Azərbaycanda həyata keçirilən sosial layihələr cəmiyyətin bütün sferalarını əhatə edir. Cəmiyyətin elə təbəqələri var ki, onların sosial və ictimai xidmətlərlə təmin olunmasına böyük ehtiyac yarandığından, dövlət bu istiqamətdə layihələr reallaşdırır. Ölkəmizdə yaşlı nəsillə bağlı həyata keçirilən qayğı siyasəti özünü bir neçə tərəfdən göstərir. Bir müddət əvvəl ahılların günərzi sosial xidmətlərlə təmin edilməsi ilə bağlı mərkəzlər yaradıldı və burada ahıllara hərtərəfli qayğı göstərilir. İndi isə ölkəmizdə Ahıllar Mərkəzinin yaradılması gündəmə gəlib.
Əmək və əhalinin sosial müdafiəsi naziri Sahil Babayev “Sosial xidmətlər sahəsində qeyri-hökumət təşkilatları ilə əməkdaşlıq: nailiyyətlər və perspektivlər” mövzusunda keçirilən tədbirdə bildirib ki, 10-dək Ahıllar Mərkəzinin açılışı nəzərdə tutulur: “Sosial sifarişlərin icrasında çevikliyi qorumaq çox önəmlidir. Çevikliyi qoruya bilməsək, layihələrin icra səviyyəsi ciddi şəkildə aşağı düşəcək”.
S.Babayevin sözlərinə görə, ilin ilk 2-3 ayı ərzində bütün layihələr hazırlanıb təqdim olunmalıdır ki, il ərzində xidmətlər göstərilə bilsin: “Ona görə də QHT-lərlə birgə sosialyönümlü layihələrin mexanizmlərini daim təkmilləşdirməyə hazırıq. Düşünürük ki, bu sahədə çox ciddi nailiyyətlər var”.
S.Babayev bildirib ki, bu layihələrin sayının artırılmasına ehtiyac dəfələrlə artıqdır: “İcra olunan layihələr çərçivəsində 10-dək Ahıllar Mərkəzinin açılışı nəzərdə tutulur. Lakin ölkənin ən azı 60 rayonunda belə mərkəzin yaradılmasına ciddi ehtiyac var. Bundan başqa, görmə qabiliyyəti zəif olan uşaqlar üçün Surdoloji Mərkəzlərin sayı cəmi 10-15 dənədir. Belə mərkəzlər hər bir rayonda olmalıdır. Günərzi mərkəzlərin sayının 70 olmasına baxmayaraq, bu mərkəzlərə ehtiyac dəfələrlə artıqdır”.
“Dövlətin Ahıllar Mərkəzinin yaradılması ilə bağlı addımlar atmasını bir ziyalı, sosioloq kimi alqışlayır və dəstəkləyirəm”
Tanınmış sosioloq, professor Əhməd Qəşəmoğlu “Bakı-Xəbər”ə bildirdi ki, Azərbaycanda Ahıllar Mərkəzinin açılmasına zərurət var. “Ahıllar Mərkəzinin yaradılması ölkəmiz üçün ən vacib məsələlərdən biridir. Mən özüm də bir sosioloq olaraq illərdir bu istiqamətdə təbliğat aparıram. Hətta bununla bağlı layihələr də həyata keçirmək istəyirdik. Lakin bu alınmadı. Ancaq indi dövlətin bu sahədə konkret addım atması və belə bir mərkəzlərin yaradılacağını elan etməsi çox müsbət haldır. Əvvəllər Azərbaycanda belə bir ənənə vardı ki, valideyn yaşlaşanda, xəstələnib yatağa düşəndə, digər problemlərlə üzləşəndə ailənin gənc üzvləri ona baxır, qayğı göstərirdilər. Bu, son illərə qədər belə idi və hər kəs bu ənənəyə sadiq qalırdı. Hazırda isə bu sahədə vəziyyət dəyişib, indi bir çox ailədə yaşlılara münasibət fərqlidir. Ailələrdə ahıllara münasibətin dəyişdiyi bir dövrdə ölkədə yeni tipli Ahıllar Mərkəzinin yaradılmasına ciddi ehtiyac yaranıb. Hesab edirəm ki, yeni yaradılacaq Ahıllar Mərkəzi qocalar evlərindən çox-çox fərqlənəcək, çünki qocalar evləri türmə kimi bir şeydir”.
ABŞ-da, Skandinaviya ölkələrində Ahıllar Mərkəzinin ahılların hərtərəfli təmin olunduğu, potensialından istifadə edildiyi məkanlardır. İnsanlar yaşlaşanda həmin məkanlara getdiyini və burada onun səhhətinə, qidalanmasına ciddi əhəmiyyət verildiyini, sosial əlaqələr yaratmalarına şərait yaradıldığını deyən Ə.Qəşəmoğlunun bildirdiyinə görə, vaxtilə Hollandiyanın bu sahədə təcrübəsini xeyli araşdırıblar. “Dövlətin Ahıllar Mərkəzinin yaradılması ilə bağlı addımlar atmasını bir ziyalı, sosioloq kimi alqışlayır və dəstəkləyirəm. Bunun Azərbaycan üçün çox əlahiddə əhəmiyyəti var. Bu məsələni tez-tez tələbələrimlə də müzakirə edirəm. Həmin mərkəzlərə gedən ahılların potensialından da istifadə etmək lazımdır. Onlar özlərini atılmış kimi hiss etməməlidirlər. Ola bilsin, onların arasında hansısa bir sənətin gözəl bilicisi olar. Onun potensialından istifadə edilməlidir. Şagirdlərlə onların görüşlərini təşkil edə bilərik, bu da şagirdlər üçün faydalı ola bilər. Ahıllar Mərkəzini müasir standartlara uyğun qurmaqla yanaşı, onlara fiziki və mənəvi cəhətdən mexanizmlər yaradılmalıdır. Bu istiqamətdə işlər görmək lazımdır. Nazirlik bu istiqamətdə addım atıbsa, biz də əlimizdən gələn dəstəyi verməyə hazırıq” - deyə Ə.Qəşəmoğlu bildirdi.
İradə SARIYEVA
