20/11/2019 18:31
728 x 90

Ziyanlı sayılan Çin şprislərini Bakı apteklərindən necə yox etməli…

Adil Qeybulla: “Satışda olan saxta şprislər dərhal yığışdırılmalıdır”

img

Son zamanlar müxtəlif kütləvi informasiya vasitələrində keyfiyyətsiz şprislərin dövriyyəyə buraxılması barədə məlumatlar yer alıb. Artıq həmin məlumatlar öz təsdiqini tapıb. Qeyd olunur ki, satışda olan saxta şprislər Çin istehsalıdır və apteklərdən ucuz qiymətə əldə etmək mümkündür.

"Diamed" şpris istehsalı zavodunun direktoru Samirə Hüseynova jurnalistlərə açıqlamasında bildirib ki,  Azərbaycanda keyfiyyətsiz, mənşəyi məlum olmayan şprislər satılır: “Təəssüf ki, bu gün insanlar aptekə gedib Çin istehsalı olan ucuz şprislər alırlar. Onların da mənşəyi məlum deyil. Azərbaycan istehsalı olan şprislərin iç tərəfinin uc hissəsində qara rezin olmur. Şprisin iç tərəfində qara rezin olanda həmin şprislər tam steril sayılmırlar. Yəni 3 hissədən ibarət olan şprisin bir hissəsi steril deyil. Bu isə o deməkdir ki, şpris infeksiya mənbəyi ola bilər. Bizim zavodun istehsal etdiyi şprislər ikihissəlidir. Artıq Avropanın qabaqcıl ölkələri belə üçhissəli şprislərdən istifadə etmirlər. Azərbaycana gətirilən şprislərin əksəriyyətinin xammalı tibbi materiallar, yəni tibbi polimerlər deyil. Azərbaycan istehsalı olan şprislərdə isə tibbi xammaldan istifadə olunur. Şprisin iynələri Yaponiyanın qabaqcıl "Nipro Pharma " şirkətinə məxsusdur. İynələr Azərbaycana hazır şəkildə gətirilir".

Maraqlıdır, qeyd olunan saxta şprisləri satışdan necə yığışdırmaq olar? Əczaxanalarda həmin şprislərin satışını dayandırmaq mümkündürmü?

Məsələ ilə bağlı Səhiyyə Nazirliyindən bildirildi ki, son zamanlar müxtəlif kütləvi informasiya vasitələrində keyfiyyətsiz şprislərin dövriyyəyə buraxılması barədə məlumatlar yer alıb. Analitik Ekspertiza Mərkəzinə heç bir vətəndaşdan standartlara uyğun olmayan şprislərlə bağlı şikayət daxil olmayıb: “Vətəndaşların hər hansı şikayəti yarandığı təqdirdə qurumun “qaynar xətt” nömrələrinə (012 596 07 12, 012 594 57 27, 012 594 57 37) zəng edərək, email ünvanına (aem@pharma.az) yazaraq və ya AEM-in “Bir Pəncərə” xidmətinə yaxınlaşaraq şikayətlərini bildirmələri tövsiyə olunur. Hər bir şikayət dərhal araşdırılacaq”.

  • “Çin istehsalı olan saxta şprislər vasitəsilə müxtəlif xəstəliklər, viruslar yayıla bilər”

Professor, həkim-ekspert Adil Qeybulla bildirdi ki, saxta şprislər insan sağlamlığı üçün təhlükəlidir: “Bu cür şprislər vasitəsilə müxtəlif xəstəliklər, viruslar yayıla bilər. Təbii ki, keyfiyyətsiz şprislərin xəstəlik törətmə xüsusiyyətləri olduğu üçün, Səhiyyə Nazirliyi əhaliyə SOS siqnalı verib. Məlumdur ki, yaxın zamanlarda ölkəmizdə böyük şpris zavodu istifadəyə veriləcək. Nəzərə alınıb ki, bu zavodda Avropa standartlarına uyğun şpris istehsalına başlanacaq. Bu gün Azərbaycana Hindistan, Rusiya və digər ölkələrdən müxtəlif çeşidli şprislər gətirilir. Yəqin ki, müəyyən problemlər yaşanıb. Dəfələrlə şahidi olmuşuq, bir də görürsən ki, şpris deffektli və yararsız, vaxtı keçmiş olur. Təbii ki, bu çox ciddi məsələdir. Çünki insan sağlamlığı burada önəmli rol oynayır. Bu baxımdan güman edirəm ki, əhali ciddi məlumatlandırılmalıdır. Onsuz da gündəlik həyatımızda insanların əksəriyyəti iynə-dərmanda qalıb. Ona görə də diqqətli olmaq lazımdır. Şprisin buraxılış ili, son istifadə müddəti kağızda mütləq göstərilməlidir”.

Həmsöhbətimiz hesab edir ki, satışda olan saxta şprislər dərhal yığışdırılmalıdır. Hansı əczaxanada keyfiyyətsiz şprisin satıldığını görən olarsa, həmin şəxs mütləq Səhiyyə Nazirliyinə müraciət etməlidir. Eyni zamanda, insanların özləri də bu məsələdə fəal olmalıdırlar. Keyfiyyətsiz şprisləri almamaqla onların dövriyyədən çıxarılmasına səbəb ola bilərlər.

Günel CƏLİLOVA

Son xəbərlər