Azərbaycan Milli Elmlər Akademiyasının strukturuna daxil olan bir çox elmi-tədqiqat (AMEA) institutlarının, sənaye və texnologiya parklarının nə elmə, nə də sənayeyə hər hansı bir fayda verdiyi məlumdur.
Azərbaycan elminin iqtisadiyyatda, sənayedə rolunun gücləndirilməsi uzun illərdir tələb olunan bir məsələdir. Lakin hələ də elmin iqtisadiyyatda, sənayedə, kənd təsərrüfatında və digər sahələrdə rolu görünmür. Halbuki bütün dünyada elm bütün sahələrə nüfuz edir. Bizdə isə belə deyil. Akademiyanın strukturuna daxil olan Yüksək Texnologiyalar Parkında da yarandığı bu üç il müddətində heç bir faydalı iş görülmədiyi təsdiqlənib. Bir neçə ay əvvəl qəzetimizdə Yüksək Texnologiyalar Parkında baş verən neqativ məsələlər haqqında yazmışdıq. Artıq AMEA rəhbərliyi özü bu parkın fəaliyyətsizliyini ciddi şəkildə tənqid edir. Akademiyanın ümumi yığıncağında AMEA prezidenti, akademik Ramiz Mehdiyev “Yaradılmasından 3 il keçməsinə baxmayaraq, Azərbaycan Milli Elmlər Akademiyasının Yüksək Texnologiyalar Parkında işlər müasir tələblər səviyyəsində qurulmayıb” - deyə bildirib. Hətta R.Mehdiyev park rəhbərliyini “pokazuxa”lıqda ittiham edib.
Qeyd edək ki, Yüksək Texnologiyalar Parkı Azərbaycan Respublikası Prezidentinin 5 noyabr 2012-ci il tarixli Fərmanı əsasında yaradılıb. “YTP”nin fəaliyyətinin təşkili və idarə olunması məqsədi ilə Azərbaycan Respublikası Rabitə və Yüksək Texnologiyalar Nazirliyinin tabeliyində “Yüksək Texnologiyalar Parkı - “YTP” Məhdud Məsuliyyətli Cəmiyyəti yaradılıb. Azərbaycan Respublikası Prezidentinin müvafiq Fərmanına əsasən Bakı şəhəri, Pirallahı rayonunda 50 ha torpaq sahəsi Cəmiyyətə ayrılıb. "Yüksək Texnologiyalar Parkı"nın yaradılmasında məqsəd innovasiyalı iqtisadiyyatın inkişafına, biliklərə əsaslanan iqtisadiyyatın qurulmasına, intellektual biznesin dəstəklənməsinə, iqtisadiyyatımızın və xüsusilə, İKT sektorunun rəqabət qabiliyyətliliyinin yüksəldilməsinə, milli məhsulların dünya bazarlarında layiqli yer tutmasına, idxal olunan məhsulların yerli istehsal hesabına təmin olunması və ixracın təşviq edilməsinə, xarici investisiyaların cəlb edilməsinə, menecment bazasının yaradılmasına və insan resurslarının inkişafına töhfə vermək olsa da, hələ də Park buna nail ola bilməyib.
Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fizika-riyaziyyat üzrə fəlsəfə doktoru İlqar Orucov baki-xeber.com-a bildirib ki, AMEA-nın ümumi yığıncağında akademiya prezidenti, akademik Ramiz Mehdiyevin çıxışı akademiyanın son 6 illik fəaliyyətinə verilmiş çox böyük qiymət oldu. “Milli Elmlər Akademiyasında artıq üç ildir ki, fəaliyyət göstərən Yüksək Texnologiyalar Parkının fəaliyyətindəki nöqsanların aşkarlanması, bu nöqsanların səsləndirilməsi elmi ictimaiyyətin diqqətini bir daha bu məsələyə cəlb etdi. Bu həm akademiyanın sabiq rəhbərliynin yarıtmaz fəaliyyətinin ifşa olunması, həm də uzun müddətdir mütəxəssislərin Yüksək Texnologiyalar Parkında heç bir iş görülməməsi ilə bağlı səsləndirdikləri fikirlərin təsdiqlənməsi deməkdir. Bilirsiz, illərdir bu insanlar dövlətdən aldıqları milyonlarla vəsaiti səmərəsiz yerə xərcləyiblər və artıq bu fakt rəsmən üzə çıxarıldı, təsdiqləndi. Təsdiqləndi ki, indiyə qədər həqiqətən də Yüksək Texnologiyalar Parkında heç bir iş görülməyib və təqdim edilənlər isə görüntüdən, şoudan başqa bir şey olmayıb. Yadınıza gəlirsə, biz sizinlə dəfələrlə AMEA strukturlarının, o cümlədən də Yüksək Texnologiyalar Parkının fəaliyyətinin görüntü xarakteri daşıdığı, əslində isə burada heç bir iş görülmədiyi haqqında söhbətlər etmişik. Hər zaman demişik ki, akademiyanın fəaliyyəti görüntü xarakteri daşıyır və bu qurum haqqında deyilən müsbət fikirlər isə boğazdan yuxarı sözlərdir, real işi əks etdirmir. Yüksək Texnologiyalar Parkının adından göründüyü kimi burada yüksək elmə əsaslanan texnoloji və digər məhsullar istehsal olunmadır. Amma park bununla məşğul olmadı. Burada onlar mühərrik yağları istehsal edirlər və qablaşdırırlar. Halbuki, bunu Bakıda ayrı-ayrı sexlər də həyata keçirir. Özlərinin dediyinə görə, Müdafiə Sənayesi Nazirliyinin bir neçə sifarişini yerinə yetirirlər. SSR dönəmində akademiyanın bir neçə institutu, xüsusilə də Fizika İnstitutu, Fotoelektronika İnstitutu və digər institutlar müxtəlif sifarişlər həyata keçirirdilər, bu işlər də çox məxfi saxlanırdı, eyni zamanda da əldə olunmuş patentlər xüsusi qriflə mühafizə olunurdu, həmin işlərə çıxış olmurdu. Son dövrlər yaradılan Yüksək Texnologiyalar Parkının Müdafiə Sənayesi Nazirliyinin sifarişi ilə istehsal etdiyi işlər də çox ciddi elmi işlər deyil. Ona görə də, təəssüflər olsun ki, bizdə hələ də bilik iqtisadiyyatı ilə bağlı alimlərin əldə etdikləri nəticələrin iqtisadiyyata tətbiq edilməsi sahəsində çox ciddi problemlər var. Əslində, bütün bu işlərin həyata keçirilməsi üçün Yüksək Texnologiyalar Parkı yaradıldı. Gözləntilər də o idi ki, yaradılan Yüksək Texnologiyalar Parkında elmi məhsullar istehsal olunsun, amma çox təəssüf, burada heç bir məhsul istehsalından danışa bilmirik” - deyə İ.Orucov qeyd etdi.
İradə SARIYEVA
