“Əlbəttə ki, rayon icra hakimiyyətləri tərəfindən vətəndaşlara diqqət yüksək səviyyədə olmalıdır. Bəzi hallarda vətəndaşlar incidilir, onların problemlərinə reaksiya verilmir. Bəzi hallarda vətəndaşlardan qanunsuz olaraq müəyyən vəsait tələb edilir, rüşvətxorluq halları baş verir". Bunu Prezident İlham Əliyev noyabrın 4-də Bakı Şəhər İcra Hakimiyyətinin başçısı Eldar Əzizovu qəbul edərkən deyib.
Prezident qeyd edib ki, belə siqnallar bizə çatır və rayon icra hakimiyyətləri nəticə çıxarmalıdırlar: “Xoşagəlməz hallara yol verilməməlidir, vətəndaşlara maksimum diqqət göstərilməlidir, rayon icra hakimiyyətlərinin nümayəndələri kabinetdə oturub kağızlara baxmaq yox, bütün rayonlarda vətəndaşlarla görüşməlidirlər. Mənim göstərişimlə son vaxtlar bu proses bir qədər geniş vüsət alıb, amma lazımi səviyyədə deyil. Mənə verilən məlumata görə, bəzi hallarda formal xarakter daşıyır, bəzi hallarda vətəndaşları narahat edən problemlərə reaksiya verilmir. Ona görə biz çox diqqətli olmalıyıq. Əgər vətəndaşı nəsə narahat edirsə, buna reaksiya verilməlidir. Əlbəttə, bütün məsələlərə obyektiv şəkildə baxılmalıdır. Bəzi hallarda elə məsələlər qaldırılır ki, bunun heç bir əsası yoxdur, yaxud da sırf şəxsi xarakter daşıyır. Ancaq bir çox hallarda vətəndaşlar haqlı olaraq öz təkliflərini verirlər, onları narahat edən problemləri qaldırırlar. Həm Bakı Şəhər İcra Hakimiyyəti və bütün rayon icra hakimiyyətləri vətəndaşlara böyük diqqətlə yanaşmalıdırlar. Beləliklə, Bakı şəhəri və Azərbaycanın bütün şəhərləri planlı şəkildə inkişaf etməlidir".
Paytaxtın icra hakimiyyəti orqanlarının vətəndaşlarla münasibətlərində, onların qəbulunda, davranış qaydalarında nə kimi problemlər var?
“İcra başçıları vətəndaşların problemini həll etmək bir yana, şikayəti araşdırmağa belə lüzum görmürlər”
Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, tək paytaxt icra hakimiyyəti orqanlarının rəhbərləri deyil, eyni zamanda, bölgələrdəki rayon icra hakimiyyəti başçıları vətəndaşlarla mütəmadi görüşə bilmirlər. İcra başçıları ay ərzində 1 gün vətəndaşları qəbulu edirlər: “Şikayəti olan, probleminin həll olunmasına can atan vətəndaşlar icra başçısının qəbuluna düşmək istəyir. Ancaq bir gün vətəndaşların qəbulu üçün yetərli deyil. Yaxşı olar ki, icra başçıları həftənin hər günü vətəndaşları qəbul edib, onların problemini dinləyib, həllinə şərait yaratsınlar. Vətəndaşlar icra başçıları ilə görüşməkdə çətinlik çəkirlər. Qəbula düşmək istəyən vətəndaşlar əziyyət çəkirlər. Onların qəbula yazılmasında problem yaşanır”.
Həmsöhbətimizin sözlərinə görə, icra başçılarının əsas missiyası vətəndaşların problemini, şikayətini araşdırıb dərhal onun həll olunmasına şərait yaratmaqdır. Təəssüf ki, icra başçıları vətəndaşların problemini həll etmək bir yana, şikayəti araşdırmağa belə lüzum görmürlər: “Yaxşı olar ki, icra başçıları Prezident İlham Əliyevin dediyi kimi, kabinetdə deyil, əhali ilə sıx təmasda olsunlar. Belə olarsa, hər bir icra başçısı həm vətəndaşların vəziyyətindən, həm də ərazidə baş verən hadisələrdən xəbərdar olar”.
Günel CƏLİLOVA
