Elə bir ailə tapmaq çətindir ki, heç olmasa həftədə bir-iki dəfə taksi xidmətindən istifadə etməsin. Paytaxtda taksi fəaliyyəti göstərən şirkətlər çoxaldıqca və ondan istifadə edənlərin sayı artdıqca, onların xidmət haqqının aşağı salınması, daha keyfiyyətli xidmət göstərməsi məsələsi gündəmdədir.
Bakıda fəaliyyət göstərən saysız taksi şirkətinin keyfiyyətli xidmət göstərməsi bir yana, qiymətləri də günü-gündən artırması narahatlıq doğuran məqamlardandır. Məsələ burasındadır ki, eyni ünvana hər taxsi şirkəti fərqli qiymətə aparır, taksi şirkətlərinin hərəsi özü üçün bir tarix müəyyən edir. Hətta eyni şirkətdən gün ərzində eyni ünvana taksi sifariş verdikdə qiyməti fərqli deyirlər.
Yeri gəlmişkən qeyd edək ki, taksi şirkətlərinin özlərinə xidmət tarixi müəyyən etməsi, eyni ünvana gediş haqqının müxtəlif olması ciddi narazılıqlar doğurur.
Onu da vurğulayaq ki, Bakı Nəqliyyat Agentliyi (BNA) paytaxtda fəaliyyət göstərən taksilərdə vahid tarifin tətbiq olunması ilə bağlı təklif də irəli sürüb, lakin taksi şirkətləri bunu birmənalı qarşılamayıb.
İqtisadçılar isə hesab edirlər ki, vahid tarif müəyyən ediləcəyi təqdirdə qiymətlər bahalaşacaq, taksi xidmətləri arasında rəqabət olmayacaq. Son zamanlar taksi şirkətlərinin eyni ünvana fərqli qiymətlərə aparması müzakirə edilir.
“Bakı-Xəbər” olaraq ünvan kimi Bakı Dövlət Universitetindən (BDU) Azərbaycan Dövlət Tibb Universitetinə kimi ərazini seçdik, bir neçə taksi şirkəti ilə əlaqə saxladıq.
İlk olaraq tez-tez istifadə etdiyimiz *8555 taksi xidməti ilə əlaqə saxladıq. Xidmətdən bildirdilər ki, sözügedən ünvana xidmət haqqı 3 manat 30 qəpikdir. *2111-dən isə xidmət haqqının 2 manat 90 qəpik olduğu bildirildi. *9933-də qiymət 2 manat 52 qəpik oldu. Sözügedən ünvana “Ekonom taksi” (*9111) 3, “Sity taksi” (8844) 3 manat 70 qəpiyə aparır.
Daimi oxucularımızdan biri bizimlə söhbətində çox maraqlı bir statistika təqdim etdi. O qeyd etdi ki, bu günlərdə “Memar Əcəmi” metrostansiyasından “Nəriman Nərimanov”a kimi olan ərazi üçün “Salam taksi” (*9933) – 2,67 manat, “Bakı taksi” (0635) – 5,85 manat, “189 Taxi” (*189) – 4,20 manat, “Sity taksi” (*8844) – 3,98 manat, “Ekonom taksi” (*9111) – 3,90 manat, “Taxi24” (*2424) – 3,80 manat, “Felix Taxi” (*5959) – 3.69 manat, “Elit taxi” (*6969) – 3,53 manat, “OK taxi” (*3003) – 3,51 manat, “Ulduz taksi” (*5000) – 3,51 manat, “Çiçək taksi” (*5151) – 3,10 manat tələb edib.
Bu da bizim paytaxtımızda fəaliyyət göstərən taksi şirkətlərinin eyni ərazilərə fərqli xidmət qiymətləri... Hesab edirik ki, şirkət taksiləri üçün xüsusi gediş-gəliş tarifləri müəyyən edilməli və əlaqədar qurumlar onların işinə, o cümlədən də qiymət tariflərinə ciddi nəzarət etməlidirlər.
İradə SARIYEVA
