Məlum olduğu kimi, Azərbaycan Respublikasının Prezidenti İlham Əliyev Bakı Şəhər İcra Hakimiyyətinin başçısı Eldar Əzizovu qəbul edib və ona Bakıda görüləcək işlərlə bağlı yeni tapşırıqlar verib. Prezident Eldar Əzizova, eyni zamanda, Bakının royonlarına rəhbərlik edən icra başçıları ilə işlərin daha koordinasiyalı şəkildə görülməsi, onların fəaliyyətinə nəzarətin artırılması ilə bağlı müvafiq göstərişlərini verib.
İlham Əliyev bildirib ki, Bakı şəhərinin nadir, özünəməxsus, tarixi memarlıq siması var, onu qorumaq lazımdır: “Bu bizim böyük sərvətimizdir və hər bir tarixi binaya böyük diqqətlə yanaşılır. O binaların təmiri gərək elə aparılsın ki, onların tarixi görkəmi pozulmasın. Bəzi hallarda tarixi binaları sökürlər, onların yerində eybəcər çoxmərtəbəli binalar tikirlər. Buna yol vermək olmaz. Bakının memarlığı bizim milli sərvətimizdir. İçərişəhər YUNESKO tərəfindən qorunur. Deyə bilərəm ki, dünyada o qədər də çox şəhərlər belə qədim İçərişəhər kimi şəhərlərlə öyünə bilməz, bu bizim böyük sərvətimizdir. Eyni zamanda, şəhərin hər bir yeri abad olmalıdır. Bəzi yerlərdə, ümumiyyətlə, küçə işıqları yoxdur, qəsəbələrdə, bir çox yerlərdə torpaq yollar var. Mən artıq bu barədə “Azəravtoyol” Agentliyinə ciddi tapşırıq vermişəm, siz də nəzarət edin. Yəni şəhərin hər bir yeri bizim üçün əzizdir. Bakı şəhəri təkcə mərkəzdən ibarət deyil. Biz şəhərin infrastrukturunu, ilk növbədə, vətəndaşlar, ondan sonra turistlər, xarici qonaqlar üçün yaradırıq. Onlar da əlbəttə ki, özlərini Bakıda rahat hiss etməlidirlər. Ancaq biz, ilk növbədə, şəhər sakinlərinin problemlərini həll etməliyik. Ona görə siz rayon icra hakimiyyətlərinin başçılarını yığın və həm abadlıqla, həm də təsərrüfat işləri ilə bağlı müşavirə keçirin. İlk növbədə, xoşagəlməz hallara son qoyulmalıdır. Süründürməçilik, rüşvətxorluq, vətəndaşlara biganə münasibət – bunlara son qoyulmalıdır. Əgər kim bu sahədə öz işinə düzəliş etməsə, biz o adamlarla vidalaşacağıq və bu onlar üçün hələ ən yüngül cəza olacaqdır. Biz şəhərimizi inkişaf etdirməliyik. Bir daha demək istəyirəm ki, Bakı şəhəri dünyanın ən gözəl şəhərlərindən biridir və gələcəkdə də şəhərin inkişafı ilə bağlı əlavə addımlar atılacaq”.
Bəllidir ki, Bakının rayon icra başçıları idarəetmənin strukturu baxımından əvvəl də Bakı Şəhər İcra Hakimiyyətinə tabe idi. Ancaq biz tez-tez şahidi olurduq ki, rayon icra hakimiyyətləri ilə Bakı Meriyası arasında fikir ayrılıqları yaranır. Hətta birinin verdiyi sərəncamın digəri tərəfindən ləğv olunması, icra edilməməsi hallarına da rast gəlirdik. Ölkə başçısının verdiyi son tapşırıqdan sonra bu idarəetmə strukturları arasında yeni əməkdaşlıq, koordinasiya modeli yaranacaq. Ölkə başçısı “siz rayon icra hakimiyyətlərinin başçılarını yığın və həm abadlıqla, həm də təsərrüfat işləri ilə bağlı müşavirə keçirin” deməklə, Eldar Əzizova bu işgüzar əlaqələrin yeni formatını təqdim etmiş oldu. Ölkə başçısının təklif etdiyi bu sıx əməkdaşlıq modeli Bakının inkişafında nə kimi rola malik olacaq?
Rasim Quliyev: “Bu idarəçilik həm Bakının daha da gözəlləşməsinə, həm də paytaxt sakinlərinin problemlərinin həllinə müsbət təsirini göstərəcək”
Uzun müddət Bakı Şəhər İcra Hakimiyyətində rəhbər vəzifədə çalışmış, hazırda isə “Resurs” Analitik İnformasiya Mərkəzinə rəhbərlik edən Rasim Quliyev “Bakı-Xəbər”ə açıqlamasında bildirdi ki, Bakı Şəhər İcra Hakimiyyəti ilə Bakının ərazisində olan rayonlar arasındakı əlaqələrin daha sıx olmasının yalnız müsbət nəticələri ola bilər: “Nəzərinizə çatdırım ki, Bakı şəhərinin ərazisində 12 inzibati rayon var. Oranın icra başçıları da cənab Prezident tərəfindən vəzifəyə təyin edilirlər. Təbii ki, onların da fəaliyyəti və funksiyaları dövlət adındandır, tam da qanunauyğundur. Əvvəllər də onların fəaliyyəti Bakı Şəhər İcra Hakimiyyəti ilə qarşılıqlı, razılaşdırılmış şəkildə olub. Bir çox tədbir birgə keçirilirdi. Cənab Prezidentin qoyduğu tələb yeni islahatların mahiyyətinə uyğundur. Ölkə başçısı daha çevik və modernləşmiş idarəetmənin tərəfdarıdır. Bu da qurumların daha sıx inteqrasiyasını tələb edir. Bundan sonra Meriya Bakı şəhərinin inzibati ərazi vahidinə aid olan rayonların fəaliyyətinə daha sıx nəzarət etməlidir. Prezidentin ortaya qoyduğu tələblərdən aydın oldu ki, irəlidə görülməsi vacib olan bir çox iş var. Əvvəllər də belə əlaqələr olurdu. Ancaq bəzən bu koordinasiya pozula bilirdi. Bunun da bir sıra səbəbləri olub. Bu faktı danmaq olmaz. Gələcək idarəetmə isə tam Prezidentin qoyduğu tələblər əsasında olacaq. Bu ən yaxşı modeldir. Hesab edirəm ki, rayon icra başçıları da fəaliyyətlərini bu tələblər kontekstində quracaqlar”.
Rasim Quliyevin sözlərinə görə, Meriya ilə rayon icra hakimiyyətləri arasında əlaqələrin sıxlaşdırılması tələbi hər zaman olub: “Hazırda isə bunun sürətlənməsi və daha yeni mərhələyə keçidinə ehtiyac yaranıb. Bu idarəçilik həm Bakının daha da gözəlləşməsinə, həm də paytaxt sakinlərinin problemlərinin həllinə müsbət təsirini göstərəcək. Bütün rəhbər kadrlar Prezidentin göstəriş və tapşırıqlarından düzgün nəticə çıxarmalı, ölkəmizin inkişafına öz töhfələrini verməlidirlər”.
Məhəmmədəli QƏRİBLİ
