Bakı şəhəri, Xətai rayonu, 95 nömrəli tam orta məktəbdə Azərbaycanın Milli Qəhrəmanı Əlif Hacıyevin xatirəsinə həsr olunmuş “Əlif Hacıyev – Qarabağın cəngavəri” adlı tədbir keçirilib.
Tədbirdə Xətai rayon İcra Hakimiyyəti İctimai-siyasi və humanitar məsələlər şöbəsinin müdiri Pənah İmanov, ATU-nun kafedra müdiri, tarix elmləri doktoru, professor Şikar Qasımov, tarix üzrə fəlsəfə doktoru, əməkdar jurnalist, polkovnik Hikmət Xudiyev, YAP Pirallahı rayon təşkilatının sədri Hikmət Şikarov, Xocalı rayon İcra Hakimiyyətində İctimai-siyasi və humanitar məsələlər şöbəsində baş məsləhətçi, Bakı şəhəri üzrə nümayəndə Xəlil Vəliyev, Əlif Hacıyevin döyüş dostu və silahdaşı Nazim Hüseynov, Azərbaycanın Milli Qəhrəmanı Bəxtiyar Allahverdiyev, pedaqoji elmlər doktoru, professor Akif Abbasov, 3c sinif rəhbəri Ofelya Babayeva çıxış edərək Əlif Hacıyevin həyatından və torpaqlarımızın müdafiəsi zamanı göstərdiyi şücaətdən danışıblar, qeyd olunub ki, Əlif Hacıyev qısa ömür yaşasa da, canını vətən yolunda fəda etməsi ilə özündən sonra böyük şəhidlik məktəbi qoydu. İndi hər bir azərbaycanlı onun mübarizə dolu həyatı ilə fəxr edir.
Xətai rayonu 95 nömrəli tam orta məktəbin direktoru Elçin Abdullayev çıxışında ümummilli lider Heydər Əliyevin “Hamımızın ümumi vəzifəmiz xalqımızda vətənpərvərlik, vətənə, torpağa, millətə sədaqət, vətən yolunda şəhidliyə hazır olmaq hisslərini formalaşdırmaq, inkişaf etdirmək və təbliğ etməkdir” müdrik kəlamını xatırlayaraq qeyd edib ki, rəhbərlik etdiyi məktəbdə vətənpərvərlik mövzusunda mütəmadi olaraq keçirilən tədbirlərdə məqsəd respublikamızın ərazi bütövlüyü uğrunda canından keçən və şəhidlik zirvəsinə ucalan mərd oğul və qızlarımızın vətənpərvərliyini, onların nəsillərə örnək ola biləcək həyat yolunu təbliğ etməkdir. Məktəb direktoru bildirib ki, Əlif Hacıyev kimi vətənimizin qeyrətli övladlarının Qarabağ müharibəsində göstərdiyi şücaətlərin təbliğ olunması erməni işğalçıları tərəfindən zəbt olunmuş ərazilərimizin Azərbaycan Prezidenti, Ali Baş Komandan İlham Əliyevin rəhbərliyi ilə geri qaytarılacağı və şəhidlərimizin qisasının alınacağı günün uzaqda olmadığına bir daha əminlik yaradır.
3c sinif şagirdlərinin vətənpərvərlik mövzusunda nümayiş etdirdiyi ədəbi-bədii kompozisiya, jurnalist İlham Cəmiloğlunun ssenari müəllifi olduğu “Əlif Hacıyev – Qarabağın cəngavəri” filmi, qəhrəmanın ömür yolunu əks etdirən foto-stend, muğam ustalarının ifaları anım tədbirinə xüsusi rəng qatıb. Müharibə şahidlərini dinləmək, canlı Milli Qəhrəmanla ünsiyyətdə olmaq şagirdlərdə məmnunluq hissi yaradaraq onlarda vətən sevgisini, vətənpərvərlik hisslərini artırıb.
Tədbirdə Əlif Hacıyevin bacısı Şükufə Hacıyeva cıxış edərək qeyd edib ki, adi bir təqvim günündə qardaşı Əlif Hacıyevin bu cür ehtiramla anılması dövlətin, ölkə Prezidenti İlham Əliyevin rəhbərliyi ilə aparılan siyasətin, şəhidlərimizə, Milli Qəhrəmanlarımıza, şəhid ailələrinə sonsuz ehtiramın nəticəsidir.
Hikmət CƏMİLZADƏ
