Yeni ilin gəlişinə sayılı günlər qalıb. Bu o deməkdir ki, artıq hər yerdə bayram hazırlıqları başlayır. Gül mağazaları, marketlər, bazarlarda yeni il aksesuarları alıcıların ixtiyarındadır. Lakin məhsulların daha ucuz satışı üçün paytaxtın müxtəlif ərazilərində yeni il yarmarkaları təşkil edilib. Əsasən metrostansiyaların çıxışında quraşdırılan bu çadırlarda bir məkanı bayrama hazırlamaq üçün hər şey var.
Bunu öyrənmək üçün üz tutduq yarmarkalara. Həftəiçi və səhər saatları olmasına baxmayaraq, "28 May" metrostansiyası ətrafındakı bayram çadırlarında alıcıların sayı heç də az deyil. Kimi şarlar şişirib deşik olub-olmadığına, kimi papağın uşağının başına uyğun olmasına, kimi də aksesuarların keyfiyyətinə baxır.
Yeni il bayramının əsas aksesuarlarından biri sayılan yolka ağacının satışına tək bayram çadırlarında deyil, şəhərin istənilən ərazisində rast gəlmək mümkündür. Müxtəlif ölçülü, xarici görünüşü belə fərqli olan yolka ağaclarının qiyməti də fərqlidir.
Bayram çadırlarında balaca ölçülü yolkaların qiyməti 10-15 manat, daha böyüklərin qiyməti isə 150-250 manat arasında dəyişir. Satıcıların sözlərinə görə, fərqin əsas səbəbi məhsulların istehsal olunduğu ölkələrə görədir: "Rusiya istehsalı olan yolkalar Çin istehsalı ilə müqayisədə daha bahadır. Bu da onun keyfiyyətinə təsir göstərir. Müştərilər qiymətinə görə Çin istehsalı olan yolkalara üstünlük verirlər”.
Ancaq dükanlarda satılan irihəcmli yolkaların qiyməti isə çadırlara nisbətdə çox bahadır. Hətta elə yolka var ki, onun satış qiyməti 1800-2000 manat arasında dəyişir.
Bayram çadırlarında milad ağacını bəzəyən rəngli oyuncaqların qiymətləri 1 manatdan 10 manata qədər dəyişir. Qutu şəklində oyuncaqlar isə 2-45 manat aralığında satılır. Eyni zamanda, bəzək işıqları keyfiyyətinə və ölçüsünə görə 5-12 manat arasında satılır.
Məlumdur ki, 2020-ci il siçan ili üstündə təhvil olunacaq. Bayram aksesuarları alanlar gələn ilin simvolu olan siçana böyük maraq göstərirlər. Bu oyuncağın qiyməti ölçü və musiqili olmasına görə 3 manatdan 30 manata qədər dəyişir.
Metrostansiyaların ətrafında qurulan bayram çadırlarında qapıya vurmaq üçün yeni il aksesuarlarının qiyməti bəzəyinə görə dəyişir. Qeyd etdiyimiz bayram çələnginin qiyməti 40 manat, amma 35-ə olanlar da var və daha az gözəgəlimlidirlər. Əl işi olan oyuncaqların qiyməti 17 manatdan başlayır. Satıcı deyir ki, oyuncaqların ən bahalısının qiyməti 180 manatdır. Yeni il aksesuarlarının, oyunacaqlarının isə ən ucuzunun qiyməti 5-7 manatdan başlayır.
Üzərində 2020 yazılan corabların qiyməti isə 5 manatdan başlayır. Üstəlik, iki corab alana uduşlu kupon da verilir. Şaxta baba geyimləri, papaqlarının qiyməti 7 manatdan ucuz deyil. Oyuncaqların qutusunu 3-4 manata da almaq olar, 15-20 manata da.
Bayramın əvəzolunmaz simvolu olan şaxta babanın qiyməti 15-50 manat, qar qız isə 20-35 manat aralığındadır.
Ümumiyyətlə, orta ölçülü Yeni il ağacını bəzəmək üçün maksimum 100-150 manat tələb olunur. Təbii ki, bu rəqəm alıcının istəyindən asılıdır. Yolkaların ölçüsü və oyuncaq miqdarına görə qiymətlər dəyişir.
Günel CƏLİLOVA
