Dekabrın 26-da Nəsimi rayonundakı Ağabəy Novruzbəyli adına 46 saylı tam orta məktəbdə yəhudilərin milli (dini) bayramı Xanukaya və Dünya Azərbaycanlılarının Həmrəylik Gününə həsr edilən tədbir keçirildi.
Tədbiri ravvin və məktəbin yəhudi bölümünün koordinatoru Zamir İsayev açaraq tədbir iştirakçılarını salamladı. Sonra isə Azərbaycan və İsrailin dövlət himnləri səsləndirildi.
Qeyd edildi ki, dünya yəhudiləri Xanuka bayramını uzun əsrlərdir qeyd edir və Xanuka bayramı İsrailin əsas dini bayramlarından biri hesab olunur. Adətən noyabr-dekabr aylarında qeyd olunan bayram yəhudi təqviminin Kiselev ayının 25-ci günündə başlayır və 8 gün davam edir.
Məlumata görə, bayramın yaranma tarixi isə çox qədimdir: E.ə 165-ci ildə yunan ağalığına qarşı Makkaveylər sülaləsinin başçılığı altında üsyan qaldıran yəhudilər 3 il müddətində bütün torpaqlardan düşməni qovurlar. Üsyanın sonunda yenicə azad olmuş Qüdsdəki müqəddəs məbədə daxil olan yəhudilər bu məkanı işıqlı saxlamaq üçün yalnız birgünlük yağ ehiyatı aşkar edirlər. Lakin möcüzəli şəkildə qızıl şam 8 gün ərzində məbədə işıq salır. Bu müddətdə isə əhali yeni yağ ehiyatı toplayır.
İşıq (Xanuka) qış bayramında yəhudilər eramızdan əvvəl ikinci əsrdə yunanlar üzərində qələbələrini və Qüds məbədinin təmizlənməsini yada salırlar. Xanukanın səkkiz gününün hər birində xüsusi səkkiz şamlı qəndildə (menore) növbəti şam yandırılır. Dini himnlər oxunur, uşaqlar şən oyunlar oynayırlar (ilk növbədə fırlanğıc-dreydl oyunu). Bu günlərdə şən ziyafətlər təşkil edilir, hədiyyələr mübadiləsi aparılır.
Azərbaycanda da bu bayramın xüsusilə qeyd olunduğu vurğulandı. Ölkənin yəhudilər yaşayan bölgələrində, əsasən Qubada Xanuka bayramı təntənəli şəkildə keçirilir.
Tədbirin bədii hissəsində məktəbin yəhudi sektorunun şagirdləri ingilis, rus və digər dillərdə mahnılar oxudular, şeirlər dedilər, monoloqlar söylədilər, həmçinin də gözəl rəqs etdilər, müxtəlif musiqi alətlərində ifalar təqdim olundu.
Tədbirdə İsrailin Azərbaycana yeni təyin edilən fövqaladə və səlahiyyətli səfiri Corc Dik, konsul Xaim Fixman, Diaspor Komitəsinin rəsmisi Vüqar Məmmədov, Təhsil Nazirliyinin rəsmisi Nicat Məmmədli, Bakı Şəhər Baş Təhsil İdarəsinin sektor müdiri Arzu Tairquliyeva, Nəsimi Rayon İcra Hakimiyyəti başçısının müavini Gülarə Verdiyeva və başqaları iştirak edirdilər.
Tədbirdə İsrailin yeni təyin edilmiş səfiri C.Dik çıxış edərək Azərbaycan və İsrail arasındakı əlaqələrdən danışdı. Qeyd etdi ki, səfir təyin edildikdən sonra ilk səfərini yəhudi milliyyətindən olan uşaqların təhsil aldığı 46 saylı tam orta məktəbə edib və bundan çox məmnundur. Səfir bildirdi ki, Azərbaycanda mövcud olan tolerantlıq və multikulturalizm mühiti burada xalqların qardaşlıq, dostluq şəraitində yaşamasına böyük imkanlar açıb. Burada yəhudilərin də öz dini və milli bayramlarını yaşatdıqlarını qeyd edən səfir ənənələrin qorunmasına, gələcək nəsillərə daşınmasına görə Azərbaycana minnətdarlığını bildirdi.
Sonra bildirildi ki, A.Novruzbəyli adına 46 saylı tam orta məktəbin direktoru Sevinc Budaqova İsrail dövləti tərəfindən “Yerusəlim sülh şəhəridir” ordeni ilə təltif edilib. Sevinc xanımın medala göstərdiyi uğurlu fəaliyyət nəticəsində layiq görüldüyünü deyən konsul Xaim Fixman medalı S.Budaqovaya təqdim etdi. Tədbirdə iştirak etdiklərinə görə səfirə və bütün qonaqlara təşəkkür edən S.Budaqova çıxışında bildirdi ki, rəhbərlik etdiyi məktəb Azərbaycanda mövcud olan multikulturalizm və tolerantlığın əsl nümunəsidir. Belə nüfuzlu mükafata layiq görüldüyü üçün İsrail dövlətinə təşəkkürünü bildirən S.Budaqova qeyd etdi ki, əldə etdiyi bütün uğurları rəhbərlik etdiyi kollektivlə birgə qazanıb. “Cənab səfirin ilk səfərini 46 saylı tam orta məktəbə etməsi çox mühüm hadisədir. Mən buna görə ona öz təşəkkürmü bildirirəm. Bu gün Azərbaycanda mövcud olan multikulturalizm və tolerantlıq bütün dünyaya örnək olaraq göstərilir. Ölkəmiz buna Azərbaycan Prezidenti İlham Əliyevin və ölkəmizin Birinci vitse-prezidenti Mehriban Əliyevanın həyata keçirdiyi uğurlu siyasət nəticəsində nail olub. 46 saylı məktəb tolerantlığın və multikulturalizmin bariz nümunəsidir”.
S.Budaqova onu da qeyd etdi ki, Xanuka yəhudilərin azadlıq, birlik-bərabərlik bayramıdır.
Tədbirin sonunda Xanuka bayramının simvolu olan şamlar yandırıldı və dualar oxundu.
İradə SARIYEVA
