Azərbaycanın Los Ancelesdəki Baş Konsulluğundan “Bakı-Xəbər”ə verilən xəbərə görə, Konsulluğun və YUNESKO üzrə Azərbaycan Respublikasının Milli Komissiyasının birgə dəstəyilə ABŞ-ın Los Anceles şəhərində Azərbaycan mətbəxinə həsr olunmuş geniş tədbir keçirilib.
Əsasən YUNESKO tərəfindən Bəşəriyyətin qeyri-maddi mədəni irsi siyahısına salınmış Azərbaycanda dolmanın hazırlanma qaydasının təqdimatını özündə əks etdirən tədbirdə 200-ə yaxın qonaq, o cümlədən müxtəlif xarici ölkələrin baş və fəxri konsulları, siyasi xadimlər, tanınmış elm və mədəniyyət xadimləri, jurnalistlər, Azərbaycan icması fəalları, həmçinin dost türk, yəhudi, Pakistan, İran, Koreya, Vyetnam və latino icmalarının rəhbərləri iştirak edib.
Azərbaycan və ABŞ-ın dövlət himnlərinin ifası ilə başlayan tədbiri giriş sözü ilə açan Azərbaycanın Los Ancelesdəki baş konsulu, Los Anceles Konsulluq Korpusunun duayeni Nəsimi Ağayev qonaqları salamlayaraq, bu mədəniyyət tədbirində hər kəsi görməkdən məmnun olduğunu deyib. Bu il YUNESKO üzrə Azərbaycan Respublikasının Milli Komissiyasının yaradılmasının 25 illiyinin qeyd olunduğunu bildirən N.Ağayev Azərbaycan mətbəxinin zənginliyi və çoxşeşidliyinin ölkəmizin əsrarəngiz təbiətindən, flora və faunasının müxtəlifliyindən qaynaqlandığını vurğulayıb. O, Azərbaycanda dolmanın bişirilmə ənənələrinin qədim tarixə malik olduğunu və bu ənənələrin həmrəylik, hörmət və qonaqpərvərliyi özündə ehtiva etdiyini diqqətə çatdırıb. Baş konsul 2017-ci ildə Azərbaycan dolmasının bişirilməsi və paylaşılması ənənəsinin YUNESKO-nun Bəşəriyyətin qeyri-maddi mədəni irsi siyahısına daxil edildiyini qeyd edib. N.Ağayev bunun və ölkəmizin digər qeyri-maddi mədəni irs nümunələrinin həmin siyahıya daxil edilməsinin Azərbaycanın Birinci Vitse-Prezidenti, YUNESKO-nun xoşməramlı səfiri Mehriban Əliyevanın gərgin və məqsədyönlü fəaliyyəti sayəsində nail olunduğunu vurğulayıb.
Sonra çıxış edən Kaliforniyanın Örvayn Şəhər Şurasının üzvü Fərəh Xan bu ilin yazında ölkəmizə səfər edərək, Azərbaycan haqda ən xoş təəssüratlarla geri döndüyünü, səfər zamanı Azərbaycan mətbəxinə heyran qaldığını və mətbəximizdə ən çox sevdiyi yeməyin məhz dolma olduğunu diqqətə çatdırıb.
Ardınca Kaliforniyanın San Dieqo şəhərində fəaliyyət göstərən “Cafe 21” Azərbaycan restoranının sahibi İmran Cavadov ölkəmizdə dolmanın birişilmə ənənələri və mətbəximizin müxtəlif dolma növlərindən bəhs edən təqdimatla çıxış edib.
Tədbir Azərbaycan musiqisindən nümunələr, eləcə də rəqs ustası Ləman Musayevanın ifasında Azərbaycan rəqslərinin ifası ilə davam edib. Tədbir iştirakçıların gurultulu alqışları ilə qarşılanıb. Qonaqlar “Cafe 21” restoranı tərəfindən hazırlanmış Azərbaycan mətbəxinin müxtəlif ləziz təamları, o cümlədən müxtəlif dolma çeşidləri ilə tanış olublar.
Tədbirin qısa video-yazısına bu linkdə baxmaq olar: https://youtu.be/yMx-BKEqhM4
