Ölkədə aparılan islahatlar fonunda dövlətin əsas məqsədlərindən biri də onun fəaliyyətinə ictimai nəzarətin təmin olunmasıdır. Bunun üçün isə müvafiq zəmin məhz ictimai iştirakçılığın təmin edilməsidir.
Prezident İlham Əliyev də yeni təyin etdiyi rayon icra başçılarını qəbul edərkən kadr islahatlarının yerli icra orqanlarında ictimai nəzarətə “qapı açmalı” olduğunu vurğulayıb. Ölkə başçısı bildirib ki, ictimai nəzarət rayonlarda daha güclü olmalıdır: “Buna nail olmaq üçün müvafiq təkliflər hazırlayın. İctimaiyyəti bizim ümumi işimizə cəlb etməliyik. Həm ictimaiyyət nümayəndələri öz səylərini göstərsinlər, həm də sizin işinizə, dövlət orqanlarının işinə nəzarət etsinlər. Əgər biz buna nail olsaq, onda hər hansı bir xoşagəlməz hadisə baş verərsə, biz dərhal ondan xəbər tutub lazımi tədbirləri görəcəyik. Bir çox hallarda rayonlardan gələn məlumat belədir ki, hər şey əladır, hər şey yaxşıdır, biz burada bütün işləri ən yüksək səviyyədə qururuq. Amma dərindən baxanda görürsən, belə deyil, bəzi icra başçıları tərəfindən yalan məlumatlar ötürülür”.
Son günlər bəzi rayon icra başçıları ilə bağlı baş verən neqativ halların ictimailəşməsi bu mövzunu yenidən gündəmə gətirib. Hesab edilir ki, şəhər, rayon icra hakimiyyətlərinin fəaliyyətinə ictimai nəzarət şuralarının yaradılması yerli icra hakimiyyəti orqanlarının işinə böyük fayda verə bilər. İctimai əsaslarla işləyən şuraların fəaliyyəti ictimai nəzarəti həyata keçirməklə yanaşı, dövlət qurumlarının işinə təmənnasız fayda verməkdən ibarət olacaq və şəffaflığın təmin olunmasına böyük faydası dəyəcək. Şəffaflığın tam təmin olunması üçün şəhər, rayon icra hakimiyyətlərinin fəaliyyətinə ictimai nəzarət şuralarının yaradılması ideyasına ekspertlər necə baxırlar?
Sahib Məmmədov: “Olmağını məqsədəuyğun sayıram”
“Deyilən sayda QHT olmasa, həmin şuraların yaradılmasının başqa mexanizmi varmı” sualına ekspertin cavabı belə oldu: “Yalnız QHT-lərdən söhbət getmir. Vətəndaş cəmiyyəti təmsilçilərindən söhbət gedir. 5 adda strukturun təmsilçiliyi olmalıdır. Bunlar: QHT-lər, KİV, həmkarlar ittifaqları, bələdiyyələrin məhəllə komitələri, bir də vətəndaşların təşəbbüs qruplarıdır. Belə şuraların formalaşması çox yaxşıdır. Qeyd edim ki, ictimai iştirakçılığın bundan başqa da 4 növü var. O da təsdiq oluna bilər. Bunun üçün icra hakimiyyətləri əhalinin rəyilə hesablaşmalıdırlar. Məsələn, rayonda hansısa parkı salırlar, bunun üçün əhalinin rəyini öyrənirlər. Bizdə belə hallar yoxdur. Demirəm ki, bu şuralar yaranan kimi hər şey şəffaflaşacaq. Amma olmağını məqsədəuyğun sayıram. Biz QHT-lərə Dövlət Dəstəyi Şurası partnyor qurum kimi ABŞ-ın Beynəlxalq İnkişaf Agentliyi ilə 33 rayonda belə şuraların təşkili üçün təlimlər təşkil etdik. Həmin vaxt mən layihənin ekspertiydim. Cəmi 1-2 rayon buna maraq göstərdi. Qalanlarında yaranmadı. Hesab edirəm ki, hazırda buna böyük ehtiyac var”.
Məhəmmədəli QƏRİBLİ
