Son dövrlər Azərbaycanın bir sıra ali məktəblərində islahatlar həyata keçirilməyə başlayıb. İslahatlar çərçivəsində bəzi universitetlərdə kafedraların sayı azaldılıb. Bildirək ki, uzun müddətdir ali məktəblərdə bəzi kafedraların bağlanacağı, yeni ixtisaslar üzrə isə bəzi kafedraların açılacağı barədə fikirlər bildirilirdi. Ekspertlər hesab edirlər ki, kafedraların sayının azaldılması təhsilin keyfiyyətinə hər hansı bir zərər vurmayacaq.
Qeyd edək ki, Azərbaycan Texniki Universitetində də (AzTU) kafedraların sayı azaldılıb. Bu barədə AzTU-nun Elmi Şurasının iclasında qərar qəbul olunub. Bu ali təhsil müəssisəsində elmi-tədqiqat işlərinin yeni istiqamətlərinə və fakültələrin yenidən təşkilinə uyğun olaraq, bir sıra kafedralar ixtisar edilərək onların bazasında yeni kafedralar yaradılıb.
Elmi Şurada alternativ əsasda, gizli səsvermə yolu ilə yeni yaradılmış kafedraların müdirləri seçilib.
Bu proses digər ali məktəblərdə də həyata keçirilib.
Universitetlərdə kafedraların sayının ixtisar edilməsinin nəticələri nə olacaq?
“Ali məktəblərimizdə aktual olmayan, müasir tələbləri ödəməyən, bəzi köhnə ixtisaslar üzrə kafedralar...”
Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, ali məktəblərdə kafedraların ixtisar edilməsinin əhəmiyyəti yox deyil: “Əlbəttə, ali məktəblərdə müəyyən kafedraların bağlanması, yenilərinin açılması prosesi hər zaman olub. Heç şübhəsiz ki, bu, ali təhsil müəssisələrində baş verən islahatlarla bağlıdır. Azərbaycan Texniki Universitetində bəzi kafedraların bağlanacağı haqqında bir ay əvvəldən məlumatlı idim. Biz bu ali məktəbin yeni rektoru ilə görüş zamanı bu haqda məlumat aldıq. Bildirildi ki, yeni rektor təyinatından sonra universitetin həyatında bir sıra dəyişikliklər baş verəcək. Bu universitetdə islahatlar həyata keçirilməsi ilə bağlı işlərə başlanıb. Bunun tərkib hissəsi olaraq müəyyən kafedraların ixtisara salınması prosesi baş verdi və ola bilsin yeni, müasir ixtisasları özündə ehtiva edən kafedralar da yaradılsın. Bu proses yalnız Texniki Universitetdə deyil, digər ali məktəblərdə də həyata keçirilir”.
İ.Orucovun sözlərinə görə, bu gün Azərbaycanda əsas prioritet ali məktəblərdə təhsilin səviyyəsinin artırılması ilə bağlıdır. O qeyd etdi ki, 2019-2020-ci təhsil ilində Təhsil Nazirliyi bu istiqamətdə çox ciddi işlər həyata keçirib. “Bu tədris ilində Azərbaycanın ali məktəblərində tədrisin keyfiyyətinin artırılması, ali məktəblərimizin dünya standartlarına cavab verməsi istiqamətində çox ciddi işlər görülməkdədir. Bunun nəticəsidir ki, artıq Texniki Universitetdə və digər universitetlərdə bu cür islahatlar həyata keçirilir. Bu gün ali məktəblərin rəhbərləri, eləcə də müəllim və professor heyəti çox istəyir ki, ali məktəblərin səviyyəsi yüksəlsin. Ali məktəblərdə aparılan islahatlar ona hədəflənib ki, Azərbaycanın ali təhsil müəssisələri müasir tələblərə cavab versinlər. Orada təhsil alan tələbələr keyfiyyətli təhsillə təmin olunmalıdırlar ki, onlar bakalavr pilləsini bitirdikdən sonra özlərinə əmək bazarında iş tapa bilsinlər.
Açığını deyim, ali məktəblərimizdə aktual olmayan, müasir tələbləri ödəməyən, bəzi köhnə ixtisaslar üzrə kafedralar da vardı ki, bu kafedraların bu gün fəaliyyətinə tələbat və ehtiyac yox idi. Yaxud universitetlərimizdə bir-birinə oxşar, bir-birinin fəaliyyətini təkrarlayan kafedralar da vardı ki, onlar da artıq birləşdirilib. Bütün bu proseslər Azərbaycan ali təhsilinin keyfiyyətli olmasına, əmək bazarının tələblərinə cavab verən kadrlar hazırlanmasına şərait yaradır. Nəticə etibarilə bəzi kafedraların bağlanması ali məktəblərə zərər vermir, əksinə, xeyir gətirir. Ali məktəblərdə bu kimi islahatların aparılması təqdirəlayiqdir” - deyə İ.Orucov vurğuladı.
İradə SARIYEVA
