Dekabrın 23-də keçirilən bələdiyyə seçkisində qalib gələn qadınların sayı 5882 nəfər təşkil edib. Mərkəzi Seçki Komissiyasının (MSK) yaydığı məlumata əsasən, builki bələdiyyə seçkisində seçilən qadınların sayı ümmi qalib gələn namizədlərin 38,81%-ni təşkil edib. Seçilən kişilərin sayı isə 9272 nəfərdir. Əvvəlki seçkilərlə müqayisədə bu, Azərbaycan tarixində ilk belə göstəricidir.
Son illər qadınların cəmiyyətdə sosial, siyasi, mədəni və digər sahələrdə təmsilçiliyinin artırılması məqsədilə dövlətin uğurlu siyasəti həyata keçirilir. Məlumat üçün bildirək ki, 2004-cü ildə keçirilən bələdiyyə seçkilərində qadınlar 4 faiz təşkil edirdisə, 2009-cu ildə 26.7 faiz təşkil edirdi. 2014-cü ildə isə 35 faiz seçilmişdi. Azərbaycan tarixində ilk dəfədir seçkili orqanlarda qadınların təmsilçiliyi 39 faizə qədər yüksəlib.
“Bu il keçirilən bələdiyyə seçkilərinə namizəd kimi qatılan və qalib olan xanımların sayı ötən seçki ilə müqayisədə artıb”
“Vəfa” Sosial-İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, Azərbaycan qadınlarının seçkilərdə aktiv iştirakı üçün heç bir hüquqi maneə yoxdur. Maneələr yalnız stereotiplər və qadınların passivliyidir. Sevindirici haldır ki, Azərbaycan qadınları artıq həmin stereotiplərə qalib gəlib, seçkilərdə aktiv şəkildə iştirak edirlər: “Bu il keçirilən bələdiyyə seçkilərinə namizəd kimi qatılan və qalib olan xanımların sayı ötən seçki ilə müqayisədə artıb”.
Birlik sədri onu da vurğuladı ki, Birinci vitse-prezident Mehriban xanım Əliyevanı nümunə seçən qadınların siyasi həyatda rolunun artması, bütövlükdə, cəmiyyətdəki ab-havaya çox müsbət təsir göstərir: “Çünki qadınların siyasi proseslərdə iştirakı adətən cəmiyyəti aqressivlikdən uzaqlaşdırır, ictimai-siyasi həyata pozitiv ab-hava gətirir. Bütün dünyada qəbul olunub ki, qadınların məsələlərə daha həssas yanaşması qərarların qəbuluna da müsbət təsirini göstərir. Bu baxımdan parlament seçkiləri ərəfəsində bu nəticəyə görə Azərbaycan qadınlarını alqışlayıram. Ümid edirəm ki, qadınlarımız parlament seçkilərində bu nəticəni təkrarlayacaqlar”.
Həmsöhbətimiz onu da əlavə etdi ki, cəmiyyət inkişaf etdikcə, qadınların fəallığının artması müşahidə olunur. Artıq Azərbaycan qadını dünya səviyyəsində təmsil oluna biləcək intellekt və savad həddinə yüksəlib. Bununla yanaşı, qadınların cəmiyyətin müxtəlif sahələrində təmsilçiliyi kifayət qədər yüksək deyil. Sosial həyatın bütün sahələrində ağırlığı çiyinlərində daşıyan qadınları ictimai-siyasi proseslərə cəlb etməklə demokratiya quruculuğu prosesini sürətləndirmək olar. Bələdiyyə seçkiləri buna böyük bir fürsət verdi. Tədqiqatlardan məlum olur ki, qadınların böyük hissəsinin bələdiyyə seçkisi haqda məlumatları məhduddur.
Günel CƏLİLOVA
