“İstehlakçı üçün məlumat standartı olmadığından, hər kəs istədiyi kimi qarışıq yağları kərə yağı adı ilə markalayır”
“Sahibkarlar malların adını düzgün yazmamaqla istehlakçıları aldadırlar. Marketlərin bəziləri kərə yağı adı altında spred bitki yağları satır”. Belə bir bəyanatla Qida Təhlükəsizliyi Agentliyinin şöbə müdiri Əkbər Əliyev çıxış edib. “Yağ satılır 4,80 manata və bir şəxs sosial şəbəkələrdə paylaşır ki, AQTA hara baxır, bu qiymətə kərə yağı olarmı? Mən özüm həmin şəkli yaxınlaşdırıb baxıb görürəm ki, yağın üzərində yazılıb ki, bitki tərkibli spred yağı. Qiymətin altındakı etiketdə də yazılıb spred yağ. İnsanlar bu məlumatı yayanda, araşdıranda da onu tam dərindən araşdrımalıdırlar. Bitki kərə spredi var, bitki tərkibli yağlar var, marqarinlər var. Bunların fərqini bilmək lazımdır. O məlumatın yayılması bizə çox böyük dəstək oldu. Biz marketlərdə reyd keçirdik və gördük ki, bəzi bizim tanıdığımız marketlərin satıcıları spred yağı əhaliyə kərə yağı adı altında satır”- deyə Əkbər Əliyev bildirib.
Məsələ ilə bağlı fikir bildirən Azad İstehlakçılar Birliyinin sədri Eyyub Hüseynov qeyd etdi ki, əsas problemlərdən biri markalanma ilə bağlıdır. İstehlakçı üçün məlumat standartı olmadığından, hər kəs istədiyi kimi qarışıq yağları kərə yağı adı ilə markalayır. Malın üzərinə inək şəkli vurulur və "təbii təmiz yağ" yazılır: “İstehlakçı da buna aldanır və yağı alır, amma məlum olur ki, bu yağ bitki yağlarının qarışığıdır. Malın üzərində adı və tərkibi yazılmalıdır". E.Hüseynov onu da vurğuladı ki, satışda olan kərə yağı ilə bağlı AİB-ə müxtəlif şikayətlər daxil olur:"İstehlakçılar zəng edib yağların qiymətindəki müxtəlifliklə bağlı narazılıqlarını bildirirlər. Yağlarla bağlı bizə həftədə ən azı üç zəng daxil olur. Onlar eyni qiymətə aldıqları yağların qoxularının tamamilə fərqli olduğunu deyirlər. Həmçinin, kəndlərdən şəhərə gətirilərək camış yağı adı altında satılan yağların 90 faizi saxtadır. Heyvanların iç yağını qarışdırırlar və əridəndə pis qoxu gəlir. Bunlar insan sağlamlığı üçün təhlükəlidir". Həmsöhbətimizin sözlərinə görə, istehlakçıların aldadılması hallarına yol verilməməlidir: “Jurnalistlər mənə illər boyu yağ sahəsindəki vəziyyətlə bağlı suallar veriblər. Biz Yeni Zelandiyaya getmişdik, orada Azərbaycana yağ idxal edilən zavodda olduq, markalanmanı gördüm. Deməliyəm ki, son dərəcə ekoloji cəhətdən təmiz yağ Azərbaycana göndərilir. Ancaq bir çox firmalar Yeni Zelandiyadan yağlar gətirirlər. Hətta Zelandiya yağı adı altında Gürcüstandan ölkəmizə mal idxal edirlər. İstehlakçılara tövsiyəm budur ki, kərə yağı alanda məhsulu əlində sıxsın və ya əritsin. Əgər parçalanmırsa, o halda təmizliyinə inanmaq olar. Həmçinin, qoxusu və dadından da müəyyən etmək olur ki, bu yağın tərkibi nədən ibarətdir”.
Günel CƏLİLOVA
