“Görkəmli idmançılara müraciət edərək onları bu işə dəvət edirəm. Bizim mətbuat orqanları gərək bu sahədəki fəaliyyətini gücləndirsinlər. Düzdür, bizim bəzi televiziya kanallarında aerobika, başqa fiziki fəallıqla bağlı verilişlər var”.
Bunu Azərbaycan Prezidenti, Milli Olimpiya Komitəsinin prezidenti İlham Əliyev dekabrın 25-də Milli Olimpiya Komitəsində 2019-cu ilin idman yekunlarına həsr olunan mərasimdə çıxışı zamanı bildirib.
Ölkə başçısının sözlərinə görə, idman kütləvi xarakter almalıdır: “Bu verilişlərdə vətəndaşlara göstərilir ki, idmanın hansı növünü, hansı hərəkətləri ev şəraitində edə bilər. Amma hesab edirəm ki, bu, kifayət deyil. İdman kütləvi xarakter almalıdır. Ona görə yox ki, biz daha çox medallar qazanmaq əzmindəyik, - halbuki, bu da vacibdir, - ona görə ki, bizim millətimiz sağlam olsun, xəstələnməsin. İdmanla məşğul olan insanlar, buradakı idmançılar bunu öz həyatlarında görürlər. Baxmayaraq ki, iş qrafikim çox gərgindir, mən idmanla müntəzəm, fasiləsiz məşğul oluram. Bəlkə Azərbaycanda məndən çox işləyən adam yoxdur, ancaq buna baxmayaraq, vaxt tapıb idmanla müntəzəm məşğul oluram və bunun xeyrini görürəm. Ona görə mənim tövsiyəm budur”.
Prezident onu da qeyd edib ki, böyük şəhərlərdə idman komplekslərimiz var, ancaq kənd yerində bu yoxdur: “Bəzi ucqar kəndlər var. Ona görə kənd idmanının inkişafı üçün xüsusi proqram tərtib edilməlidir, buna diqqət verilməlidir. Rayon idman yarışları keçirilsin. Bu həm idmanın inkişafına xeyir verər, həm də idmanın kütləviliyini təmin edər”.
Görünən odur ki, idmanın kütləviləşməsi üçün bütün imkanlar səfərbər edilməlidir. Bu işin təkcə dövlətin üzərində olması yetərli deyil. Ölkədəki digər təsisatlar da idmanın kütləviləşməsinə öz töhfəsini verməlidir. Bütün bu deyilənlərin fonunda maraqlıdır, ölkədə idmanın kütləviləşdirilməsində bütün potensiallardan istifadə edilirmi?
“Sözügedən sahələrdə fəallıq artarsa, o zaman ölkədə idmanın kütləviliyi bir qədər də artacaq”
Məsələyə münasibət bildirən Azərbaycan Dövlət Bədən Tərbiyəsi və İdman Akademiyasının idman işləri üzrə prorektoru, professor Yusif Babanlının fikrincə, dövlət bu məsələdə üzərinə düşən nə varsa onu edir: “Bu gün dövlət səviyyəsində idmana göstərilən diqqət və qayğı göz qabağındadır. Dövlətin qayğısı sayəsində Azərbaycanın hər bir regionunda olimpiya kompleksləri tikilib. Vətəndaşlar həmin komplekslərin imkanlarından istifadə edirlər. Olimpiya komplekslərinin gənclərin xidmətinə verilməsinin özü Azərbaycanda idmanla bağlı kütləviliyin artırılmasına dövlətin verdiyi dəstəkdir. Dövlətin yaratdığı şəraitin nəticəsidir ki, idman sahəsində uğur qazanan idmançıların sayı artır. Cənab Prezident Olimpiya Komitəsinə rəhbər seçiləndən sonra ölkədə idmana olan maraq artdı”.
Y.Babanlının hesab edir ki, idmanın kütləviləşməsində media, QHT-lər və digər təsisatlar öz imkanlarından tam istifadə etməlidirlər: “Hesab edirəm ki, bu sahələrdə müəyyən görüləsi işlər var. Xüsusən də media idmanın kütləviləşməsi üçün öz imkanlarını daha da artırmalıdır. İdman səhəsində elə mütəxəssislər var ki, onlara şərait yaradılmalıdır. Fikrimcə, bu sahədə kompleks işlərin görülməsi idmanın kütləviləşməsinə öz töhfəsini verə bilər. Bir neçə adamla kifayətlənmək olmaz. Tanınmış şəxslər də bununla bağlı çağırışlar etməli, idmanın nə qədər insan sağlamlığı üçün önəmli olduğunu vurğulamalıdırlar. Hesab edirəm ki, hələlik bütün bunlardan idmanın kütləviləşdirilməsində tam istifadə edilmir. Ancaq sözügedən sahələrdə fəallıq artarsa, o zaman ölkədə idmanın kütləviliyi bir qədər də artacaq”.
Vidadi ORDAHALLI
