Bildiyimiz kimi, Prezident İlham Əliyevin yanında pambıqçılıq mövsümünün yekunları və 2020-ci ildə görüləcək tədbirlərlə bağlı müşavirə keçirilib.
Müşavirədə kənd təsərrüfatı sahəsinin inkişafı və problemlərinə dair bir sıra məsələlər müzakirə edilib, o cümlədən, bölgələrdə işsizliyin aradan qaldırılması üçün yaradılan ödənişli iş yerlərindən danışılıb. “...Təbii ki, bu rayonlarda işsizliklə bağlı problemlər uğurla həll olunur. Eyni zamanda, bizim çox gözəl indikatorumuz var. Bildiyiniz kimi, sosial müdafiəni gücləndirmək üçün biz indi 40 minə yaxın ödənişli ictimai yeri yaratmışıq, dövlət tərəfindən maliyyələşir. İş tapa bilməyən vətəndaşlar bu ictimai iş yerlərində işlə təmin olunurlar...” - deyə ölkə başçısı vurğulayıb.
İcra başçılarının talançılığı olmasaydı, ödənişli ictimai işlərin sayını 40 mindən hansı həddə qaldırmaq olardı?
“İcra strukturlarının səlahiyyətləri qanunlar çərçivəsində məhdudlaşdırılmalıdır”
Tanınmış iqtisadçı-ekspert Natiq Cəfərli “BakıXəbər”ə bildirdi ki, bəzi icra başçılarının yarıtmaz fəaliyyəti sahəsində bu kimi hallar baş verir: “Ümumiyyətlə, Azərbaycanda icra hakimiyyətlərinin iqtisadiyyatda, idarəetmədə oynadığı rola yenidən baxılmalı, onların səlahiyyətləri kifayət qədər azaldılmalı, bu təşkilatlar yalnız təsərrüfat işləri ilə məşğul olan bir quruma çevrilməlidirlər. İcra başçıları tərəfindən sosial-iqtisadi sahələrə müdaxilələr həddən artıq çoxdur. İcra hakimiyyəti stukturlarının uzun illərdir korrupsiya içində olması onların effektivliyini xeyli dərəcədə aşağı salıb. Prezidentin verdiyi qərar və sərəncamların, fərmanların, mərkəzi hökumətin verdiyi qərarların yerlərdə uyğulanması ciddi problemlər yaradır. Ona görə də burada söhbət yalnız ödənişli ictimai iş yerlərində getmir, ümumilikdə, bu kimi məsələlərin kökündən həll edilməsinə ehtiyac var. İcra strukturlarının səlahiyyətləri qanunlar çərçivəsində məhdudlaşdırılmalıdır. Əminəm ki, gələcəkdə Prezident səviyyəsində bu məsələ ilə bağlı ciddi qərarlar veriləcək. Amma qanunvericilik təşəbbüsünə ehtiyac var ki, icra hakimiyyətlərinin sosial-iqtisadi məsələlərə müdaxiləsi minimuma endirilsin. Bundan sonra regionlarda iqtisadi, sosial-ictimai məsələlərin həlli daha da gücləndirilə bilər. İndiki qanunvericilik çərçivəsində icra hakimiyyətlərinin səlahiyyətlərinin harada başlayıb, harada bitdiyi aydın deyil. Yerli icra strukturları da bundan öz məqsədləri, maraqları üçün istifadə edirlər” - deyə N.Cəfərli bildirdi.
N.Cəfərli hesab edir ki, icra başçılarının talançılığı olmasaydı və onlar öz işlərinə daha məsuliyyətlə yanaşsaydılar, ödənişli ictimai işlərin sayı 40 mindən çox olardı. “İcra hakimiyyətlərinin müdaxiləsi olmasaydı, ödənişli ictimai iş yerlərinin sayını 40 mindən iki dəfə artırıb təxminən 100 minə çatdırmaq olardı” - deyə N.Cəfərli bildirdi.
İradə SARIYEVA
