Ölkəmizə müxtəlif ölkələrdən, xüsusən də qonşu respublikalardan qanunsuz yollarla tütün məmulatları, spirtli işkilərin gətirilməsi halları ilə bağlı müxtəlif faktlar mövcud olub. Bu gün də sözügedən məsələ çox aktualdır. Gürcüstandan Azərbaycana bu ölkədə kustar üsulla hazırlanan spirtli işkilərin gətirilməsi halları illərdir ki, mövcuddur. Hətta bir neçə gün əvvəl qeyd etdiyimiz 31 Dekabr Dünya Azərbaycanlılarının Həmrəyliyi Günü və Yeni İl bayramında da bir sıra vətəndaşların bayram süfrəsində Gürcüstandan gətirilən həmin içkilər olub. Məlumatlara görə, kustar üsulla hazırlanan və qanunsuz yollarla ölkəmizə gətirilən bu içkilərdən zəhərlənənlər də, narahatlıq keçirənlər də olub.
Qeyd edək ki, Qida Təhlükəsizliyi Agentliyinin (AQTA) ictimaiyyətlə əlaqələr şöbəsindən həm yerli saytlarda, həm də sosial şəbəkələrdə kustar üsulla Gürcüstanda hazırlanan və ölkəmizə gətirilən təhlükəli spirtli içkilərlə bağlı xəbərdarlıq da yer alıb. Vətəndaşlarımızı ehtiyatlı olmağa çağıran qurum rəsmiləri vurğulayıb ki, kustar üsulla hazırlanan spirtli içkilərdən istifadə Gürcüstanda bədbəxt hadisələrin yaşanmasına səbəb olub. “...Bayram günlərində vətəndaşlarımızın ən çox üz tutduğu ölkələrdən biri olan Gürcüstanda kustar üsulla hazırlanmış spirtli içkilərdən kütləvi zəhərlənmə halları artıb...Ölkəmizdə də bayram ərəfəsində kustar üsulla spirtli içki hazırlayıb insanların sağlamlığı və həyatı bahasına qazanc əldə etməyə çalışan cinayətkarlara rast gəlirik. Bu kimi hallarla bağlı bayram günlərində də əməkdaşlarımız tərəfindən ictimai-iaşə obyektləri və satış müəssisələrində mütəmadi reydlər keçirilib və aşkarlanan faktlarla bağlı qanunmüvafiq tədbirlər görülüb. Aparılan reydlər və görülən tədbirlər barədə qarşıdakı günlərdə ətraflı məlumat verəcəyik”-deyə AQTA-dan bildirilib.
Kütləvi canlar alan spirtli içkiləri Gürcüstandan Azərbaycana kimlər və necə gətirib?
“Azad İstehlakçılar” İctimai Birliyinin sədri Eyyub Hüseynov baki-xeber.com-a bildirdi ki, AQTA-nın narahatlığı və əhalini xəbərdar etməsi əsassız deyil. E.Hüseynov qeyd etdi ki, bu gün Gürcüstandan Azərbaycana kustar üsulla hazırlanan keyfiyyətsiz spirtli içkilərin gətirilməsi faktları var və bu içkilərin də ölkəmizdə insanlara faciələr yaşatdığı məlumdur. E.Hüseynovun sözlərinə görə, Daxili İşlər Nazirliyinin müvafiq qurumları bu kimi hallara qarşı kəskin mübarizə aparsa da, yenə də qaçaqmalçılar öz çirkin əməllərindən qalmır və müxtəlif yollarla ölkəmizə kustar üsulla hazırlanan spirtli içkilər gətirirlər. “Çox təəssüf ki, Gürcüstandan Azərbaycana qanunsuz yollarla kustar üsulla hazırlanan içkilər gətirilir. Bu sahədə vəziyyətinin kəskinliyini praktik olaraq 8 ay əvvəl Daxili İşlər Nazirliyinin Mütəşəkkil Cinayətkarlığa Qarşı Mübarizə İdarəsi sübut etdi. Cinayətkarlığa Qarşı Mübarizə İdarəsi aşkarladı ki, ölkəmizə gətirilən brend bahalı spirtli içkilərin böyük bir hissəsi kustar üsullarla mənşəyi məlum olmayan mayelərdən hazırlanır, şüşələrə yığılır, satışa çıxarılır. O da məlumdur ki, spirtli içkilər aksiz vergisinə cəlb olunan mallardır. Bakıda fəaliyyət göstərən çoxsaylı gürcü restoranlarında kustar üsulla hazırlanan açı gürcü şərabı verilir. Bu spirtli içkilər də Azərbaycana qanuni şəkildə gətirilməyib. Qanuni yolla açıq şəkildə Gürcüstandan Azərbaycana heç zaman spirtli içki gətirilə bilməz, çünki aksiz vergisinə cəlb edilən mal kimi qablaşdırılmalıdır. Təkcə spirtli içkilər deyil, qanunsuz yollarla ölkəmizə gətirilən və bazarda satılan məhsulların satılma ünvanı ilə bağlı dəfələrlə Gömrük Komitəsinə məlumatlar vermişik. Çox təəssüflər olsun ki, qurum seyrçi mövqe göstərir. Bəli, Gürcüstandan Azərbaycana təhlükəli, mənşəyi bilinməyən məhlullardan hazırlanan spirtli içkilər gətirilir”.
E.Hüseynov qeyd etdi ki, vaxtilə qaçaqmalçılar tərəfindən Ermənistandan da Azərbaycana üzəri erməni dilində yazılan spirtli içkilər gətirilib. “Lakin bu halın qarşısı alındı. Hər gün onlarla azərbaycanlı, erməni, gürcü Gürcüstan bazarında görüşür və mal mübadiləsi aparır. Bu baxımdan istisna olunmur ki, Ermənistandan Gürcüstan vasitəsilə Azərbaycana spirtli içkilər daxil ola bilər. Gürcüstandan Azərbaycan ərazisinə kustar yollarla hazırlanan içkilərin qaçaqmalçılar tərəfindən keçirilməsi əksər hallarda gömrük orqanlarında çalışan bəzi məsuliyyətsiz məmurların “xeyir-duası” ilə reallaşır. Bu işdə qaçaqmalçılarla bəzi gömrük işçilərinin əlbirliyi özünü açıq şəkildə göstərir. Biz bu məsələni dəfələrlə səsləndirsək də, çox təəssüf ki, Gömrük Komitəsi reaksiya vermək əvəzinə seyrçi mövqe tutur. Buna əmin olmaq üçün gedib Sədərək bazarına baxmaq kifayətdir”.
Bu kimi halların qarşısının hansı səbəbdən alınmadığına gəlincə, E.Hüseynov qeyd etdi ki, bu, aidiyyəti dövlət qurumları arasında effekli əlaqənin olmaması ilə bağlıdır. O qeyd etdi ki, AQTA bazarda olan və bura qanuni yolla daxil olan qidanın təhlükəsizliyini yoxlamalıdır. “Məlumdur ki, gömrük postlarında AQTA-nın nümayəndələri var. Lakin onlar qaçaqmalçıların öhdəsindən gələ bilmir. Təəssüflər olsun ki, AQTA-nın bu əhəmiyyətli məlumatına gömrük orqanları əhəmiyyət vermək istəmir. Təhlükəli qidaların, o cümlədən də zərərli spirtli içkilərin satıldığı yerlər məlumdur, amma gömrük orqanları və daxili bazara nəzarət edən qurumlar bu məhsulların hansı yollarla ölkəyə gətirildiyini araşdırmır, onun mənbəyini tapmırlar ”-deyə E.Hüseynov bildirdi.
İradə SARIYEVA
