İnsanı ölümə aparan yol… Kimi bu yola düşməkdən ötrü 3 manatından, kimi isə 100 manatından keçməli olur. Söhbət alkoqollu içki bazarından gedir. Danılmaz faktdır ki, son zamanlar şadlıq evlərində zəhərlənmə hallarının sayı durmadan artmaqdadır. Əsas səbəb spirtli içkilərdir.
Hazırda satışa çıxarılan spirtli içkilərin çoxunun üzərində saxlama müddəti göstərilmir. Mütəxəssislər köhnə spirtli içkidən istifadənin olduqca zərərli olduğunu və hətta insanın dünyasını dəyişməsinə səbəb ola biləcəyini deyirlər. Bu baxımdan spirtli içki bazarına dövlət tərəfindən nəzarət bir xeyli gücləndirilib. Paytaxtın ayrı-ayrı yerlərində aparılan reydlərin nəticələri də belə deməyə əsas verir ki, bu məhsulların bir çoxu istifadə müddətini başa vurub. Təbii ki, bu da məhsulun keyfiyyətinə birbaşa təsir göstərir. İstifadə müddəti bitmiş, keyfiyyəti aşağı olan bu spirtli içkilər isə zəhərlənmələrin sayını xeyli artırır.
Qeyd edək ki, aksiz markası olmadan və ya saxta aksiz markası ilə markalanmış məhsulların satışı, aksiz markalarının saxtalaşdırılması, istehlak bazarına qanunsuz istehsal olunmuş məhsulların çıxarılması qanunvericiliklə qadağandır. Bununla belə, son zamanlar vergi orqanlarına daxil olan əməliyyat məlumatları əsasında müəyyən edilib ki, ölkə ərazisində fəaliyyət göstərən bir sıra ictimai iaşə obyektlərində, xüsusilə şadlıq evlərində vətəndaşlara qanunsuz istehsal edilmiş və saxta aksizli, o cümlədən, kustar üsulla hazırlanmış alkoqollu içkilər təqdim edilir.
Qeyd etdiyimiz kimi, son zamanlar spirtli içkidən zəhərlənənlərin sayı artır. Elə bu günlərdə Bakıda 3 nəfər texniki spirtli içkidən zəhərlənib.
Nərimanov Rayon Prokurorluğunun yaydığı məlumatda qetd olunur ki, zərərçəkənlər arasında Nərimanov rayonu 18-ci Polis Bölməsinin cinayət axtarış şöbəsinin rəisi, 32 yaşlı Bayramov Sərxan Niyazi oğlu da var. Polis dekabrın 23-də Klinik Tibbi Mərkəzdə vəfat edib. İlkin araşdırma zamanı məlum olub ki, dekabrın 21-də axşam saatlarında müstəntiq və dostları Koroğlu Rəhimov küçəsində yerləşən restoranda spirtli içki içiblər. Sonra onlar Tbilisi prospektində yerləşən başqa bir iaşə müəssisəsinə gediblər. Burada S.Bayramov və dostu Həmzəyev Cəlal Ələmdar oğlu özlərini pis hiss ediblər və “zəhərlənmə” diaqnozu ilə xəstəxanaya yerləşdiriliblər: Sərxan Bayramov Klinik Tibbi Mərkəzə, Cəlal Həmzəyev isə 3 saylı şəhər klinik xəstəxanasına. Məlumata görə, əməliyyatçının dostu C.Həmzəyevin vəziyyəti ağırdır, hər iki gözü kor olub. Əldə edilən məlumatlara görə, gənclər viski içiblər və yeraltı sexlərdə sənaye spirtindən hazırlanan bu içkidən zəhərlənmə ehtimalı yüksəkdir.
Dekabrın 24-də axşam saatlarında texniki spirtdən zəhərləndiyi iddia edilən başqa bir şəxsin cəsədi Səbail rayonu ərazisindəki morqa çatdırılıb. Meyitin 1995-ci il təvəllüdlü Mustafayev Mustafa Teymur oğluna məxsus olduğu ortaya çıxıb. M.Mustafayevin vəziyyəti Səbail rayonundakı restorana baş çəkdikdən sonra pisləşib. O, Toksikoloji Mərkəzə aparılıb və bir müddət sonra orada ölüb.
Ümumiyyətlə, son zamanlar spirtli içkidən zəhərlənənlərin sayı sürətlə artır. Bunun da səbəbi spirtli içki sektorunda saxta alkoqollu içkilərin olmasıdır.
“…spirtli içkilərdə saxlanma müddətinin olmaması təhlükəli olmasının göstəricisidir”
Saxta spirtli içkilərdə bağlı “Bakı-Xəbər”ə danışan Azad İstehlakçılar Birliyinin (AİB) sədri Eyyub Hüseynov bildirdi ki, əmtəə bazarında külli miqdarda xarici ölkə brendləri adı altında spirtli içkilər hazırlanır: “Spirtli içkilər bazarı ölkənin ən çox çirklənmiş saxta mallar olan bazarıdır. Təəssüf ki, bu belədir. Spirtli içki bazarının təxminən 50%-i saxta və ya standartlara uyğun deyil. Spirtli içkilər bazarın ən çox çirklənmiş sektorudur. Əhali bilməlidir ki, araqların saxlanma müddəti bir ildən, konyaklar 3 ildən, şərablar isə 6 aydan artıq deyil. Monitorinq apardığımız zaman məlum olub ki, spirtli içkilərin 95 faizinin üzərində buraxılma tarixi yazılmayıb. Yaxud yerli spirtli içkilərin üzərində müddətsiz yazılıb. Bu o deməkdir ki, mağazada satılan spirtli içkilər ağır metallarla zənginləşdirilmiş içkilərdir. Bura istər xaricdən gətirilən, istərsə də daxildə istehsal olunan içkilər daxildir. Yəni saxlanma müddətinin olmaması spirtli içkinin təhlükəli olmasının göstəricisidir. Bakı ətrafında heç bir üzüm plantasiyası olmadığı halda, naməlum mayelərdən spirtli içki istehsal edən müəssisələr var. Xaricdən gətirilən içkilərlə də bağlı problemlər yaşanır”.
Günel CƏLİLOVA
