Məlum olduğu kimi, bir neçə gün əvvəl Prezident İlham Əliyev Bakı Şəhər İcra Hakimiyyətinin başçısı Eldar Əzizovu qəbul edərək onunla bir sıra istiqamətlərdə söhbət aparıb və rayon icra hakimiyyəti başçılarının fəaliyyəti ilə bağlı narazılıqları nəzərə çatdırıb. Dövlət başçısı E.Əzizova tövsiyə edib ki, o, rayon icra hakimiyyətləri başçılarını toplayıb müşavirə keçirsin.
“...Ona görə siz rayon icra hakimiyyətlərinin başçılarını yığın və həm abadlıqla, həm də təsərrüfat işləri ilə bağlı müşavirə keçirin. İlk növbədə, xoşagəlməz hallara son qoyulmalıdır. Süründürməçilik, rüşvətxorluq, vətəndaşlara biganə münasibət – bunlara son qoyulmalıdır. Əgər kim bu sahədə öz işinə düzəliş etməsə, biz o adamlarla vidalaşacağıq və bu, onlar üçün hələ ən yüngül cəza olacaqdır. Biz şəhərimizi inkişaf etdirməliyik. Bir daha demək istəyirəm ki, Bakı şəhəri dünyanın ən gözəl şəhərlərindən biridir və gələcəkdə də şəhərin inkişafı ilə bağlı əlavə addımlar atılacaqdır...”.
Bakı Şəhər İcra Hakimiyyətində (BŞİH) Prezident İlham Əliyevin Eldar Əzizovu qəbul etdiyi zaman verdiyi tapşırıqların icrası, Bakı şəhərində görülən abadlıq-quruculuq işlərinin vəziyyəti və qarşıda duran vəzifələrə həsr olunmuş müşavirə keçirilib. BŞİH-dən verilən məlumata görə, müşavirədə paytaxt rayonlarının icra hakimiyyətlərinin başçıları, şəhərin təsərrüfat xidmətlərinin rəhbərləri iştirak ediblər.
Toplantıda çıxış edən BŞİH-nin başçısı E.Əzizov ölkə başçısının qəbulunda olduğu zaman Prezident tərəfindən verilən tapşırıqlar, qeyd edilmiş nöqsanlar, görüləcək işlər və qarşıya qoyulan vəzifələr barədə məlumat verib.
Toplantıda bəzi icra hakimiyyəti başçıları ciddi tənqid edilib. E.Əzizov bildirib: “Şəhər və rayon icra hakimiyyəti başçıları cənab Prezidentin tutduğu iradlardan nəticə çıxarmalı, işimizi bu böyük insanın tələblərinə uyğun qurmalıyıq. Bu gün ölkədə sistemli dəyişikliklər, inqilabi islahatlar aparılır və buna uyğun olaraq iş, forma və metodlar dəyişməlidir. Tənqid və özünütənqid normaya çevrilməlidir”.
E.Əzizov icra başçılarına müraciət edərək, hər bir sakinin probleminin öz problemi kimi qəbul edilməsinin vacibliyini vurğulayıb.
Müşavirədə qanunsuz tikintilərlə bağlı ölkə başçısının iradları çatdırılıb, yaradılmış park və məhəllələrin lazımi səviyyədə qorunması ilə bağlı tapşırıqlar verilib. Xüsusi olaraq vurğulanıb ki, daxil olan məlumatlara görə, RİH-də və digər qurumlarda vətəndaşların müraciətlərinə bəzi hallarda lazımi diqqət göstərilmir, süründürməçilik hallarına yol verilir. Toplantıda rüşvətxorluq və digər neqativ halların aradan qaldırılması, yerlərdə vətəndaşlarla mütəmadi görüşlərin keçirilməsi və onların müraciətlərinə həssaslıqla yanaşılması ilə bağlı tapşırıqlar verilib və qaldırılan məsələlərlə bağlı tədbirlər planının hazırlanması qərara alınıb.
Tədbirdə bir neçə rayon icra hakimiyyətinin başçısı çıxış edərək ölkə başçısının haqlı iradlarından nəticə çıxaracaqlarını və qısa müddətdə lazımi tədbirlər görəcəklərini bildiriblər.
“İcra hakimiyyəti başçıları Prezidentin verdiyi tapşırıqların icrası ilə operativ şəkildə məşğul olmalıdırlar”
“Novoe vremya” qəzetinin baş readktoru Şakir Ağayev bizimlə söhbətində bildirdi ki, Prezidentin tapşırığından sonra dərhal operativ müşavirənin keçirilməsi müsbət haldır. O hesab edir ki, bu müşavirədən sonra Prezidentin tapşırıqlarınını icrasında hər hansı səhvə yol verən icra başçıları öz postlarını itirmiş olacaqlar. Onun sözlərinə görə, bu müşavirənin keçirilməsi Prezidentin tapşırıqlarının icra edilməsi baxımından icra başçılarının qarşısına yeni tələblər qoyur: “Təbii ki, Prezident tərəfindən verilən göstərişlərə onun özünün nəzarət etməsi, bütün prosesləri yaxından izləməsi, diqqətdə saxlaması çox müsbət haldır. Amma, əslində, bu işlərə Prezident nəzarət etməli deyil, etimad göstərib icra başçısı təyin etdiyi insanlar həm verilən tapşırıqları icra etməli, həm də prosesi nəzarətdə saxlamalıdırlar. İcra hakimiyyəti başçıları Prezidentin etimadını doğrultmalıdırlar. Çox təəssüf ki, Azərbaycanın icra başçılarının çoxu vəzifəyə təyin edildikdən sonra Prezidentin tapşırıqlarını icra etmək əvəzinə, tamamilə başqa işlərlə məşğul olurlar. Onlar özlərini rayonun sahibi kimi aparır, istədiyini edir, vətəndaşları qəbul etmirlər, yaxud qəbul günlərini hədsiz dərəcədə məhdud edirlər, şikayətlərə əhəmiyyət vermirlər, süründürməçiliyə, rüşvətxorluğa yol verirlər. Sözsüz ki, cənab Prezident bütün bunlar barədə mətbuatdan və digər mənbələrdən onların əməlləri barədə məlumatlar alır. O görür ki, icra başçıları onun etimadını doğrultmur və bu işə özü nəzarət edir. Bildiyimiz kimi, cənab Prezident icra başçılarının fəaliyyətindəki nöqsanlar barədə bütün məlumatlara malikdir və bu haqda E.Əzizovla görüşdə geniş danışdı, eyni zamanda, icra başçılarına tapşırıqlarını, tələblərini çatdırdı. Hesab edirəm ki, Prezidentin göstəriş və tələblərinin icrası ilə bağlı E.Əzizovun icra hakimiyyəti başçılarının iştirakı ilə keçirdiyi operativ müşavirənin müsbət nəticələri olacaq. E.Əzizov özü də icra başçılarının yol verdiyi nöqsanlardan xəbərdardır. Bu operativ müşavirədən sonra kim ki, Prezidentin ona göstərdiyi etimadın məsuliyyətini dərk edib yol verdiyi nöqsanları aradan qaldıracaq, verilən tapşırıqları, göstərişləri lazımi səviyyədə icra edəcək, o, vəzifəsində qalacaq, etimadı doğrultmayanlar isə öz vəzifələri ilə vidalaşmalı olacaqlar. Təbii ki, belə cəzalar daha effektiv olar. Yəni kim ki, öz vəzifəsini yerinə yetirmək, Prezidentin göstərişlərini icra etmək iqtidarında deyil, o, vəzifəsindən kənarlaşdırılmalıdır”.
Prezidentin tapşırığının operativ icra edildiyini deyən Ş.Ağayev hesab edir ki, dövlət başçısının həyata keçirdiyi siyasətin əsasında Azərbaycan xalqı və onun sosial rifahı, firavanlığı dayanır. “Bütün görülən işlər insanların sosial rifahı üçündür. Çox təəssüf ki, Bakının və rayonların bir çox icra hakimiyyəti başçısı kabinetə girir və özlərinə lazım olan işləri görür, vətəndaşların qayğısına qalmaq isə heç yadlarına belə düşmür. Bu da onların fəaliyyətindən narazılıqların artmasına səbəb olur. Bu narazılıqlar da, bildiyimiz kimi, Prezidentə çatır. Odur ki, icra hakimiyyəti başçıları Prezidentin verdiyi tapşırıqların icrası ilə operativ şəkildə məşğul olmalıdırlar. Çünki onların fəaliyyəti Prezident tərəfindən ciddi şəkildə izlənir” - deyə Ş.Ağayev vurğuladı.
İradə SARIYEVA
