoyduğunu və böyük potensiala malik olduğunu nümayiş etdirib.
Azərbaycan Respublikasında xaqlımızın tarixinin, həyatının ən mühüm istiqamətlərinin təbliği yönündə mühüm işlərin görülməsi çox əhəmiyyətlidir. Prezident İlham Əliyevin imzaladığı sərəncamlarla son illər davamlı olaraq ölkəmizdə hər il bir hadisəyə həsr olunub.
Məsələn, Prezident Sərəncamı ilə 2019-cu il Azərbaycanda Nəsimi ili elan edilmişdi. Dahi Azərbaycan şairi İmadəddin Nəsiminin 650 illik yubileyi münasibətilə il boyu ölkədə və ölkədən kənarda Nəsimi ilə bağlı saysız tədbirlər keçirildi. Onu da vurğulayaq ki, Azərbaycanda ilk dəfədir il tarixi şəxsiyyətə həsr olunur. Azərbaycan Xalq Cumhuriyyətinin 100 illiyi münasibətilə 2018-ci ilin ölkəmizdə Azərbaycan Xalq Cümhuriyyəti ili elan edilməsi ilə bağlı da ölkə başçısı sərəncam imzalamışdı. Respublikamızda 2017-ci il islam həmrəyliyi ili, 2016-cı il multikulturalizm ili, 2015-ci il kənd təsərrüfatı ili, 2014-cü il sənaye ili, 2013-cü il informasiya-kommunikasiya texnologiyaları ili, 2012-ci il idman ili, 2011-ci il turizm ili, 2010-cu il ekologiya ili, 2009-cu il uşaq ili, 2007-ci il gənclər ili elan edilib. Elan edilən illərlə bağlı keçirilən tədbirlərdə, toplantılarda könüllülər yaxından iştirak ediblər. Könüllülərin sayının günü-gündən artığını deyən ekspertlər qeyd edirlər ki, bu, gənclərin həyatını sözün əsl mənasında dəyişən amildir.
Ekspertlər qeyd edir ki, Azərbaycanda keçirilən beynəlxalq tədbirlərdə, musiqi, idman yarışlarında, çempionatlarda iştirak edən könüllülərin həm sayı artıb, həm də onlar çox yüksək səviyyədə xidmət göstərirlər. Ekspertlərə görə, bu gün Azərbaycan könüllülərinin fəaliyyəti dünyanın ən təcrübəli könüllülərinin fəaliyyəti ilə müqayisə edilə bilər.
Yalnız 2019-cu ildə Azərbaycanın paytaxtı Bakıda keçirilən XV Avropa Gənclər Yay Olimpiya Festivalında 12 idman obyektində təxminən 3500 könüllü fəaliyyət göstərib.
2020-ci ilin “Könüllülər İli” élan edilməsinin böyük tarixi əhəmiyyəti olduğunu deyən ekspertlər hesab edirlər ki, bu, ölkə gənclərinin faəliyyətinə, roluna verilən qiymətdir.
Tanınmış şairə, filologiya üzrə fəsləfə doktoru Qiymət Məhərrəmli bizimlə söhbətində bildirdi ki, 2020-ci ilin ölkəmizdə “Könüllülər İli” elan edilməsinin ən böyük əhəmiyyətindən biri gənclərin humanizm, vətənpərvərlik ruhunda tərbiyə edilməsidir. Q.Məhərrəmli qeyd etdi ki, Azərbaycanda formalaşdırılan və Prezident İlham Əliyevin xüsusi diqqət göstərdiyi könüllülər hərəkatı Azərbaycan gənclərin potensialını, təmənnasızlığını, gözəl xüsusiyyətlərini meydana çıxaran faktorlardan biridir. Yarandığı gündən Azərbaycan könüllülərinin nəinki müxtəlif beynəlxalq tədbir və aksiyalarda, hətta ölkədə reallaşdırılan müxtəlif xeyirxah aksiyalarda, layihələrdə iştirakı çox müsbət haldır. Könüllülüyün gənclərin müxtəlif kreativ təşəbbüslər irəli sürməsinə, bu kimi aksiyalarda iştirakına münbit zəmin yaratdığını deyən Q.Məhərrəmlinin sözlərinə görə, bu gün ölkəmizdə insanların köməyinə ən çox çatan ASAN könüllülərdir ki, onlar insanlara hər cür yardımlar edirlər. “Azərbaycanda 2000-ci ilin ortalarından başqalayaraq hər il bir sahəyə həsr olunmağa başlayıb. Bu olduqca əhəmiyyətli bir məsələdir. Bir il müddətində həsr edilən sahə ilə bağlı işlər görülür, həmin sahələr təbliğ edilir, uğurları ictimaiyyətə çatdırılır. Əlbəttə, bu illər çərçivəsində aidiyyatı sahələr üzrə çox işlər görülüb.
Azərbaycan Prezidentinin sərəncamı ilə 2020-ci ilin “Könüllülər İli” elan edilməsi təqdirəlayiqdir. Bu, Azərbaycan gəncliyinin könüllük fəaliyyətinə verilən böyük dəstək olmaqla yanaşı, həm də onların milli vətənpərvərlik ruhunun formalaşmasına bir töhfədir. Reallıq budur ki, ictimiyyəti heç cür könüllülərsiz təsəvvür edə bilmirik, çünki artıq onlar öz fəaliyyətləri ilə həyatımızda mühüm yer tutublar. Gənclərin bu hərəkata könüllü şəkildə qoşulması, bütün proseslərdə iştirakı, müxtəlif təşəbbüslər və ideyalar meydana çıxarmaları çox müsbət haldır. 2020-ci ilin “Könüllülər İli” elan edilməsi ölkəmizin ümumi inkişafına töhfə verən könüllərin fəaliyyətinə yüksək qiymət verilməsinin və onlara bəslənən inamın təzahürüdür. Bu həm də Azərbaycanda könüllülər institutunun daha yüskək səviyyədə inkişafını sürətləndirəcək amildir”-deyə ekspert bildirdi.
İradə SARIYEVA
