Bu günlərdə Bakı Nəqliyyat Agentliyinin rəsmisi Mais Ağayevin yerli kanallardan birinə verdiyi müsahibədə Bakı sərnişindaşımasında fərqli saatlarda fərqli qiymətlərin olacağı ilə bağlı açıqlaması sosial şəbəkə istifadəçiləri tərəfindən birmənalı qarşılanmadı.
BNA rəsmisinin məlum açıqlamasını daha çox nəqliyyatda qiymət artımına gedən hazırlıq kimi qiymətləndirdilər. Yaranmış ajiotajın fonunda, Mais Ağayev belə bir açıqlama verməli oldu: “Ötən gün kart sisteminə keçid tam başa çatandan sonra gediş haqqının ödənilməsində müəyyən fərqliliklərin ola biləcəyini bildirmişəm. Yəni ortada hələ konkret nəsə yoxdur, sadəcə, fikir olaraq söylənilib bu məsələ. Bəzi KİV bu açıqlamaya istinad edərək, guya marşrut avtobuslarında gediş haqqının artacağı ilə bağlı məlumatlar yayıb. Qiymət artımı olacağı ilə bağlı əsası olmayan bu məsələ insanlar arasında ciddi narahatlığa səbəb olub. Bildirirəm ki, heç bir qiymət artımından söhbət getmir. Digər yandan, qiymət tənzimlənməsi BNA yox, digər müvafiq qurum tərəfindən həyata keçirilir.
Efirdə səslənən fikirlərin izahına gəlincə, bildirim ki, məsələn, Türkiyənin İzmir şəhərində səhər 06:00-07:00, axşam 19:00-20:00 arasında ictimai nəqliyyatda tariflər 50 faiz azaldılır. Bu ildən tətbiq edilən bu təcrübənin məqsədi pik saatlarda daha çox insanın məhz ictimai nəqliyyatdan istifadəsinə nail olmaqdır.
Bizim də məqsədimiz insanların ictimai nəqliyyatdan istifadəsini stimullaşdıran bu cür təcrübələrdən istifadə etməkdir. Bir daha qeyd edirəm, qiymətlərin artacağı ilə bağlı səslənən fikirlər yalandır”.
Göründüyü kimi, Mais Ağayev qiymətlərin artacağını tam istisna edir. Heç azalacağını da demir. Ancaq bütün bunların fonunda, fərqli saatlarda fərqli qiymətlərin müəyyənləşməsinin zəruriliyindən danışır. Bakı şəhərində belə sistemə keçidə ehtiyac varmı və bu, neqativ hallar üçün böyük şanslar yaratmaz ki?
“İndiki mərhələdə qətiyyən buna getmək olmaz”
Nəqliyyat məsələləri üzrə ekspert Azər Allahverənov “Bakı-Xəbər”ə açıqlamasında bildirdi ki, Bakı üçün daha çox stabil tarif sistemi məqbuldur: “Bunun karta keçidlə heç bir əlaqəsi ola bilməz. Kartla ödəniş sisteminin təyinatı tamamilə fərqlidir. Bu, insanların rahat ödəniş etməsi, sürücüləri məcburi planlı ödənişdən azad etmək üçündür. Yəni bundan sonra sürücü əməkhaqqı alır və təyin olunmuş qrafik üzrə hərəkət edir. O, müştərini kim tez götürəcək prinsipi üzrə işləməyəcək. Bununla həm də qəza risqi azalmış olur. Qiymət artımı isə tamamilə fərqli səbəblərə görə baş verə bilər. Məsələn, yanacağın qiymətinin qalxması, daşınmanın rentabelli olmaması. Açıq bazar şəraitində isə bu işlə məşğul olan şirkətlərin iş prinsipi bu amil üzrə müəyyənləşir ki, rentabelli deyilsə, niyə işləyirsən? Aydındır ki, burada daha güclü şirkətlər önə çıxmış olur. Fəaliyyətləri varsa, deməli, rentabellik var. Düzdür, bəzən şikayətlənirlər ki, qazanc azdır, avtomobil parkını yeniləyə bilmirlər və s. Mənim sadaladıqlarımın deyilən sistemə keçidlə heç bir əlaqəsi ola bilməz. Fərqli qiymətə keçid təbii ki, müəyyən sui-istifadə hallarına yol aça bilər. Bu həm də insanlar arasında çaşqınlıq yaradar. Çünki günün müxtəlif saatlarında məbləğlərin hesablanması kartda lazım olan məbləğlə bağlı insanların öz işlərini düzgün planlaşdırmaması ilə nəticələnə bilər. İndiki mərhələdə qətiyyən buna getmək olmaz”.
Məhəmmədəli QƏRİBLİ
