Müasir Azərbaycan elmi tamamilə yeni bir istiqamətdə irəliləməli olduğu halda, hələ də bu sahədə elə bir ciddi nailiyyət əldə edilməyib. Bir neçə il bundan əvvəl Elmin İnkişaf Strategiyası qəbul olunsa da, hələ də bu sənədin qəbulu elmi irəli apara bilmir.
Bildiyimiz kimi, son dövrlər AMEA-da ciddi struktur dəyişiklikləri baş verir, yeniliklər proqnozlaşdırılır. Bir sıra AMEA əməkdaşları qeyd edirlər ki, bu sistemdə elmin idarə edilməsi sahəsində ciddi problemlər var. Belə bir fikirlər də mövcuddur ki, 2016-cı ildə qəbul edilən “Elm haqqında” Qanunla AMEA-nın nizamnaməsi uyğunluq təşkil etmir.
Bəzi alimlər isə hesab edirlər ki, AMEA-nın 2014-cü ildə qəbul edilmiş nizamnaməsinin yeni tələblərə uyğunlaşdırılması zərurətə çevrilib.
Əminağa Sadıqov: “Nizamnamə komissiyasının yenidən təşkil olunması üçün obyektiv zərurət yaranıb”
AMEA-nın akademik-katibi Əminağa Sadıqovun bildirdiyinə görə, dekabrın 28-də Azərbaycan Milli Elmlər Akademiyasının Rəyasət Heyətinin qərarı ilə akademiyanın ümumi yığıncağı keçiriləcək.
Ə.Sadıqovun sözlərinə görə, iclasın gündəliyinə bir neçə məsələ daxil edilib: “Gündəlikdə dayanan əsas məsələ AMEA-nın 2020-2025-ci illər üçün İnkişaf Proqramının müzakirə olunmasıdır. Proqram müzakirə olunaraq qəbul ediləcək.
İclasda Prezident İlham Əliyev tərəfindən akademiyanın qarşısında qoyulan tapşırıq və vəzifələr də müzakirə olunacaq. Bundan əlavə, AMEA-nın hazırkı nizamnaməsi 2014-cü, “Elm haqqında” Qanun isə 2016-cı ildə qəbul olunub. Yəni AMEA nizamnaməsinin “Elm haqqında” Qanuna uyğunlaşdırılması zərurəti də yaranıb. Nizamnamədə dəyişiklik etmək üçün bir neçə səbəb yaranıb. Nizamnamə komissiyası bununla bağlı təkliflər hazırlayıb. Həmin təkliflər ümumi yığıncaqda müzakirə olunacaq”.
Gördüyünüz kimi, AMEA rəsmisi də akademiyanın nizamnaməsi ilə “Elm haqqında” Qanunun uyğunsuzluğunu qeyd edib və bildirib ki, nizamnamə qanuna uyğunlaşdırılmalıdır.
Burada söhbətin hansı fərqlərdən getdiyini, nə kimi uyğunsuzluqlar olduğunu araşdırmaq üçün AMEA-nın akademik-katibi Ə.Sadıqovla əlaqə saxladıq. Ə.Sadıqov bizimlə söhbətində qeyd etdi ki, bir sıra məsələlər var ki, onlar nizamnamədə əks olunmaldır. “AMEA-da daimi fəaliyyət göstərən nizamnamə komissiyası olub. Nizamnamə komissiyasının yenidən təşkil olunması üçün obyektiv zərurət yaranıb. İclasda bu məsələ də müzakirə ediləcək” - deyə qeyd edən müsahibimiz bildirdi ki, bütün məsələlər iclasda müzakirə ediləcək.
İradə SARIYEVA
