Qırğızstan mətbuatı xəbər verir ki, 24 dekabr 2019-cu ildə Bişkek şəhərində Azərbaycan Respublikası tərəfindən inşa ediləcək 550 yerlik müasir tipli məktəb binasının təməlqoyma mərasimi keçirilib.
Təməlqoyma mərasində Azərbaycan Respublikasının Qırğız Respublikasında səfiri Hidayət Orucov, Bişkek şəhərinin meri Əziz Surakmatov, vitse-meri Ulanbek Azıqaliyev, Joqorku Kenişin (Parlamentin) deputatları, Bişkek şəhərinin Oktyabr rayonunun icra başçısı Maksim Sıtnikov, diasporamızın nümaəndələri, şəhər sakinləri və KİV nümayəndələri iştirak edib.
Yeni inşa olunacaq məktəbin layihəsi ilə tanış olduqdan sonra qəsəbə sakinləri, Qırğız Respublikasının KİV-lərlə görüşən səfir Hidayət Orucov qarşıdan gələn Yeni İl münasibətilə və bu əlamətdar hadisə münasibətilə onları təbrik edib.
Təməlqoyma mərasimini Bişkek şəhəri Oktyabr rayonunun icra başçısı Maksim Sıtnikov açaraq məktəb tikintisinin sakinlər üçün böyük və mühüm hadisə olduğunu bildirib.
Bişkek şəhər meri Əziz Surakmatov çıxışında məktəbin Azərbaycan xalqının hədiyyəsi olduğunu bildirib və məktəbə mərhum prezident Heydər Əliyevin adının veriləcəyini qeyd edib, Azərbaycan xalqına və Prezident İlham Əliyevə belə bir hədiyyə üçün təşəkkür edib. Mer təməlqoyma mərasiminin Azərbaycan Prezidenti İlham Əliyevin doğum günündə baş tutmasının çox simvolik olduğunu vurğulayaraq, şəhər əhalisi adından İlham Əliyevi təbrik edib, ona möhkəm can sağlığı və uğurlar arzulayıb. Əlavə edib ki, Prezident İlham Əliyev atasının işini layiqincə davam etdirir. Bu nəcib ideyanın yerinə yetirilməsi üçün uzun bir yol fəth edildiyini deyən mer bildirib ki, məktəbin eskiz və işçi layihəsi ən müasir tələb və standartlar nəzərə alınaraq hazırlanıb. Məktəbdə böyük akt və idman zalları, yeməkxana, kitabxana, dərsdənkənar fəaliyyətlər üçün müasir sinif otaqları və tibb məntəqəsi nəzərdə tutulduğu barədə məlumat verən Əziz Surakmatov Nizami Gəncəvi hikmətlərindən sitat gətirərək deyib:“İnsalara faydalı olmağa çalışın”.
Eyni zamanda o, məktəbin Bişkek şəhərinə və Qırğız Respublikasına real fayda gətirəcəyinə əminliyini ifadə edən səfir Hidayət Orucova layihənin həyata keçirilməsinə verdiyi böyük töhfəyə görə təşəkkür edərək, Azərbaycan xalqına sülh və firavanlıq diləyib.
Səfir Hidayət Orucov Prezident İlham Əliyevin müraciətini mərasim iştirakçılarına çatdırıb.
Bildirib ki, məktəbin tikiləcəyi ərazini müəyyənləşdirəndə 5 yer təqdim olundu, lakin o şəhərin meri ilə yerin müəyyənləşdirməsi məsələsini dövlət başçılarına məruzə etdikdə, hər iki prezident məktəbin binasının Oktyabr rayonunda tikilməsinə üstünlük verdi. Çünki 30 min əhalisi olan mikrorayonda 3 növbədə işləyən cəmi bir məktəb var, buna görə qardaş ölkələrimizin prezidentləri ən düzgün və məntiqli qərar verdilər və indi ümumtəhsil orta məktəbin təməlinin qoyulmasının şahidi oluruq.
Həmçinin səfir bu məktəbdə işləyəcək müəllimlər, burada təhsil alan uşaqlar və gələcək nəsillərin bu əlamətdar hadisəni xatırlayacağına əminliyi ifadə edib. Xüsusilə vurğulayıb ki, ölkələrimiz arasında əməkdaşlığın genişləndirilməsi və dərinləşdirilməsi qardaş dövlətlərimizin başçılarının - Azərbaycan Prezidenti İlham Əliyevin və Qırğızıstan Prezidenti Sooronbay Jeenbekovun müdrik və uzaqgörən siyasəti üçün prioritet istiqamətlərdir. Əminik ki, ölkələrimiz arasındakı münasibətlər liderlərimizin rəhbərliyi altında genişlənəcək və möhkəmlənəcək.
Qırğızıstan Respublikasına xüsusi xidmətlər üçün təqaüdçü, polkovnik Abdırasul Mıraliyev ictimaiyyət adından məktəbin tikintisini xalqlarımızın qardaşlıq bağlarının bir-birinə yaxın olmamasının daha bir sübutu və təsdiqi olduğunu bildirib, Heydər Əliyevin "Manas" dastanının 1000 illiyinə həsr olunmuş təntənəli yığıncaqda çıxışından sitat gətirərək deyib:"Manas"ın dili bizim hamımızın dilidir. Biz bir kökdən, bir dildən olan xalqlarıq”.
Məktəb binasının təməli Bişkek meri Ə.Surakmatov və səfir Hidayət Orucov tərəfindən qoyulub. Sonra onlar jurnalistlərin çoxsaylı suallarını cavablandırıb.
