Səhiyyə Nazirliyi, Azərbaycan Qida Təhlükəsizliyi Agentliyi və Baş Prokurorluğun yaydığı birgə məlumatda Bakıdakı restoranlarda bahalı spirtli içkilərdən zəhərlənərək dünyasını dəyişən şəxslərlə bağlı yaşanmış hadisələr haqda ətraflı məlumat verilib:
“Aparılmış istintaqla zəhərlənərək vəfat etmiş Sərxan Bayramov, zəhərlənərək xəsarət almış Cəlal Həmzəyev, Sənan Teymurov, Elvin Teymurov və Nurlan Nəbiyevin paytaxtın Nərimanov rayonu, Koroğlu Rəhimov küçəsində yerləşən “Baku Voice Rooms”, Nəsimi rayonu, Tbilisi prospektində yerləşən “Baku City” restoranlarında, vəfat etmiş Mustafa Mustafayevin isə Binəqədi rayonu, Ə.Rəcəbli küçəsində yerləşən “Everest” restoranında qəbul etdiyi və zəhərlənmələrinə səbəb olmuş “Chivas Regal 12” əmtəə nişanlı spirtli içkilərini “Baku City” restoranının müdiri Füzuli Alıyev və sonuncunun tanışlığı ilə “Everest” restoranına Xəyal Cəfərovun ucuz qiymətə satmasına əsaslı şübhələr müəyyən edilib.
İstintaq zamanı Bakı şəhər Baş Polis İdarəsi, şəhər prokurorluğunun, eləcə də Qida Təhlükəsizliyi Agentliyinin əməkdaşları tərəfindən zərərçəkmiş şəxslərin spirtli içki qəbul etdikləri “Baku Voice Rooms”, “Baku City” və “Everest” restoranlarına baxış zamanı qida və içki nümunələri, videomüşahidə kamerasının yaddaş qurğuları, müxtəlif qaimə-fakturalar, eləcə də X.Cəfərovun spirtli içkilər hazırladığı Binəqədi rayonu, Biləcəri qəsəbəsi, Y.Hüseynov küçəsində icarəyə götürdüyü ikimərtəbəli evə baxış zamanı iki ədəd “Chivas Regal 12” adlı boş viski şüşəsi, 9 ədəd satış üçün nəzərdə tutulmuş qaydada qablaşdırılmış halda “Kremlyovskie Kuranti Premium” araqlarının boş şüşələri, səkkiz ədəd araq və viski spirtli içkilərinin qarışdırılmaqla hazırlanması və sonradan ayrı-ayrı boş şüşələrə doldurulması üçün istifadə edilmiş 5 litr həcmli, içərisində araq və viski qalıqları olan plastik qablar, çoxsaylı araq və viski spirtli içki şüşələrinin qapaqları, şüşələrin üzərində vurulan qapaq və etiketlərin bərkidilməsi üçün istifadə edilmiş 4 ədəd hava fen və digər əşyalar aşkar edilərək maddi sübut kimi götürülüb.
Bundan başqa, X.Cəfərovun istehsal etdiyi spirtli içkilərin boş şüşə və qapaqlarını aldığı Səxavəddin Həsənova məxsus, Binəqədi rayonu, Azadlıq prospekti 161a ünvanında olan anbara baxış zamanı orada “Chivas Regal 12”, “Chivas Regal 18”, “Chivas Regal 21”, “Jameson”, “Grands”, “Jack Daniels” adlı və s. viski, “Nemirov”, “Ruskiy Standart”, “Belyuga”, “Grey Gouse”, “Minsk”, “Qu Quşu”, “Region”, “Grey Cardinal” adlı və s. araq, “Patron”, “Olmega”, “Siera”, “El Chapo” adlı tekila, “Henessy” və “Remy Martini” konyak və başqa növdən olan 10 min ədəddən artıq spirtli içkilərin öz qutularında, səliqəli şəkildə qapaqları ağızlarına taxılı vəziyyətdə boş şüşələri, həmçinin, müxtəlif növ spirtli içkilərin qablaşdırılması üçün nəzərdə tutulmuş qapaqları aşkar olunub”.
Təqdim edilən rəsmi məlumatdan görünür ki, işbazlar, demək olar ki, bahalı spirtli içkilərin mini zavodunu açıb, əməlli-başlı istehsalla məşğul olurlarmış. Yəni ölüm faktı aşkarlanmasaydı, bu təhlükəli alver davam edəcəkdi. Aşkar edilən maddi sübutlardan görünür ki, söhbət geniş şəbəkədən gedir. İndi kim zəmanət verər ki, digər iri supermarketlərdə satılan bahalı spirtli içkilər saxta deyil? Bunun üçün iri ticarət obyektlərinin spirtli içkilər satılan bölmələrində kompleks yoxlamanın aparılması lazımdırmı?
Eyyub Hüseynov: “Spirtli içkilər satan bütün məkanlar, topdansatış yerləri ciddi nəzarətə götürülməli, İqtisadiyyat Nazirliyinin xətti ilə həmin məkanlarda yoxlamalar aparılmalıdır”
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında bildirdi ki, bu istiqamətdə olduqca acınacaqlı bir mənzərə yaranıb: “Spirtli içki alanda onun aksiz markasına baxmalıdırlar. Aksiz markasının üstündə gümüşü zolaq var və onun içərisində Azərbaycanın gerbi görsənməlidir. Yoxdursa, demək saxtadır. Əhali bilməlidir ki, araq bir ildən, şərab 6 aydan, konyak isə 3 ildən artıq saxlanılmır. Hansı içkinin üzərində istehsal tarixi və son istifadə müddəti varsa, ondan istifadə etsinlər. Əks halda zəhərlənə bilərlər”.
Eyyub Hüseynovun sözlərinə görə, bahalı içkilərdən zəhərlənmə daha çox restoranlarda baş verir: “Müştərilərə brend adı ilə saxta içkilər təklif edirlər. İnsanlar da bunun fərqində olmurlar. Bir il öncə Daxili İşlər Nazirliyinin Mütəşəkkil Cinayətkarlığa qarşı Baş Mübarizə İdarəsi saxta spirtli içkilərlə bağlı araşdırma aparıb və bu haqda cəmiyyətə məlumat verib. Biz təəssüflər olsun ki, ölüm halı baş verdikdən sonra araşdırma aparırıq. DİN sübut etmişdi ki, Azərbaycanda saxta, naməlum şəraitdə hazırlanan içkilər brend şüşələrə tökülür və ya brend şüşələr fabrikdə yığılıb yenidən istehsala verilir. DİN bu sahədə geniş iş gördü və problemin olduğunu bildirdi. Bütün hallarda, vətəndaşlar diqqətli olmalıdırlar. Saxta içki hazırlayan şəxslərə qarşı hamılıqla mübarizə aparmalıyıq, əks halda bundan zərərçəkənlər çox olacaq".
AİB sədrinin sözlərinə görə, restoranlar da həmin içkiləri haradansa alırlar: “Deməli, hazırda spirtli içkilər satan bütün məkanlar, topdansatış yerləri, şərab evləri ciddi nəzarətə götürülməli, İqtisadiyyat Nazirliyinin xətti ilə həmin məkanlarda yoxlamalar aparılmalıdır. Əks halda tələfatların sayı arta bilər”.
Məhəmmədəli QƏRİBLİ
