Bir vaxtlar Azərbaycan telekanallarında milli mentalitetimizə zidd olan, ailə dəyərlərimizlə uzlaşmayan mövzularda çəkilən əcnəbi seriallar nümayiş edilirdisə, indi isə özəl telekanallar o serialların yerini milli seriallarla doldurmağa çalışırlar.
Məsələ burasındadır ki, özəl telekanalların istehsal etdiyi serialların böyük əksəriyyəti ailə-məişət mövzusundadır və bu seriallarda Azərbaycan ailələləri tamamilə fərqli şəkildə təqdim edilir. Milli serial adlandırılan nəsnələrin mövzusu sanki Azərbaycan ailələri, Azərbaycan cəmiyyəti ilə bağlı deyil, hansısa bir xarici ölkə həyatı, ailəsilə bağlıdır. Yəni seriallarımızda Azərbaycan ailəsi öz obrazında verilmir, fərqli cür təqdim edilir. Bir neçə dəfə qeyd etmişik ki, Azərbaycanda çəkilən seriallarda ailə dəyərləri təhrif edilir.
Son zamanlar özəl telekanalların istehsal etdiyi seriallarla bağlı Milli Televiziya və Radio Şurasının sədri Nuşirəvan Məhərrəmli də narahatlığını bildirib. “Özəl kanallarda yayımlanan seriallarda Azərbaycan ailəsi təhrif olunmuş formada təqdim olunur” - deyə bildirən qurum rəhbəri qeyd edib ki, özəl televiziya kanallarında verilişlərin bayağılığı, süniliyi Milli Televiziya və Radio Şurasının sədri kimi onu çox narahat edir. Onun sözlərinə görə, özəl televiziya kanallarında yol verilən nöqsanlar daha çox reytinq xatirinə görə olur: "Çox təəssüflər olsun ki, reytinq xatirinə fəaliyyət çox ciddi səhvlərə gətirib çıxarır. Özəl televiziya kanallarında verilişlərin bayağılığı, süniliyi Milli Televiziya və Radio Şurasının sədri kimi məni çox narahat edir”.
“…ailə modelimiz qəsdən, yaxud diqqətsizlikdən təhrif edilir”
Filologiya üzrə fəlsəfə doktoru, şairə Qiymət Məhərrəmli bizimlə söhbətində bildirdi ki, həqiqətən də özəl televiziya kanallarında yayımlanan seriallarda Azərbaycan ailəsi çox təhrif edilmiş formada təqdim olunur. Q.Məhərrəmlinin sözlərinə görə, çəkilən kino və seriallarda Azərbaycanın ənənəvi ailə modelinin iflic vəziyyətdə təqdim edilməsi yolverilməzdir. Müsahibimizin dediyinə görə, bu serialların mövzusu xarici seriallardan plagiat olduğu üçün, onu istehsal edənlər həmin ssenarini kopyalamaqdan çəkinmirlər. “Azərbaycanda özəl telekanallar tərəfindən istehsal edilən serialların səviyyəsi bir yana qalsın, onların mövzuları da əksər hallarda Azərbaycan mentaliteti ilə uyğun gəlmir. Bu seriallarda Azərbaycan ailəsi, adət-ənənələrimiz təhrif olunur. Özəl telekanalların çəkdiyi teleseriallarda Azərbaycan ailəsinin deformasiyaya uğradılması, ənənənəvi ailə modelinin dağıdılması təbliğ olunur. Seriallarda Azərbaycan ailələrini Avropa, Latın Amerikası ailəsi kimi göstərməyə çalışırlar. Sanki müəyyən qüvvələr öz çürük ideyalarını seriallar vasitəsilə cəmiyyətimizə ixrac edirlər. Özəl telekanallarda çəkilən seriallar gerçək Azərbaycan ailəsinin simasını göstərməyə çalışmır, Azərbaycan ailəsini ona yad olan obrazda təqdim edirlər, bununla da ailə modelimiz təhrif edilir. Bu da ondan irəli gəlir ki, bu seriallar üçün ssenari yazanlar Azərbaycan ailəsini, cəmiyyətini yaxşı tanımır, rejissor da həmçinin. Məlumdur ki, dövlətin büdcəsi, maliyyəsi hesabına çəkilən seriallara aidiyyəti qurumlar tərəfindən nəzarət olmalıdır. Seriallar çəkilməli, sonra bədii şuradan keçməlidir”.
Bu gün Azərbaycan ailəsinin həqiqi obrazının yaradılmasının vacib olduğunu deyən Q.Məhərrəmli hesab edir ki, telekanallar serial istehsalına peşəkarları cəlb etməlidirlər. “Bu işlə qeyri-peşəkarlar məşğul olduğu üçün, seriallarda Azərbaycan ailələsinin həqiqi obrazı təhrifə uğradılır. Azərbaycan ailəsi bəzi seriallardakı kimi deyil. Seriallarda ailə modelimiz qəsdən, yaxud diqqətsizlikdən təhrif edilir və bunun nəticəsində də tamaşaçılar onlara yad “ailələr” görürlər” - deyə Q.Məhərrəmli bildirdi.
İradə SARIYEVA
