“Polisə Dəstək” İB “İnsan alveri cinayətlərini doğuran səbəblərin və problemin xəbərdarlığı, tədqiqi, habelə profilaktikasında ictimaiyyətin rolu”mövzusunda 5 noyabr tarixində Sumqayıt Dövlət Universitetində tələbə kollektivinin və şəhər KİV –in iştirakı ilə seminar- mühazirə keçirib.
“Polisə Dəstək” İB-nin mətbuat xidmətinin məlumatına görə, QHT-lərə Dövlət Dəstəyi Şurasının maliyyə yardımı ilə həyata keçirilən vətəndaş cəmiyyətinin maarifləndirmə xarakterli tədbirində “İnsan alverinin qarşısının alınması, problemlərin xüsusiyyətləri, habelə oxşar hüquqazidd əməllərin, uşaqların insan alverinə məruz qalma risqlərinin tədqiqi və bu istiqamətdə ictimai rəyin öyrənilməsi” ətrafında iştirakçılara geniş məlumat verilib.
Tədbiri giriş sözü ilə açan Sumqayıt Dövlət Universitetinin prorektoru Ramiz Hüseynov iştirakçıların diqqətini dövlətin insan alverinə qarşı mübarizə istiqamətindəki Milli Tədbirlər Planına yönəldib və qısa informasiyadan sonra sözü “Polisə Dəstək” İB-nin sədri Şəmsəddin Əliyevə verib. O, insan alverinin sosial hüquqi hadisə kimi ictimai orqanizmin normal inkişafına neqativ təsir etdiyi, insanların sosial davranışlarına, onların iradə azadlığına və psixikasına zərər vuran, insan alverini doğuran səbəblərin aradan qaldırılması və bu işin nəzarətdə saxlanması, habelə onun xəbərdarlığı və profilaktikası məqsədilə vətəndaşların maarifləndirilməsini dövlətin cinayətkarlıqla mübarizə siyasətinin mühüm cəhətləri barədə məlumat verib.
Statistik məlumatlara görə, Respublika DİN-nin İnsan Alverinə Qarşı Mübarizə Baş İdarəsi tərəfindən 2018-cı il ərzində 144(+2) insan alveri cinayətləri müəyyən edilib, 28(+11) nəfərdən ibarət 13(+5) cinayətkar qrup zərərsizləşdirilərək insan alverinin qurbanı olmuş 98(+27) şəxsin cəmiyyətə reinteqrasiyası təmin edilib. “İnsan Alverinə Qarşı Mübarizə Baş İdarəsi”nin bu istiqamətdə həyata keçirdiyi əməliyyat-axtarış tədbirləri MDB dövlətlərindən fərqli və görk olacaq həddədir.
Ş.Əliyev daha sonra insan alverinin insan hüquq və azadlıqlarına ciddi təhlükə yaradan, insan ləyaqətini alçaldan, şəxsiyyətin toxunulmazlığına yönələn qəsd, iqtisadi sabitliyi sarsıdan, vətəndaşların iradə azadlığını məhdudlaşdıran xüsusilə ağır və transmilli mütəşəkkil cinayətkarlığın mühüm, təhlükəli növünün problemi ətrafında məlumat verib. BMT-nin statistikasına görə, il ərzində insan alverindən gələn gəlirin 32-35 milyard dollar təşkil etdiyini və 2,5 milyon insanın bu cinayətin müxtəlif formalarından əziyyət çəkdiyini xatırladıb, habelə qurbanların sırasında qadın və uşaqların çoxluq təşkil etdiyini narahatlıqla ifadə edib. Sonda Ş.Əliyev vətəndaşları ayıq-sayıq olmağa çağırıb, iş və təhsillə bağlı vədlərə ümid bəsləməsini sadəlövhlük adlandıraraq çıxışını bitirib. Tədbirin sonunda iştirakçılara70 səhifəlik “İnsan alveri” kitabçası paylanıb və müasir köləliyi əks etdirən 10 dəqiqəlik videofilm nümayiş etdirilib.
