Orta ümumtəhsil məktəblərinin Azərbaycan Təhsil Şəbəkəsinə qoşulması, onların tam olaraq internet imkanları ilə təhciz olunması problemi artıq arxada qalıb. Bir vaxtlar orta ümumtəhsil məktəblərinin, xüsusən də rayon və kəndlərdə fəaliyyət göstərən təhsil müəssisələrinin vahid internet şəbəkəsinə qoşulması ilə bağlı ciddi çatışmazlıqlar, problemlər var idi. Artıq Təhsil Nazirliyi bu problemin həll olunması üçün real addımlar atıb.
Təhsil Nazirliyindən verlən məlumata görə, cari ilin birinci yarımili ərzində Azərbaycan Təhsil Şəbəkəsinə 360-dan çox ümumtəhsil məktəbi qoşulub.
Hazırda bu, respublikanın 3186 ümumtəhsil məktəbini əhatə edir. Ölkə üzrə şagirdlərin 93 faizi, müəllimlərin isə 89 faizi internetlə təmin olunub.
Azərbaycan Təhsil Şəbəkəsi ölkənin ümumtəhsil müəssisələrini, eləcə də təhsil sahəsində dövlət siyasətini həyata keçirən qurumları vahid şəbəkədə birləşdirən ən geniş internet şəbəkəsidir. Layihənin icrasına 2008-ci ildə “2008-2012-ci illər üzrə Azərbaycan Respublikasında təhsil sisteminin informasiyalaşdırılmasına dair Dövlət Proqramı” çərçivəsində başlanıb. Azərbaycan Təhsil Şəbəkəsinin təqdim etdiyi başlıca imkanlar internetə yüksək sürətli çıxışın təmin olunması, internetin zərərli məzmunlardan süzgəclənməsi, internet şəbəkəsinin qurulması və internet üzərindən rabitənin (İP telefoniya, videokonfrans) təşkili, eləcə də şəbəkə və avadanlıqlara texniki dəstək xidmətinin göstərilməsidir.
Azərbaycan Təhsil Şəbəkəsi ölkədə tədris prosesini daha effektiv qurmağa imkan yaratmaqla yanaşı, məsafədən asılı olmayaraq, təhsildə müsbət təcrübənin yayılmasını təmin edir. Artıq ucqar yaşayış məntəqələrindəki məktəblərin müəllim və şagirdləri də Azərbaycan Təhsil Şəbəkəsi vasitəsilə müvafiq elektron resurslardan istifadə edə bilirlər. Şəbəkə çərçivəsində təhsil müəssisələrinə təqdim edilən internet avtomatik rejimdə bütün növ zərərli və tədris prosesinə aid olmayan məzmunlardan təmizlənərək şagirdlərin ixtiyarına verilir. Bu isə, öz növbəsində, uşaq psixikasının internetin zərərli təsirlərindən qorunması ilə yanaşı, tədris prosesində şagirdlərin diqqətinin yalnız faydalı məzmunlar üzərində cəmləşməsinə xidmət edir.
“Şəbəkəyə qoşulma imkan yaradır ki, müəllimlər yeni innovativ metodlardan istifadə etsinlər”
Tanınmış təhsil eksperti Məlahət Mürşüdlü bizimıə söhbətində məktəblərin vahid internet şəbəkəsinə qoşulmasının böyük əhəmiyyəti olacağını qeyd etdi. Bunun təhsilin səmərəli idarə edilməsindən tutmuş, məktəblər arasında yeni əlaqələrin qurulmasına qədər bütün sahələrdə müsbət effekt yaradacağını qeyd edən M.Mürşüdlünün sözlərinə görə, Azərbaycan məktəblərinin inkişfına bunun böyük xeyri dəyəcək. “XXI əsr informasiya-kommunikasiya, texnologiya əsridir. Belə bir dövrdə ölkənin həyatında aparıcı rolu olan orta ümumtəhsil məktəblərinin Təhsil Nazirliyinin vahid Təhsil Şəbəkəsinə qoşulması məktəblərin, şagird və müəllimlərin qarşısında yeni imkanlar açır. Bu şəbəkəyə qoşulmaqla məktəblər həm keyfiyyətli internetlə təmin olunur, həm də məktəblə bağlı xəbərləri, məlumatları daha mobil, çevik şəkildə yaya bilirlər. Şəbəkəyə qoşulma imkan yaradır ki, müəllimlər yeni innovativ metodlardan istifadə etsinlər, elektron dərsliklərlə tanış olsunlar, onlardan asanlıqla istifadə edə bilsinlər. Müəllimlər vahid Təhsil Şəbəkəsinə qoşulmaqla qabaqcıl təcrübələri əldə etməklə yanaşı, onlar həm də dərsliklərin, proqramların, təhsillə bağlı yeniliklərin də müzakirəsinə asanlıqla qoşula biləcəklər. Təhsil şəbəkəsi orta ümumtəhsil məktəbləri üçün daha optimal, daha səmərəli fəaliyyətin təqdim edilməsi üçün münbit zəmin yaradır. Məktəblərin vahid Təhsil Şəbəkəsinə qoşulmasının ayrı-ayrı fənn müəllimləri üçün də əhəmiyyəti böyükdür. Artıq bütün məktəblər Təhsil Şəbəkəsinə qoşulacaq və məktəblərdə gedən proseslər həm izlənəcək, həm də nazirlik məktəblərə dəstək olacaq. Təhsil Şəbəkəsinə qoşulmaqla məktəblərdə keçirilən açıq dərslər, təqdimatlar, tədbirlər şəbəkə vasitəsilə canlı şəkildə izlənəcək. Bu, Təhsil Şəbəkəsinə yalnız şəhər məktəbləri deyil, kənd məktəblərinin də qoşulması çox diqqətçəkəndir. Məktəblərin şəbəkələrə qoşulması, bütün mənalarda, effektiv nəticə verəcək. Onu da deyim ki, Təhsil Şəbəkəsinə qoşulan məktəblərdə monitorinqlərin aparılması da asanlaşacaq. Hesab edirəm ki, orta ümumtəhsil məktəblərinin vahid Təhsil Şəbəkəsinə qoşulması tədris prosesini daha effektiv qurmağa imkan yaradacaq, həmçinin, məktəblər arasında əlaqələri daha da sıxlaşdıracaq, təcrübələrin bölüşdürülməsinə şərait yaradacaq” - deyə M.Mürşüdlü qeyd etdi.
İradə SARIYEVA
