Azərbaycanın yol infrastrukturu 141 ölkənin arasında ən öncüllərdən biri oldu
Azərbaycan yol infrastrukturunun keyfiyyətinə görə bir sıra Avropa ölkələrini qabaqlayıb. Belə ki, Azərbaycan Dünya İqtisadi Forumunun hazırladığı “Qlobal rəqabətqabiliyyətlilik indeksi”nin “Yol infrastrukturunun keyfiyyəti” göstəricisində 141 ölkə arasında 27-ci yeri tutub.
Azərbaycan bu göstəricidə Türkiyə (31-ci yer), Böyük Britaniya (36-cı yer), Litva (39-cu yer), İtaliya (53-ci yer) kimi ölkələri qabaqlayıb. Bu reytinqdə birinci yerdə Sinqapur qərarlaşıb.
Yol infrastrukturunun keyfiyyətinə görə Azərbaycanın 141 ölkə arasında 27-ci yerdə olması təbii ki, olduqca yaxşı göstəricidir. Məlumdur ki, Azərbaycanda yol infrastrukturunun yaxşılaşdırılması ilə bağlı dövlət tərəfindən yatırılan sərmayələr artıq öz müsbət nəticəsini verir. Bu templə davam etsə, növbəti illərdə dərc olunacaq reytinq cədvəllərində yol infrastrukturuna görə Azərbaycan daha ön sırada qərarlaşacaq. Ölkədə şimal, cənub və digər istiqamətlər üzrə yol infrastrukturunun inkişafı ilə bağlı layihələr həyata keçirilir. Mütəmadi olaraq Prezident İlham Əliyev tərəfindən yolların yenidən qurulması və müasir standartlara cavab verməsi ilə bağlı qərarlar verilir. Yeni yolların salınması, təmiri, mövcud yol infrastrukturunun inkişafı ilə bağlı sərəncamlar imzalanır. Görünən odur ki, bu sahəyə yatırılan sərmayələr nəticəsində Azərbaycanın yol infrastrukturu bu sahə ilə bağlı keçirilən sorğularda yüksək qiymətləndirilir.
- “Sözügedən yollar ölkəmizin digər dövlətlərlə iqtisadi əlaqələrinin intensivliyini təmin edir”
Məsələyə münasibət bildirən millət vəkili Aydın Hüseynovun sözlərinə görə, bu sahədə ardıcıl görülən bir sıra sistemli işlər Azərbaycanın ciddi uğur əldə etməsinə gətirib çıxarıb: “Azərbaycanda yol infrastrukturunun inkişafı ilə bağlı bir sıra layihələr qəbul edilib. Bu layihələrin həyata keçirilməsi nəticəsində ölkəmiz yol infrastrukturunun keyfiyyətinə görə 27-ci yerdə qərarlaşıb. Bu nəyin nəticəsində əldə olunub? Birinci növbədə “Regionların sosial-iqtisadi inkişafına dair Dövlət Proqramı” qəbul edildi. Cənab Prezidentin birbaşa qərarı ilə belə proqram hazırlandı. Həmin proqram çərçivəsində görülən işlərdən biri də ölkənin yol infrastrukturunun yenidən qurulması idi. Gərək regionlarda yol infrastrukturu yüksək səviyyədə olsun ki, qeyri-neft sektoru inkişaf etsin, sahibkarlar sərmayə qoysun, yeni iş yerləri açsınlar. Turizmin inkişafında da yol infrastrukturu mühüm rol oynayır. Çünki yaxşı yol infrastrukturu olmadan turistlər bölgələrə maraq göstərmirlər. Bütün bunlar, nəticə etibarilə, ölkə ərazisində yol infrastrukturunun əhəmiyyətli dərəcədə inkişaf etməsinə gətirib çıxardı. Magistral yolları əsaslı şəkildə genişləndirildi. Sözügedən yollar Azərbaycanın digər ölkələrlə iqtisadi əlaqələrinin intensivliyini təmin edir. Bu yöndə ardıcıl görülən işlərin nəticəsidir ki, Azərbaycan yol infrastrukturunun keyfiyyətinə görə bir sıra Avropa ölkələrindən öndədir”.
Vidadi ORDAHALLI
